بالالارعا ارنالعان ادەبي ەڭبەكتەر, تانىمدىق جيناقتار قاشاندا ۇلت ءۇشىن ۇلكەن مۇرا. سەبەبى زامان اعىمى ءبىز ويلاماعان كەڭىستىككە باعىت تۇزەپ بارادى. ەندەشە, كەز كەلگەن رۋحاني كىتاپ ساۋ اقىلدىڭ بويتۇمارى. مۇنى «تاۋەلسىزدىك الىپپەسى» ءالىپبيىن قاراپ تا ايتۋعا بولادى.
اتالعان ەڭبەكتىڭ اۆتورى – ءانۋار قابدولدا ۇلى. ول ۇرپاقتىڭ قارا تانىپ, ساۋاتىن اشۋىنا ۇلەس قوسىپ جۇرگەن جانداردىڭ ءبىرى. جاقىندا «تاۋەلسىزدىك الىپپەسى» اتتى بالالارعا ارنالعان ءالىپبيدى جاڭاشا فورماتتا جاساپ شىعىپ, قازىرگى ۋاقىتتا سونى ناسيحاتتاۋمەن اينالىسىپ ءجۇر. ايتۋىنشا, بۇل نۇسقانى جاساۋعا 8 جىلىن سارپ ەتىپتى. ونىڭ ءىسىن رەسپۋبليكاداعى بەلگىلى پەداگوگتەر قولداپ, الىپبيگە وڭ كوزقاراس تانىتقانىن ايتادى.
اۆتوردىڭ «تاۋەلسىزدىك الىپپەسىن» شىعارۋداعى باستى ماقساتى مەكتەپكە دەيىنگى بۇلدىرشىندەردىڭ تاۋەلسىزدىك قۇندىلىقتارىنان ءتالىم الىپ وسۋىنە جول اشۋ. سونىمەن قاتار ولاردىڭ تانىم قابىلەتتەرىنىڭ كەڭەيۋىنە سەپتىگىن تيگىزەدى دەگەن سەنىمدە.
اتالعان الىپپەنىڭ تۇساۋكەسەرى تالدىقورعانداعى №42 بالاباقشادا ۇيىمداستىرىلدى. ءىس-شاراعا شاھارداعى بالاباقشا قىزمەتكەرلەرى قاتىسىپ, سالتاناتتى جيىننىڭ كۋاگەرى بولدى. جيىندا وبلىستىق وقۋ-ادىستەمەلىك دامىتۋ ورتالىعىنىڭ مەكتەپكە دەيىنگى مەكەمە ءبولىمىنىڭ ادىسكەرى ماقپال اسقارقىزى ءسوز الىپ, لەبىزىن ءبىلدىردى.
ايتا كەتەيىك, الىپبيدە 29 ءارىپ كورسەتىلگەن. ول جەردەن قازاقى ناقىشتاعى بەينەلەردى اڭعارۋعا بولادى. بۇلدىرشىندەردىڭ تەز ءتۇيسىنۋى ءۇشىن ونداعى سۋرەتتەر ايرىقشا قانىق بوياۋلارمەن ارلەنگەن.
ءىس-شارا بارىسىندا بالاباقشا شاكىرتتەرى كونتسەرتتىك قويىلىم قويدى. ءان شىرقاپ, بي بيلەدى. جاڭا الىپبيدەگى ارىپتەردى حورمەن اۋەندەتە شىرقاپ, جيىنعا قاتىسۋشىلارعا كوتەرىڭكى كوڭىل كۇي سىيلادى.
جەتىسۋ وبلىسى