اۋليەاتادا ءتۋريزمدى دامىتۋ ماقساتىندا اۋقىمدى جۇمىستار اتقارىلىپ جاتىر. ناقتىراق ايتار بولساق, تاراز قالاسىنداعى «زەربۇلاق» كولىنىڭ ماڭى ادام تانىماستاي وزگەردى. ءبىر كەزدەرى جۇرت «بۇل «زەربۇلاق» ەمەس, «زاربۇلاق» بولىپ بارا جاتىر» دەپ شامدانعان كول ماڭىنان ورتالىق ازياداعى ەڭ ءىرى اكۆاپاركتىڭ ءبىرى اشىلدى.
جالپى قۇنى 1,2 ميلليارد تەڭگەنى قۇرايتىن دەمالىس ورتالىعى 1,9 گەكتار اۋماقتى الىپ جاتىر. مۇندا ءبىر مەزەتتە 2000 ادام دەمالاتىن مۇمكىندىك بار. دەمالىس ايماعىنداعى تولقىندى باسسەيندەر مەن ءتۇرلى اتكەنشەك بۇرىنعى «زەربۇلاقتىڭ» اجارىن اشا تۇسكەن.
«South Holiday» جشس-نىڭ باس ديرەكتورى ءارى كەشەن باسشىسى ايبەك ورشىبەكوۆتىڭ ايتۋىنشا, دەمالىس ايماعىنا كۇنىنە 4 000 ادام كەلەدى دەپ جوسپارلانعان. ال تارازعا تابان تىرەگەن مەيماندار بيلەتتى «ZER» ءموبيلدى قوسىمشاسى ارقىلى دا الا الادى. بيلەتتەر ۇلكەندەرگە بەس مىڭ تەڭگەدەن ساۋدالانسا, 2-13 جاس ارالىعىنداعى بالالارعا ءتورت مىڭ تەڭگە.
«تۋعان جەردى تۇلەتۋ – ءاربىرىمىزدىڭ پارىزىمىز. سوندىقتان دا ينۆەستيتسيا قۇيىپ, «زەربۇلاق» اكۆاپاركىن اشتىق. بۇل – ءۇش ينۆەستوردىڭ تۋعان جەرگە دەگەن سىيى. تولقىن تەربەلىسى بار, سىرعاناۋعا ارنالعان جانە درەناجدى باسسەيندەر قويدىق. جيىرما شاقتى ادام جۇمىسپەن قامتىلىپ وتىر. ارا-تۇرا جەتىم جانە مۇمكىندىگى شەكتەۋلى بالالارعا, كوپبالالى وتباسىلارعا جەڭىلدىك قاراستىرىپ تۇرامىز», دەيدى ا.ورشىبەكوۆ.
تاراز