وتباسىنداعى قۇندىلىقتاردى جاڭعىرتۋعا, ەرلى-زايىپتىلاردىڭ ونەگەلى ءومىرىن ناسيحاتتاۋعا, شىعارماشىلىعىن شىڭداۋعا باعىتتالعان «مەرەيلى وتباسى» بايقاۋى بيىل دا ءوز جالعاسىن تاپتى. تالدىقورعان قالاسىنداعى سالتانات سارايىندا وتكەن مەرەكەلىك جيىندا بىرقاتار وتباسىنىڭ مەرەيى ءوستى.
قاسيەتتى قۇندىلىعىمىزدىڭ قاراشىعىنداي بولعان ءداستۇرىمىزدى دارىپتەپ, اتا-اناسىن ارداقتاپ, ءومىردىڭ ءار سالاسىندا ءوزىن كورسەتە بىلگەن وتباسىلار بارشىلىق. ولاردىڭ جارقىن ءىسى جالعاسىن تاۋىپ, كەيىنگىگە ونەگە بولۋى كەرەك. وسى نەگىزدە 10 جىل بۇرىن باستاۋ العان بايقاۋ بۇگىنگە دەيىن تالاي شاڭىراقتى شاتتىققا بولەدى. بۇگىن دە سونىڭ جارقىن ۇلگىسىن كورە بىلدىك.
«مەرەيلى وتباسى» ۇلتتىق بايقاۋى جەڭىمپازدارىن ماراپاتتاۋ سالتاناتىنىڭ العاشقى ءسوزى وبلىستىق ءماسليحاتتىڭ ءتورايىمى گۇلنار تويلىباەۆاعا بەرىلدى.
– وتباسىلىق قۇندىلىق وتانىمىز ءۇشىن ارقاشاندا قىمبات. ءاربىر وتباسىنىڭ باقىتى – ەلىمىزدىڭ باقىتى. سول ءۇشىن قانشاما اتا-انا ەڭبەك ەتىپ كەلەدى. بابالارىمىزدىڭ «بالا بەر, بالا بەرسەڭ, سانا بەر..» دەگەن قاناتتى ءسوزى ءار وتباسى ءۇشىن ۇران بولىپ قالا بەرمەك. ءاربىر وتباسىندا جاراسىمدى تىرلىك, جۇبايلاردىڭ ءبىر-بىرىنە دەگەن ىزگى ماحابباتى, بالانىڭ كۇلكىسى بولۋى كەرەك. «ۇيلەنۋ وڭاي, ءۇي بولۋ قيىن» دەگەن دانا قازاقتىڭ ءسوزىن ەسكە الا وتىرىپ, ءبىز شاڭىراعىن كەشە عانا قۇرعان جاس وتباسىلارعا ۇلگى-ونەگە كورسەتۋىمىز كەرەك, – دەگەن گ.تويلىباەۆا بايقاۋدا جۇلدە العان جانداردى ماراپاتتادى.
ۇلتتىق بايقاۋدىڭ شارتى بويىنشا جۇزدەن جۇيرىك شىققان سارقاندىق مولداباەۆ پەن تالدىقورعاندىق ەركىنبەك اۋلەتى جۇلدەلى 3-ورىن يەگەرى اتاندى. 2-ورىنمەن قاراتالدىق ءامىروۆ جانە پانفيلوۆ اۋدانىنىڭ كەرىمبەكوۆ اۋلەتى ماراپاتتالدى. قوعامداعى بەلسەندىلىگىمەن توپ جارىپ, العا شىققان الاكولدىك قايرانوۆ شاڭىراعى جەڭىمپاز اتانىپ, 1 ملن تەڭگە اقشالاي سىيلىق الدى.
ونەگەلى وتباسىلار ماراپاتتالعاننان كەيىن ءان شىرقالىپ, كۇمبىرلەگەن كۇي توگىلدى. جەتىسۋ جۇرتشىلىعىنا تانىمال ونەرپازدار ءان ايتىپ, كورەرمەن ىقىلاسىنا بولەندى.
جەتىسۋ وبلىسى