ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا استانا قالاسى تىلدەردى دامىتۋ باسقارماسىنىڭ ۇيىمداستىرۋىمەن «ءتىل ونەرى جانە تۇلعا» اتتى ءىس-شارا ءوتتى. ونداعى ماقسات – كورنەكتى جازۋشى, مەملەكەتتىك سىيلىقتىڭ لاۋرەاتى ساكەن ءجۇنىسوۆتىڭ شىعارماشىلىعىن ناسيحاتتاۋ, قازاق مادەنيەتىنە, ءتىلى مەن ادەبيەتىنە دەگەن جاستاردىڭ ىقىلاسىن ارتتىرۋ.
«جاپانداعى جالعىز ءۇي», «اقان سەرى», «زاماناي مەن اماناي» روماندارى, سونداي-اق, «اجار مەن اجال», «ءار ءۇيدىڭ ەركەسى», «قىسىلعاننان قىز بولدىق», «جارالى گۇلدەر», «قىزىم, ساعان ايتام», «قوس انار», «ءولىارا» درامالارى ارقىلى قالىڭ قازاققا تانىمال بولعان جازۋشىنىڭ شىعارماشىلىق جولىن, قول جەتكىزگەن تابىستارىن, مەجەلەگەن بەلەستەرىن وسكەلەڭ ۇرپاققا ۇلىقتاۋعا ارنالعان ءىس-شارانى فيلولوگيا عىلىمدارىنىڭ دوكتورى, پروفەسسور, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەك ۇلى جۇرگىزدى. تەاتر شاڭىراعىندا زيالى قاۋىم وكىلدەرى, اقىن-جازۋشىلار, قوعام قايراتكەرلەرى دارىن يەسى تۋرالى ەستەلىكتەر ايتىپ, ونىڭ كەلەر ۇرپاققا مۇرا ەتىپ قالدىرعان شىعارمالارى توڭىرەگىندە وي ءبولىستى.
حالىقارالىق «الاش» ادەبي سىيلىعىنىڭ لاۋرەاتى, اقىن سەرىك تۇرعىنبەك ۇلى ءومىر جولىنىڭ قالامگەرمەن توعىسقان تۇستارىندا رۋحاني دوستىقتارىنىڭ باۋىرمالدىققا ۇلاسقانىن ايتا كەلە, قالامگەردىڭ اقتىق دەمى تاۋسىلعانشا ادەمىلىككە قۇشتار بولعانىن, ۇلتجاندى ازامات, ءور رۋحتى وجەت ءبىتىمدى تۇلعا ەكەندىگىن اتاپ, «ساعىندىم سەرى اعانى» اتتى جازۋشىعا ارنالعان ولەڭىن وقىپ بەردى. ال شارانىڭ ۇيىمداستىرىلۋىنا مۇرىندىق بولعان استانا قالاسى تىلدەردى دامىتۋ باسقارماسى «رۋحانيات» ورتالىعىنىڭ ديرەكتورى ەربول تىلەشوۆ قالامگەردىڭ كوزى تىرىسىندە دە جوعارى دارەجەگە يە بولعانىن ايتا كەلىپ, جازۋشىعا دەگەن قۇرمەت كۇشىنىڭ قازىرگى تاڭدا دا السىرەمەگەنىن, سەبەبى, ارتىنان ەرگەن ۇرپاقتارى دارىن يەسىنىڭ ەسىمىن ولتىرمەي ماڭگىگە ساقتاپ قالاتىنىنا سەنىمىن ءبىلدىردى.
ءىس-شارانىڭ كەلەسى ءبىر ءبولىگىندە ساكەن ءجۇنىسوۆتىڭ «قىسىلعاننان قىز بولدىق» دراماسى تەاتر ارتىستەرىنىڭ ساحنالاۋىندا كورىنىس تاپتى. اكتەر ەربولات جاسۇلان, ەسەن نۇرسۇلتان جانە بورانباي مولداباەۆ كومەديالىق رولدەرىن شەبەر سومداپ, كورەرمەندەردى وتكەن كۇننىڭ مۇڭلى ەستەلىگىنەن ارىلتىپ, قىران-توپان كۇلكىگە كەنەلتتى. سونداي-اق, شارادا قايرات بايبوسىنوۆ, ەرلان رىسقالي سىندى ەلگە تانىمال انشىلەر «اقان سەرى-اقتوتى», «رايحانگۇل», «بالقاديشا», «ماڭماڭگەر», «قۇلاگەر» جانە باسقا دا سىرلى دا سازدى اندەردى ورىنداپ, جينالعان قاۋىمعا تاماشا اسەر سىيلادى.
زيالى قاۋىم, باق وكىلدەرى, سوعىس جانە ەڭبەك ارداگەرلەرى, ءتىل جاناشىرلارى, جوعارى جانە ارناۋلى ورتا وقۋ ورىندارىنىڭ وقىتۋشىلارى, ستۋدەنتتەر مەن مەكتەپ وقۋشىلارى قاتىسقان يگى شارادا قالامگەردىڭ ومىرىنە بايلانىستى رەجيسسەر بولات ۇزاقوۆ تۇسىرگەن فيلمنەن ءۇزىندى كورسەتىلىپ, جازۋشىنىڭ كىتاپتارىنان كورمە ۇيىمداستىرىلدى.
نازىم قايرات.
استانا.