قوستاناي وبلىستىق تاريحي-ولكەتانۋ مۋزەيىندە 1916 جىلعى تورعايداعى ۇلت-ازاتتىق كوتەرىلىسىنىڭ قاھارمانى امانگەلدى يمانوۆتىڭ دومبىراسى ساقتالعان. جالپى, جۇرتشىلىق امانگەلدىنى الدىمەن باتىر دەپ بىلەدى. ال ونىڭ ولەڭ شىعارىپ, دومبىرا تارتقانىنان بەيحابار. شىندىعىنا كەلگەندە, حالىق باتىرى سەگىز قىرلى, ءبىر سىرلى تۇلعا بولعان.
جوعارىدا اتالعان مۋزەي ديرەكتورىنىڭ ورىنباسارى ەلميرا الشىموۆا بۇل جادىگەردىڭ امانگەلدى يمانوۆقا تيەسىلى ەكەنىن مۇراجايدىڭ ءتۇسىم كىتابىنداعى 1964 جىلى 21 تامىزداعى جازبا راستايتىنىن جەتكىزدى.
باتىر دومبىراسى – ناعىز شەبەردىڭ قولىنان شىققان ءمىنسىز دۇنيە دەۋگە بولادى. ونى ەلىمىزدىڭ باتىس ايماعىندا قولدانىلاتىن ۇلگىدە جاساعان. 14 پەرنەلى, شاناعىنىڭ كولەمى سوپاقشا. اسپاپتىڭ قاپتالى, بەتى, سىرتقى ساۋىر ءدۇمى جەكە-جەكە شابىلىپ, شەبەرلىكپەن جىمداستىرا قۇراستىرىلعان. دومبىرانىڭ سىرتى سۇيەكپەن كومكەرىلگەن. جاسالعان ۋاقىتى: ءحىح عاسىردىڭ سوڭى مەن حح عاسىردىڭ باسىنا سايكەسەدى.
جۋرناليست تولقىن سۇلتانقىزى باتىر اتاسىنىڭ ونەردەن قاراجاياۋ بولماعانىن ايتادى. باس سارداردىڭ تۋعان باۋىرى ەسەنتاي سىرنايدى كەرەمەت تارتقان. «بالا كۇنىمدە اقسارى اجەم ەسەنتاي اتامدى باتىر قايناعاما تارتقان ونەرلى دەپ وتىراتىنىن ەستىپ ەدىم», دەدى ول.