ۇلىستىڭ ۇلى كۇنى قارساڭىندا قىزىلوردا قالاسىنىڭ سول جاعالاۋىندا بوي كوتەرگەن 40 پاتەرلى تۇرعىن ءۇي باسپاناسى اپاتتى دەپ تانىلعان تۇرعىندارعا بەرىلدى. وسىعان وراي وتكەن سالتاناتتى شارادا وبلىس اكىمى نۇرلىبەك نالىباەۆ كەيىنگى جىلدارى سىر وڭىرىندە تۇرعىن ءۇي قۇرىلىسى ايتارلىقتاي دامىپ, قالا اۋماعى الدەقايدا ۇلعايعانىن اتاپ ءوتتى.
بيىل وبلىس ورتالىعىن كوركەيتۋگە قوماقتى قاراجات ءبولىنىپ وتىر. بەيبارىس سۇلتان كوشەسىنىڭ نازارباەۆ داڭعىلىنان قىزىلوردا – قۇمكول تاسجولىنا دەيىنگى بولىگى كەڭەيىپ, اباتتاندىرىلادى. «قازاقستان تەمىر جولى» باسشىلىعى تەمىرجول ۆوكزالى عيماراتى مەن پەرروندى جاڭعىرتۋعا قاراجات بولمەك. جىل اياعىنا دەيىن سىرداريانىڭ سول جاعالاۋىنان ينۆەستور قارجىسىنا اۆتوۆوكزال سالۋ جوسپارلانۋدا.
– «قازگەرمۇناي» كومپانياسى باسشىلىعىمەن كەلىسىم ناتيجەسىندە قالادا زاماناۋي ۇلگىدەگى وقۋشىلار سارايىنىڭ جوباسى باستالادى. قۇنى 1,6 ملرد تەڭگە بولاتىن نەكە سارايى شىلدە ايىندا پايدالانۋعا بەرىلمەك. ال قۇرىلىسى بىلتىر باستالعان ونەر ورتالىعى جەلتوقسان ايىندا, سول جاعالاۋداعى قان ورتالىعى 2024 جىلى ەل يگىلىگىنە تابىستالادى, دەدى ايماق باسشىسى.
قونىس توي يەلەرىنىڭ اتىنان زەينەتكەر ءاليما ابىشەۆا العىس ءبىلدىرىپ, جينالعانداردى ناۋرىز مەرەكەسىمەن قۇتتىقتادى. بيىل قارجىلاندىرۋدىڭ بارلىق كوزى ەسەبىنەن 692 مىڭ شارشى مەتر تۇرعىن ءۇي پايدالانۋعا بەرىلمەك.
قىزىلوردا