چيليلىك «ME-Elecmetal» كومپانياسى تاۋ-كەن ءوندىرىسى سالاسىندا شيكىزاتتى قىتايداعى كەن ورنىنان جەتكىزىپ, جەتىسۋ ايماعىندا وڭدەۋ ىسىمەن اينالىسپاق. ولاردىڭ جىلىنا 100-140 مىڭ توننا جوعارى ساپالى ءونىم ءوندىرۋ جوسپارى بار.
چيليلىك كاسىپكەرلەر جەتىسۋ وبلىسىنىڭ اكىمى بەيبىت يساباەۆپەن كەزدەسۋ بارىسىندا قازاقستانمەن سەرىكتەستىك بايلانىس ورناتىپ, ينۆەستيتسيا سالۋعا نيەتتى ەكەندىكتەرىن جەتكىزدى. جەتىسۋعا ءوز كاسىپورىندارىن ورنالاستىراتىن جانە جۇمىسىن جۇرگىزەتىن لايىقتى وندىرىستىك الاڭ ىزدەۋ ماقساتىمەن كەلگەنىن دە جاسىرمادى.
جەتىسۋ وبلىسى اكىمى ءباسپاسوز قىزمەتىنىڭ مالىمەتىنشە, «ME-Elecmetal» كومپانياسى تاۋ-كەن ءوندىرىسى سالاسىندا ديىرمەن قاپتامالارىن شىعارۋدا وندىرىستىك قۋاتى مەن ءونىم شىعارۋ كولەمى جاعىنان الەمدە كوشباسشى سانالادى. اتالعان كومپانيا وكىلدەرى شيكىزاتتى قىتايداعى كەن ورنىنان جەتكىزىپ, جەتىسۋ جەرىندە وڭدەۋدى كوزدەپ وتىر. ولاردىڭ جىلىنا 100-140 مىڭ توننا جوعارى ساپالى ءونىم ءوندىرۋ جوسپارى بار. دايىن ءونىمدى وتكىزۋدە نەگىزىنەن «KAZ Minerals» كومپانياسىمەن سەرىكتەس بولاتىندارىن ايتادى. «تالدىقورعان» يندۋستريالدى ايماعىنىڭ بارلىق قاجەتتى ينفراقۇرىلىمدارمەن قامتىلۋى چيلي كاسىپكەرلەرىنىڭ قىزىعۋشىلىعىن تۋعىزعان.
«KAZ Minerals» كومپانياسىمەن كەلىسىمشارت جاساسامىز. سىزدەرگە ۇسىنىلىپ وتىرعان جوبامىزدى ديرەكتورلار كەڭەسى بىزگە بەكىتىپ بەرەدى. سودان كەيىن ناقتى قادامدار جاساۋعا ءازىرمىز», دەيدى «ME-Elecmetal» بىرلەسكەن كومپانياسىنىڭ وكىلى, ۇساتۋ ءبولىمىنىڭ اعا اتقارۋشى ۆيتسە-پرەزيدەنتى زەن جۋ مىرزا.
وبلىس اكىمى بەيبىت يساباەۆ رەسمي قوناقتارعا جىلى لەبىزىن ءبىلدىرىپ, ەلىمىزدىڭ, سونىڭ ىشىندە جەتىسۋ ايماعىنىڭ لوگيستيكالىق مۇمكىندىكتەرى مول ەكەنىنە توقتالىپ ءوتتى. سونداي-اق «تالدىقورعان» يندۋستريالدى ايماعىندا ءوندىرىستى دامىتۋعا قاجەتتى بارلىق ينفراقۇرىلىم جۇيەلەرى جاسالعانىن ايتتى. بۇل ءوز كەزەگىندە ءوڭىردىڭ ينۆەستيتسيالىق تارتىمدىلىعىن ارتتىرۋعا مۇمكىندىك بەرەدى. جوبانىڭ ايماققا تيىمدىلىگى تۇرعىسىنداعى بىرقاتار جايتتى پىسىقتاعان وبلىس اكىمى ءوز تاراپىنان قاجەتتى قولداۋ كورسەتەتىنىن ءبىلدىردى.
«سىزدەرمەن سەرىكتەس بولۋعا پەيىلدىمىز. دەگەنمەن كوروناۆيرۋستى جانە باسقا دا سەبەپتەردى العا تارتىپ, كەي جوبالاردىڭ ىسكە اسىرىلۋىن ۇزاتىپ العان ينۆەستورلار دا بار. بىزگە جوبالاردىڭ ۋاقىتىندا جۇزەگە اسىرىلعانى جانە ونىڭ ءوز تيىمدىلىگىن كورسەتكەنى كەرەك. ول ءۇشىن جەرگىلىكتى اتقارۋشى ورگانعا قاتىستى جۇمىستاردى دەر كەزىندە اتقارۋعا مۇددەلىمىز. بارلىق قۇجاتتىق راسىمدەر اياقتالعاندا تاعى ءبىر كەزدەسىپ, جوبانىڭ جاي-جاپسارىن ەگجەي-تەگجەيلى تالقىلاۋعا ءازىرمىز», دەدى ب.يساباەۆ.
جەتىسۋ وبلىسى