قازاق ەسترادا ونەرىنە تىڭ سەرپىن بەرىپ, شابىتتاندىرعان شىعارماشىلىق ۇجىم تۋرالى ايتپاي كەتۋ مۇمكىن ەمەس. ۇلتتىق ناقىشتاعى مۋزىكالىق تۋىندىلارمەن ساحنا تورىنە جول تارتقان «گۇلدەر» ەلىمىزدىڭ بەتكە ۇستار انسامبلدەرىنىڭ ءبىرى بولدى. ونەرپازدار قىتاي, ءۇندىستان, گەرمانيا, جاپونيا, كۋبا, بولگاريا, موڭعوليا, يزرايل, وڭتۇستىك-شىعىس ازيا مەملەكەتتەرىنە گاسترولدىك ساپارلارعا شىعىپ, ەسترادالىق-مۋزىكالىق رەۆيۋ باعىتىنداعى كونتسەرتتىك باعدارلامالاردى كورەرمەن نازارىنا ۇسىندى.
الپىسىنشى جىلداردىڭ اياعىندا قۇرىلعان انسامبل العاشىندا 71 ادامنان تۇردى. سارا تىنىشتىعۇلوۆا, روزا رىمباەۆا, قاپاش ق ۇلىشەۆا, قايرات بايبوسىنوۆ, ايجان نۇرماعامبەتوۆا, ماقپال ءجۇنىسوۆا, ناعيما ەسقاليەۆا, مايرا نۇركەنوۆا, سەمبەك جۇماعاليەۆ, جەڭىس ىسقاقوۆا, باقىت شاداەۆا جانە باسقا دا تالانتتار ونەر جولىن وسى انسامبلدەن باستادى. بۇگىندە ولار تالعامى بيىك مادەنيەت قايراتكەرلەرىنە اينالدى.
سودان بەرى قانشاما جىلدار ءوتتى. جاڭا عاسىرعا ساي قازاق ونەرى مەن مادەنيەتىنە جاڭا جۇلدىزدار لەگى قوسىلىپ جاتىر. الايدا تاريحي برەندىمىز بولىپ كەلگەن انسامبل بەلگىلى ءبىر سەبەپتەرمەن ءوز جۇمىسىن توقتاتۋعا ءماجبۇر بولعانىن بىلەمىز. تالاي مارتە ونەردىڭ بيىك شىڭىنا كوتەرىلگەن مادەنيەت تارلاندارى ونەر وشاعىنان ايىرىلۋعا شاق قالدى. دەگەنمەن بىلتىر مەملەكەت تاراپىنان قولداۋ كورسەتىلىپ, «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى «گۇلدەر» ءانسامبلىنىڭ شىعارماشىلىق ۇجىمىن قايتا قۇرۋ جۇمىستارىن قولعا العان ەدى. بۇل ماقساتتا ۇجىمعا شىعارماشىلىق وقۋ ورىندارىنىڭ تۇلەكتەرى الىندى. تاجىريبەلى تالىمگەرلەر – باس بالەتمەيستەر انۆارا سادىقوۆا جانە جوبانىڭ كوركەمدىك جەتەكشىسى ءارى ديريجەرى سەرىك داۋلەتوۆ شاقىرىلدى.
جاز ايلارىندا ءانسامبلدىڭ قۇرامىنا ونەرپازداردى قابىلداۋ ءۇشىن س.داۋلەتوۆ, ا.سادىقوۆا, حورەوگراف ا.شامشيەۆ ەلىمىزدىڭ بىرقاتار قالاسىندا كاستينگ جۇرگىزدى. سودان كەيىن-اق ۇجىمنىڭ جاڭاشا باعىتتاعى قىزۋ دايىندىق جۇمىسى باستالىپ كەتتى. «گۇلدەر» ءانسامبلىنىڭ بۇرىنعى قۇرامىندا ونەر كورسەتكەن تالانتتى انشىلەر مەن كاسىبي بيشىلەر ارنايى شاقىرىلىپ, ءانسامبلدىڭ رەپەرتۋارى جاڭا مۋزىكالىق شىعارمالارمەن جاڭارتىلدى.
اڭىزعا اينالعان ءانسامبلدىڭ اتىن شىعارعان «بيپىل» (حورەوگراف د.قياقوۆا), «اساتاياق» (حورەوگراف ز.رايباەۆ), «مالايزيا ءبيى» (حورەوگراف گ.يزمايلوۆا) جانە باسقا دا بيلەر حورەوگراف تاتيانا ءاۋتاليپوۆتىڭ قاتىسۋىمەن جۇرگىزىلىپ جاتىر. ال جاڭا حورەوگرافيالىق كومپوزيتسيالاردى گۇلنار سايتوۆا, كارينا حايتماتوۆا, گۇلدەن فاتكۋللا, ەۆگەني مويسەەۆ, كارينا جيرەنباەۆا, ءمولدىر نىعىمەت سىندى حورەوگرافتار قويدى. قازىر جاڭا انسامبلدە 15 ءبيشى مەن 9 مۋزىكانت بار.
ونەر ۇجىمى الەمنىڭ كوپتەگەن ەلىندە ونەر كورسەتىپ, تانىمال بولعانى بەلگىلى. روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ باستى جاڭالىقتارىنىڭ ءبىرى وسى ءانسامبلدى قايتادان جاڭا قۇراممەن كورەرمەنگە تانىستىرۋ بولىپ وتىر. سول سەبەپتى, كوكتەمنىڭ العاشقى كۇنى «گۇلدەر» ءان-بي ءانسامبلىنىڭ تۇساۋكەسەر كونتسەرتىن وتكىزۋدى جوسپارلاپ وتىرمىز. ايتا كەتەتىن جايت, ءانسامبلدىڭ ۆيدەوقۇجاتتارى ساقتالعانىمەن, ارحيۆتىك قۇجاتتاردى اقتارىپ وتىرىپ, سول كەزدەگى قازاق بي ونەرىندە قولدانىلعان قيمىل-قوزعالىستارى مەن بي تۇرلەرىنە قاتىستى قۇندى مالىمەتتەردى تابا المادىق. سوندىقتان ءانسامبلدىڭ باسى-قاسىندا جۇرگەن شىعارماشىلىق توپقا وسى باعىتتا دا كوپ ەڭبەك ەتۋگە تۋرا كەلدى.
حالىق ءارتىسى سارا تىنىشتىعۇلوۆا اپايىمىز انسامبل تۋرالى: «مەنىڭ ەسىمدە قالعانى انسامبل ءبىر جارىم جىل ىشىندە ءۇش جۇزگە جۋىق كونتسەرتتىڭ 70-تەن استامىن اۋىلدىق جەرلەردە بەرگەن. جاقىندا 1 ناۋرىزدا «قازاقكونتسەرت» ۇجىمى «گۇلدەر» ءانسامبلىن جاڭا قۇرامدا تانىستىرۋ ءۇشىن ارنايى مەرەكەلىك كونتسەرت ۇيىمداستىرعالى جاتىر ەكەن. ۇجىمنىڭ باسشىلىعىنا جانە جاڭا ءانسامبلدىڭ الداعى جۇمىستارىنا ساتتىلىك تىلەيمىن. انسامبل وركەندەسىن, كوركەيسىن, حالىقتىڭ ىقىلاسىنا بولەنسىن», دەگەن ەدى.
جاڭا قۇرامدا جاساقتالعان ءانسامبلدىڭ الداعى تۇساۋكەسەر كونتسەرتىنە بارشا ونەرسۇيەر قاۋىمدى شاقىرامىز. ءساتىن سالسا, «گۇلدەر» ءانسامبلى ەلىمىزدىڭ تۇكپىر-تۇكپىرىنە گاسترولدىك ساپارلارعا شىعىپ, شىعارماشىلىق كونتسەرتتەرىن وتكىزەتىن بولادى.
اقتوتى رايىمقۇلوۆا,
روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى