ەل پرەزيدەنتى قاسىم-جومارت توقاەۆ جەتىسۋ وبلىسىنا جاساعان ساپارى بارىسىندا ايماقتىڭ تۇرعىن ءۇي-كوممۋنالدىق شارۋاشىلىعى مەن اۆتوموبيل جولدارى ينفراقۇرىلىمىن جاڭعىرتۋ ماسەلەسىن نازارعا العان ەدى. وسى رەتتە رەسپۋبليكالىق جانە جەرگىلىكتى ماڭىزى بار جولداردىڭ ساپاسىن ارتتىرۋ بويىنشا كەشەندى ءىس-شارالار جوسپارى بەكىتىلدى.
اۆتوكولىك جولدارىن دامىتۋ باعىتىنداعى جۇمىستار «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى شەڭبەرىندە ىسكە اسىرىلماق. ونىڭ اياسىندا 2022 جىلى رەسپۋبليكالىق ماڭىزى بار جولداردىڭ 91 پايىزىن, جەرگىلىكتى جولداردىڭ 85 پايىزىن نورماتيۆتىك جاعدايعا كەلتىرۋ جوسپارلانعان. بۇعان دەيىن مەملەكەت باسشىسى 2025 جىلعا دەيىن قالىپتى جاعدايداعى جەرگىلىكتى جولداردىڭ ۇلەسىن 95 پايىزعا دەيىن جەتكىزۋدى تاپسىرعان بولاتىن. بۇل ماسەلە يندۋستريا جانە ينفراقۇرىلىمدىق دامۋ مينيسترلىگىنىڭ تۇراقتى ءارى ءجىتى باقىلاۋىندا.
جەتىسۋ وبلىسىنداعى اۆتوموبيل جولدارى سالاسىندا جۇزەگە اسىرىلىپ جاتقان جوبالار تۋراسىندا ايتار بولساق, 2021 جىلدان بەرى رەسپۋبليكالىق بيۋدجەت قاراجاتى ەسەبىنەن «سارىوزەك – كوكتال» اۆتوكولىك جولىندا كۇردەلى جوندەۋ جۇمىستارى جۇرگىزىلىپ جاتىر. سونداي-اق «كوكتال – جاركەنت – قورعاس» باعىتىنداعى جولدىڭ 31 شاقىرىمىندا (130-145, 306-322) ورتاشا جوندەۋ جۇمىستارى ىسكە اسىرىلۋدا.
2023-2025 جىلدارعا ارنالعان رەسپۋبليكالىق بيۋدجەت جوباسىندا اتالعان قۇرىلىستار مەن جوندەۋ جۇمىستارىن تولىعىمەن اياقتاۋعا قاجەتتى بارلىق قاراجات قاراستىرىلعان. اۆتوكولىك جولدارىنىڭ وزگە ۋچاسكەلەرىنىڭ تەحنيكالىق جاعدايى جولداردى كۇتىپ ۇستاۋ اياسىنداعى جول-جوندەۋ جۇمىستارى ەسەبىنەن جۇرگىزىلمەك.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, بۇدان وزگە, الداعى ەكى جىلدا «لەپسى – بالقاش» جول جەلىسىنىڭ قۇرىلىسىن اياقتاۋ كوزدەلگەن. 2018 جىلى جالپى ۇزىندىعى 110 شاقىرىمدى قۇرايتىن «الماتى – وسكەمەن – لەپسى – اقتوعاي» باعىتىنداعى اۆتوموبيل جولىن قايتا جاڭعىرتۋ جۇمىستارى قولعا الىنعان بولاتىن. اتالعان جوبا ەكى ۋچاسكەگە ءبولىنىپ ىسكە اسىرىلادى. 2021 جىلى ءبىرىنشى ۋچاسكەدەگى قۇرىلىس جۇمىستارى تولىعىمەن اياقتالىپ, نىسان پايدالانۋعا بەرىلدى. ال ەكىنشى ۋچاسكەدەگى جۇمىستار 2024 جىلى اياقتالماق.
ال «بۇرقان بۇلاق» سارقىراماسىنا دەيىنگى جول جوندەۋ جوباسى تۋراسىندا ايتار بولساق, الدىن الا جوبا بويىنشا جول جەلىسى ەسكەلدى اۋدانىنداعى قورا شاتقالى ارقىلى تەكەلى قالاسىنان «بۇرحان بۇلاق» سارقىرماسىنا دەيىن جالعاسادى. بۇگىندە وبلىس اكىمدىگىمەن بىرلەسىپ جوبالاۋ-ىزدەستىرۋ جۇمىستارى جۇرگىزىلۋدە. اتالعان جول ۋچاسكەسى بويىنشا جوبالىق-سمەتالىق قۇجاتتامانى دايارلاۋ 2023 جىلى تولىعىمەن اياقتالماق.
جەتىسۋ وبلىسى