«Egemen TV» Youtube ارناسىنا قازاقتىڭ تۇڭعىش بارد ءانشىسى تابىلدى دوسىموۆتىڭ ۇلى ابىل تابىلدى ۇلى سۇحبات بەرىپ, اكەسىنە قاتىستى ەستەلىكتەرىن ءبولىستى, دەپ حابارلايدى Egemen.kz.
ابىل تابىلدى ۇلىنىڭ ايتۋىنشا, ونىڭ ونەرگە كەلۋىنە اكەسى سەبەپ بولعان. اكەسىنىڭ ارتىندا قالعان مۇراسىن جاڭعىرتىپ, ونى ناسيحاتتاۋ ءۇشىن مۋزىكانى تاڭداعان ابىل بولاشاقتاعى جوسپارلارى جايلى ايتتى.
«اكەمنىڭ كوزى تىرىسىندە دە اندەرىن ورىنداپ, وڭدەپ ساحناعا شىققان كەزدەرىمىز بولدى. اكەمىز ومىردەن وتكەننەن كەيىن «تابىلدى دوسىموۆ» اتىنداعى قوعامدىق قور قۇرىلدى. ونى بەكجان قالماعامبەتوۆ ەسىمدى اكەمنىڭ دوسى باسقارادى. 13 جىلدان بەرى جىر كەشتەرى مەن ءان كەشتەرىن وتكىزىپ كەلە جاتىرمىز. البومدارىن, كىتاپتارىن پوەزيا كىتاپتارىن جارىققا شىعاردىق. ونىڭ اندەرىن ناسيحاتتاۋ بارىسىندا تەك قازاقستاندا عانا ەمەس, قوردىڭ قولداۋىمەن شەتەلدە دە ءان كەشتەرىن وتكىزدىك. مىسالى, قىتايداعى, ماسكەۋدەگى, موڭعولياداعى قازاقتارعا ارناپ ءان كەشتەرى وتكىزىلدى. وسىنداي كەشتەردى الداعى ۋاقىتتا دا ۇيىمداستىرۋ جوسپاردا بار. بيىلعى جىلدىڭ سوڭىنا دەيىن اكەم جازعان البومنىڭ تۇساۋكەسەرى بولادى. شىقپاي قالعان جۇرت بىلە بەرمەيتىن جەتى ءانىن تىڭدارمان نازارىنا ۇسىناتىن بولامىز», دەدى ابىل تابىلدى ۇلى.
سۇحبات بارىسىندا ابىل تابىلدى ۇلى ءسوزدىڭ قۇدىرەتىنە دە توقتالىپ ءوتتى.
«اكەمنىڭ 21 جاسىندا «ۇيىقتاپ كەتسەم ءبىر كۇنى, ويانباي قالام» دەگەن ءانى جارىققا شىعىپ ەدى. شىندىعىندا 45 جاسىندا ۇيىقتاپ كەتىپ ويانباي قالدى. مۇمكىن تاعدىرى شىعار, مۇمكىن ءسوزدىڭ كيەسى شىعار. مۇنداي ونەر ادامىنىڭ بولاشاقتى بولجاي الۋى دا زاڭدىلىق شىعار», دەپ ويىن تۇيىندەدى ابىل.