سىر ديقاندارى ەگىس ناۋقانىنا دايىندىقتىڭ قامىنا كىرىسىپ كەتتى. ساناۋلى كۇندەردەن كەيىن ۆەگەتاتسيا كەزەڭىندەگى سۋ ءليميتى انىقتالىپ, سوعان سايكەس ەگىس كولەمى ناقتىلانادى. الدىن الا جاسالعان جوسپار بويىنشا بيىل 195,6 مىڭ گەكتارعا اۋىل شارۋاشىلىعى داقىلدارى ەگىلمەك. مۇنىڭ ىشىندەگى كۇرiش كولەمى – 83,9 مىڭ گەكتار. قالعانى ءداندi, مايلى, مال ازىقتىق داقىلدار. سونداي-اق قانت قىزىلشاسى, كارتوپ, كوكونiس ەگىلەدى.
جوسپار بويىنشا بىلتىرمەن سالىستىرعاندا ەگىس – 7000, مال ازىقتىق داقىلدار سەبىلەر القاپ – 2,3 مىڭ, كارتوپ, كوكونىس, باقشا كولەمى 222 گەكتارعا ۇلعايتىلماق. ودان بولەك, ازىق-ت ۇلىك قاۋىپسىزدىگىن قامتاماسىز ەتۋ ءۇشىن جەرگىلىكتى تۇرعىنداردىڭ كارتوپ, كوكونىس, باقشا ونىمدەرىن ەگۋىنە 3 مىڭ گەكتار جەر دايىندالادى.
بىراق جىلدان-جىلعا قيىنداپ كەلە جاتقان سۋ تاپشىلىعى «ۇيدەگى كوڭىلدى بازارداعى باعا بۇزادىنىڭ» كەرىن كەلتىرىپ وتىر. 2022 جىلمەن سالىستىرعاندا الحامشۇكىر, «شاردارا» سۋ قويماسى مەن «كوكساراي» سۋ رەتتەگىشىندە وسى كۇنى 6,6 ملرد تەكشە مەتر سۋ جينالىپ تۇر. بۇل وتكەن جىلدىڭ وسى كەزەڭىندەگى كولەمنەن 2,3 ملرد تەكشە مەترگە ارتىق.
«قازىر «شاردارا» سۋ قويماسىنا جوعارىدان 1000 تەكشە مەتر سۋ ءتۇسىپ تۇر. بىراق بۇل جاز بويى وسىلاي بولا بەرەدى دەگەن ءسوز ەمەس. سوندىقتان ۇنەمدى پايدالانۋعا تىرىسامىز. وسى جىلى جاڭبىرلاتىپ, تامشىلاتىپ سۋارۋ ارقىلى 1,5 مىڭ گەكتارعا اۋىل شارۋاشىلىعى داقىلدارىن ەگۋ جوسپاردا بار. بىلتىرعى ۆەگەتاتسيالىق كەزەڭدە 17,7 مىڭ گەكتار كۇرىشكە سۋ جەتكىزۋ وڭاي بولعان جوق. اسىرەسە سۋ دەڭگەيىنەن بيىك 8 800 گەكتار القاپقا بيىل دا كۇرىش سەبىلسە, شارۋاشىلىقتار قوسىمشا 102 ناسوس قويۋى قاجەت», دەيدى وبلىستىق اۋىل شارۋاشىلىعى جانە جەر قاتىناستارى باسقارماسى باسشىسىنىڭ ورىنباسارى قايراتبەك سارسەنباەۆ.
كۇرىش, باسقا دا داقىلدار تۇقىمىنان تاپشىلىق جوق. جالپى, كوكتەمگى ناۋقانعا 19,8 ملرد تەڭگە قاجەت. بۇل قارجىنىڭ دەنى ينۆەستورلار مەن شارۋا قوجالىقتارى ەسەبىنەن جۇمسالادى.
بىلتىر كوكتەمگى ناۋقاندا مينەرالدى تىڭايتقىش تا تاپتىرماي, باعاسى اسپانداپ كەتكەن ەدى. بيىل قاجەتتى 61,2 مىڭ توننانىڭ 53,2 پايىزى جەتكىزىلدى. باسقارما ايماققا قاجەتتى مينەرالدىق تىڭايتقىشتىڭ ايلار بولىنىسىندەگى كەستەسىن جاساپ, «قازفوسفات», «قازازوت» زاۋىتتارىنا جولدادى. باسقارما مالىمەتىنشە, قازىر «جان-اراي» جشس قويماسىندا 670 توننا «امموفوس» تىڭايتقىشى بار. ەگىس ناۋقانىنا قاجەتتى 3979 تەحنيكانىڭ 75 پايىزى جوندەۋدەن وتكەن.
كوكتەمگى دالا جۇمىستارى ءۇشىن 12,1 مىڭ توننا ارزانداتىلعان ديزەل وتىنى قاراستىرىلىپ وتىر. جەرگىلىكتى وپەراتورلار ارقىلى اقپان ايىنا بەلگىلەنگەن 7,5 مىڭ توننانىڭ قارجىسى تولىق تولەندى.
ەگىستى ءارتاراپتاندىرۋ باعىتىنداعى باستاما اياسىندا بيىل كارتوپ, كوكونىس, باقشا كولەمىن 222 گەكتارعا ۇلعايتۋ كوزدەلىپ وتىر. باسقارما باسشىسىنىڭ ورىنباسارى وسى ءونىمدى وتكىزۋ جولدارى دا قاراستىرىلىپ وتىرعانىن جەتكىزدى.
«بۇل ونىمدەردى وندىرىستىك ماقساتتا ەككەن جاعدايدا سۋبسيديا ماسەلەسىن قوزعاۋىمىزعا بولادى. ال ازىرگە ءبىز ساتىپ الۋ جونىندە «بايقوڭىر» اكك» اق-مەن كەلىسىم جاساپ جاتىرمىز. وسىعان دەيىن شيەلى اۋدانىنداعى بەستام, جاقاەۆ, بوتاباي اۋىلدارى, سىرداريا اۋدانىنداعى بەسارىق ەلدى مەكەندەرى گەكتارلاپ كارتوپ ەگىپ كەلگەن. بەينەتتەنىپ ەككەنىڭنەن بازارداعى ارزان بولعان سوڭ, بۇل كاسىپتى توقتاتقاندار نارىقتاعى باعا كوتەرىلگەن سوڭ, قايتا باستاۋعا نيەتتەنىپ وتىر», دەيدى ول.
قىزىلوردا