قازىر ءاربىر تۇرعىن اقشالى بولعىسى كەلەدى. بىراق, ارتىق ەڭبەك ەتۋگە ەرىنەدى. ال مەملەكەتكە جاۋتاڭداعان ادام ەشقاشان بايىمايتىنى انىق. سول ءۇشىن قولدان كەلەر ءىستىڭ شەشىمىن تاۋىپ, جەكە كاسىپكە بەت بۇرعان ابزال. ماسەلەن, كاسىپكەر ايبولات ماحاي سەكىلدى. ول بالپىق بي اۋىلىندا جيھاز وندىرەتىن جەكە تسەح اشىپ, كوكسۋ اۋدانىن ايتۋلى ونىمدەرىمەن قامتاماسىز ەتىپ وتىر. اكەدەن كەلگەن اسىل ءىس, ۇلكەن كاسىپتىڭ باسپالداعى بولعان.
ارينە, ادام نەگە قابىلەتتى سول باعىتتا ونەرىن شىڭداسا, ومىرلىك ازىق بولارى داۋسىز. ءبىز كاسىپ يەسىنىڭ شاڭىراعىنا بارعاندا وسى ويدىڭ شىرماۋىنا تۇستىك. اۋەلدى مەملەكەتتىك قىزمەتكەر بولۋعا بەكىنگەن ايبولات اقىرىنداپ بۇل جۇمىستىڭ ورايىنا كەلمەيتىنىن اڭدايدى. وقىپ العان ديپلومىن ساندىققا سالىپ, جەكە كاسىپكەر بولۋعا بەكىنەدى. اعاش ويۋدى, جونۋدى بالا كۇنىنەن سەرىك ەتكەن كەيىپكەرىمىز كوپ ويلانباي اكە اقىلىمەن جيھاز وندىرەتىن شاعىن تسەحتىڭ ىرگەسىن قالايدى. كوپ ۇزاماي ءوندىرىستىڭ تولىق تسيكلىن جولعا قويدى. ءسويتىپ, جاس كاسىپكەرلەرگە جىگەر بەرەر مەملەكەتتىك باستامالارعا يەك سۇيەپ, كەرەك-جاراعىن تۇگەندەيدى. «دامۋ» قورى ارقىلى نەسيە الىپ, اكەسىنىڭ باستاعان بيزنەسىن كەڭەيتۋگە نيەت ەتكەن جاس كاسىپكەردىڭ باستاماسى ناتيجەلى بولدى. ول سونىمەن قاتار ءوز قاراجاتىنا قۇنى 18 ملن تەڭگەگە جۋىقتايتىن زاماناۋي ستانوكتار ساتىپ الادى.
الماتىدا جوعارى وقۋ ورنىن بىتىرگەن ەكونوميست-مەنەدجەر ايبولات ماحاي جيھاز جاساۋمەن اينالىسقان اكەسىنىڭ ءىسىن جالعاستىرسام دەپ شەشتى. بۇگىندە ايبولات ماحايدىڭ بيزنەسىن تابىستى ءارى تۇراقتى دەۋگە بولادى. كاسىپورىن جۇمىس ىستەگەن 10 جىلدان استام ۋاقىت ىشىندە جەرگىلىكتى تۇرعىندار مەن مەملەكەتتىك مەكەمەلەر اراسىندا تۇراقتى تۇتىنۋشىلارى قالىپتاستى. تۇراقتى ەڭبەك ۇجىمى قۇرىلدى, تاجىريبەلى شەبەرلەر كەلگەن جاس مامانداردى وقىتىپ, ۇيرەتۋدىڭ ارقاسىندا قاتارلارىن تولىقتىردى. بالپىق بي اۋىلىنداعى «ايبولات» جشس جيھاز تسەحى – قازىر وڭىردەگى ەڭ ءىرى تسەحتاردىڭ ءبىرى. ايىنا كەمىندە 10 تاپسىرىستى ورىندايدى.
«كومپيۋتەرمەن باسقارىلاتىن ارنايى قىتايلىق ماشينالار ساتىپ الۋدىڭ ارقاسىندا قازىر شەبەرحاناداعى قول ەڭبەگى 50 پايىزعا ازايدى. بىزدە وسىنداي 4 قۇرىلعى بار, ولاردىڭ قۇنى 2,5 مەن 8 ملن تەڭگەنىڭ ارالىعىندا. وسى قۇرىلعىلاردىڭ كومەگىمەن كەسەمىز, تەگىستەيمىز, پلەنكامەن قاپتايمىز, ورنەكتەر سالامىز. بوياۋ جۇمىستارى قولمەن اتقارىلادى. قۇرىلعىلاردىڭ ەڭ جاڭالارىنىڭ ءبىرى – بيىل ساتىپ العان تريممەر. قالعاندارىن 2013, 2015 جىلدارى ساتىپ الدىق. «دامۋ» قورى ارقىلى 7 جىلعا 14 پايىز نەسيە الدىم, ونىڭ 7 پايىزىن ءوزىم تولەيمىن, قالعانىن مەملەكەت سۋبسيديالايدى. بۇل ەداۋىر قولداۋ بولدى. بۇگىن ءبىز شكافتاردىڭ بارلىق ءتۇرىن, سونداي-اق ىشكى ەسىكتەر شىعارامىز. وندىرىسكە ارنالعان ماتەريالدار مەن فۋرنيتۋرانى الماتى قالاسىنان ساتىپ اكەلەمىز», دەيدى جيھاز تسەحىنىڭ ديرەكتورى ا.ماحاي.
ونىڭ ايتۋىنشا, بۇگىندە وندىرىسكە 4 ادام تارتىلعان, ونىڭ ەكەۋى – ناعىز شەبەر. جالاقىلارى 200 مىڭ تەڭگەدەن اسادى. ورىندالعان تاپسىرىستار سانىنا بايلانىستى شەبەرلەرگە نەگىزگى جالاقىعا قوسىمشا بونۋستار بەرىلەدى.
«كۇردەلىلىگىنە بايلانىستى ءبىر تاپسىرىستى ورىنداۋعا 7 كۇنگە دەيىن ۋاقىت كەتەدى. ەگەر بوياۋ قاجەت بولسا, وندا, ودان دا كوپ ۋاقىت جۇمسالادى. جالپى, بۇل سالادا 2005 جىلدان بەرى ءجۇرمىن. العاشىندا الماتىدا جۇمىس ىستەدىم, ول جاقتان كوپ نارسەنى ۇيرەندىم, كەيىن تۋعان جەرىمە ورالىپ, جەرلەستەرىمە كومەكتەسسەم دەپ شەشتىم. وسى تسەحتا جۇمىس ىستەپ جۇرگەنىمە 10 جىلعا جۋىقتادى. جۇمىس جاقسى ءجۇرىپ جاتىر. جەرگىلىكتى جاستارعا دا ماماندىعى مەن تۇراقتى تابىسى بولۋى ءۇشىن ۇيرەتۋگە تىرىسامىن», دەيدى تسەح شەبەرى سەرىك سمەت ۇلى.
كوكسۋلىق كاسىپكەر جيھاز تسەحىنىڭ ءونىمىن جەرگىلىكتى تۇرعىندارعا عانا ەمەس, تالدىقورعانعا دا ساتادى.
«ايبولات» جشس الداعى ۋاقىتتا تەندەرلەرگە قاتىسۋعا نيەتتى. كاسىپكەر ۇلكەن تاپسىرىستاردى ورىنداۋعا ءوزىنىڭ دە, كومانداسىنىڭ دا تاجىريبەسى, قۇرال-جابدىقتارى مەن مۇمكىندىكتەرى جەتەتىنىنە سەنىمدى.
ء«بىز جيھازدى ءار ساتىپ الۋشىنىڭ قالاۋى مەن مۇمكىندىكتەرىنە قاراي, ءارى ءتۇرلى موديفيكاتسيا مەن كونفيگۋراتسياعا سۇيەنە وتىرىپ جاسايمىز. كوبىنەسە كليەنتتەر وزدەرىنىڭ ينتەرەرىنە ساي ديزاين مەن تۇستەردى ۇسىنىپ جاتادى. ءبىز ولشەم جاساۋدان باستاپ دايىن ءونىمدى جەتكىزۋگە دەيىن تۇگەل باستان-اياق اتقارامىز. ءبىز ءوز تاۋارلارىمىزدىڭ ساپاسى مەن قىزمەت ەتۋ مەرزىمدەرىنە كەپىلدىك بەرەمىز», دەيدى جيھاز تسەحىنىڭ ديرەكتورى ايبولات ماحاي.
كوكسۋ اۋدانى اكىمدىگىنىڭ مالىمەتىنشە, اۋداندا 3 950 كاسىپكەر بار, ولار نەگىزىنەن اۋىل شارۋاشىلىعى, قىزمەت كورسەتۋ, تاماقتانۋ, جەڭىل ونەركاسىپ, تۋريزم سالالارىندا ەڭبەك ەتەدى. 2023 جىلدىڭ قاڭتار-تامىز ايلارىندا جەتىسۋ وبلىسىندا جۇمىس ىستەپ تۇرعان شوب سۋبەكتىلەرىنىڭ سانى 59,7 مىڭ بىرلىككە جەتكەن. ءونىم مەن كورسەتىلگەن قىزمەت كولەمى 133 ملرد تەڭگەدەن استى. بۇل رەتتە 2023 جىلعى قاڭتار-تامىزدا بيۋدجەتكە سالىق تۇسىمدەرى 2022 جىلدىڭ وسىنداي كەزەڭىمەن سالىستىرعاندا 46,7 پايىزعا ۇلعايىپ, 27,7 ملرد تەڭگەنى قۇراعان. بۇل رەتتە تالدىقورعان قالاسى مەن 7 اۋدان وڭ ءوسىم كورسەتسە, سونىڭ ىشىندە كوكسۋ اۋدانى بۇل كورسەتكىشتى 2,4 ەسەگە ۇلعايتقان.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, 2023 جىلعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا جەتىسۋ وبلىسىنا 6,8 ملرد تەڭگە ءبولىندى, جالپى كرەديتتىك سوماسى 15 ملرد تەڭگەگە 335 جوبا ماقۇلداندى.
جەتىسۋ وبلىسى