ەل ەكونوميكاسىنىڭ دامۋىنا «قورعاس-شىعىس قاقپاسى» ارنايى ەكونوميكالىق ايماعىنداعى «قازاقستان-قىتاي حالىقارالىق ونەركاسىپتىك قالاسى» جوباسىنىڭ ماڭىزى زور. وسى رەتتە جەتىسۋ وبلىسىنىڭ اكىمى بەيبىت يساباەۆ ينۆەستورلارمەن ونلاين رەجىمدە كەزدەستى. بۇعان دەيىن قاراشا ايىندا وتكەن جيىندا قول جەتكىزىلگەن كەلىسىمگە سايكەس تاراپتار ۇزاق مەرزىمدى ىنتىماقتاستىقتى جۇزەگە اسىرۋ تۋرالى مەموراندۋمعا قول قويدى.
جەتىسۋ وبلىسى اكىمدىگى ءباسپاسوز قىزمەتىنىڭ مالىمەتىنشە, ينۆەستيتسيانىڭ جالپى كولەمى 1 ترلن تەڭگەدەن اسادى. بۇل وبلىستىڭ ۇشجىلدىق بيۋدجەتىنە تەڭ. كەزدەسۋدە ءوڭىر باسشىسى ەل پرەزيدەنتى قاسىم-جومارت توقاەۆتىڭ وسى جوبانى دامىتۋعا ەرەكشە نازار اۋدارىپ وتىرعانىن اتاپ ءوتتى.
«مەملەكەت باسشىسى ءبىزدىڭ وڭىرگە كەلگەن ساپارىندا قىتايمەن ىسكەرلىك جانە ساۋدا-ەكونوميكالىق بايلانىستاردى نىعايتىپ, كەڭەيتە تۇسۋگە باعىتتالعان اتالعان ماڭىزدى جوبانى قايتا باستاۋ شارالارىن قابىلداۋ تۋرالى تاپسىرما بەردى. «قازاقستان-قىتاي ونەركاسىپتىك قالاسى» جوباسى قازاقستان-قىتاي يندۋستريالىق-يننوۆاتسيالىق ىنتىماقتاستىق جوبالارىنىڭ تىزبەسىنە ەنگىزىلگەن, سونداي-اق بۇل جوبانىڭ ەكى ەلدىڭ ۇكىمەتتەرى اراسىندا «جىبەك جولىنىڭ ەكونوميكالىق بەلدەۋىن» سالۋدا ەلەۋلى ءمانى بار. بۇگىنگى مەموراندۋم جوبانى ىسكە اسىرۋدىڭ جاڭا كەستەسىن بەكىتىپ, ونى جۇزەگە اسىرۋعا بايلانىستى بۇعان دەيىن جوسپارلانعان بارلىق ءىس-شارانى قايتا باستاۋعا مۇمكىندىك بەرەدى», دەدى ب.يساباەۆ. سونداي-اق ول «قازاقستان-قىتاي ونەركاسىپتىك قالاسى» اياسىندا جوسپارلانعان 30 ينۆەستيتسيالىق جوبا جايىندا جانە ولاردى ىسكە اسىرۋ مەرزىمدەرى تۋرالى مالىمەتتەردى سۇراپ ءبىلدى.
«قىتاي-قازاقستان حالىقارالىق ونەركاسىپتىك قالاسىنىڭ» باسقارما توراعاسى ي فادجۋن مەن «Fujian Dazhuo» باسقارما توراعاسى لين سياوۆ وزدەرىنە قولداۋ كورسەتكەنى ءۇشىن قازاقستاندىق تاراپقا العىس ءبىلدىردى. سونىمەن قاتار جوبانى ىسكە اسىرۋعا قاتىساتىن كومپانيالاردىڭ تىزىمىمەن قوسا بارلىق قاجەتتى اقپاراتتى ۋاقتىلى بەرەمىز دەپ سەندىردى. ولار جەلتوقسان ايىنىڭ سوڭىنا دەيىن جەتىسۋعا كەلىپ, جەكە كەزدەسۋ بارىسىندا بارلىق مالىمەتتى جۇزبە-ءجۇز وتىرىپ تالقىلاي الاتىندارىنا ءۇمىتتى. وعان قازىرگى ۋاقىتتا قحر اۋماعىندا كوروناۆيرۋستىڭ قايتا ءورشۋى كەدەرگى كەلتىرۋدە. سوندىقتان بارلىق كەزدەسۋ ازىرگە ونلاين رەجىمدە وتكىزىلەدى.
مەموراندۋمعا قول قويۋعا قاتىستى پىكىرىن بىلدىرگەن بەيبىت يساباەۆ «قازاقستان-قىتاي ونەركاسىپتىك قالاسى» جوباسى ەكى ەل اراسىنداعى ساۋدا-ەكونوميكالىق قانا ەمەس, تەحنولوگيالىق سالالارداعى ەكىجاقتى ىنتىماقتاستىقتى دامىتۋدىڭ جاڭا مۇمكىندىكتەرىنە جول اشاتىنىن اتاپ ءوتتى. بولاشاق لوگيستيكالىق تەحنوپاركتە جاڭا وندىرىستەر, دامىعان ينفراقۇرىلىم, اۋىل شارۋاشىلىعى ونىمدەرىن وڭدەۋ كاسىپورىندارى, ساۋدا-ويىن-ساۋىق وبەكتىلەرى, فۋدكورتتار جانە ت.ب. نىساندار بولادى. ياعني جاڭا جۇمىس ورىندارى اشىلادى, زاماناۋي تەحنولوگيالار قولدانىسى كەڭەيەدى, وبلىس بيۋدجەتىنە تۇسەتىن سالىق تۇسىمدەرى مولايادى دەگەن ءسوز. بۇل جوبا 1-2 جىلدىق ەمەس, ونىڭ الداعى پەرسپەكتيۆالارىن ەسكەرسەك, ونىڭ گەوستراتەگيالىق ماڭىزى ۇلكەن.
كەزدەسۋدى اياقتاي كەلە تاراپتار ۇزاق مەرزىمدى ءوزارا ءتيىمدى سەرىكتەستىككە مۇددەلى ەكەندىكتەرىن ايتتى, ياعني پاندەميانىڭ سالدارىنان ەكى جىلعا جۋىق توقتاپ تۇرعان جوبانى ىسكە اسىرۋعا بار كۇش-جىگەرلەرىن سالماق.
وبلىس اكىمى ب.يساباەۆتىڭ ايتۋىنشا, كەلەسى اپتادا وڭىرگە رەسمي ساپارمەن شىڭجاڭ ۇيعىر اۆتونوميالىق ايماعىنىڭ دەلەگاتسياسى كەلەدى. ءىرى ينۆەستور كومپانيامەن مەموراندۋمعا قول قويۋ جوسپارلانىپ وتىر. ەسكە سالساق, وسى جىلدىڭ قىركۇيەك ايىنىڭ باسىندا «قازاقستان-قىتاي ىنتىماقتاستىعى جونىندەگى دوستىق ديالوگى» ونلاين كەزدەسۋى اياسىندا شىڭجاڭ ءوڭىرى مەن جەتىسۋ وبلىسى اراسىندا باۋىرلاستىق بايلانىس ورناتۋ جونىندەگى نيەت تۋرالى حاتتاماعا قول قويىلعان بولاتىن.
جەتىسۋ وبلىسى