ايماقتىق فەستيۆال اياقتالدى

  تاياۋدا پاۆلودار قالاسىندا ايماقتىق تەاترلار فەستيۆالى ءوتتى. فەستيۆال قازاقتىڭ ءبىرتۋار ازاماتى, قوعام قايراتكەرى, جازۋشى, دراماتۋرگ جۇسىپبەك ايماۋىتوۆتىڭ 125 جىلدىعىنا ارنالدى. ايماق تەاترلارىنىڭ فەستيۆالى ۇلتتىق تەاتر ونەرىنىڭ ىرگەتاسىن قالاۋشىلاردىڭ ءبىرى, قازاق ونەرىنىڭ قايماعى جۇسىپبەك ايماۋىتوۆتىڭ رۋحىنا باعىشتالدى. ارتىندا وشپەس مۇرا قالدىرعان, ەلىنە ايانباي ەڭبەك ەتكەن, «اقبىلەك», «قارتقوجا», «مانساپقورلار», «شەرنياز», «رابيعا», ت.ب. كوپتەگەن تۋىندىلار قالدىرعان ۇلى تۇلعانىڭ ەسىمى ۇلىقتالدى. ەرتىستىڭ بويىن جايلاعان پاۆلو­­دار قالاسىنداعى ايماقتىق فەستيۆال­دى ج.ايماۋىتوۆ اتىنداعى قازاق مۋ­زىكالى دراما تەاترى ۇيىمداستىر­دى. تەاتر ديرەكتورى, قر-نىڭ ەڭبەك سىڭىرگەن قايراتكەرى ن.جۇمانيازوۆتىڭ باس­شىلىعىمەن وتكەن فەستيۆالگە اي­ماقتىق تەاترلار اتسالىستى. سەمەي قالاسىنان اباي اتىنداعى قازاق مۋزىكالى دراما تەاترى ش.ايتماتوۆتىڭ «قوش بول, گۇلسارى», ف.م.دوستوەۆسكي اتىنداعى ورىس دراما تەاترى جان-باتيس مولەردىڭ «لەكار پونەۆولە», سەمەيدىڭ «داريعا-اي» جاستار تەاترى ا.ايتىباەۆتىڭ «ىزعارلى جەلتوقسان», جامبىل اتىنداعى شى­عىس قازاقستان وبلىستىق دراما تەاترى­ ۇ.ەسداۋلەتوۆتىڭ «قارا پيما», ق.قۋانىشباەۆ اتىنداعى مەملەكەت­تىك اكادەميالىق قا­زاق مۋزىكالىق درا­ما تەاترى ءا.تا­رازيدىڭ «ۇكىلى جۇل­دىز», س.سەي­فۋللين اتىنداعى قاراعان­دى وب­لىس­تىق دراما تەاترى م.كارىم­نىڭ «اي تۇتىلعان ءتۇن», بيكەن ريموۆا اتىن­داعى الماتى وبلىسى اكىمىنىڭ تالدىقورعان دراما تەاترى يران عايىپ­تىڭ «نەگىزگى شارۋا», ا.چەحوۆ اتىن­داعى پاۆ­لودار وبلىستىق دراما تەاترى ا.گون­چاروۆتىڭ «بەز سلەز, بەز جيز­ني, بەز ليۋبۆي» درامالارىن ۇسىن­دى. ايماقتىق تەاترلار فەستي­ۆالىنىڭ قازىلار القاسى قۇرامىندا كسرو حالىق ءارتىسى ا.ءاشىموۆ, بەلگىلى سىنشى, پروفەسسور ءا.سى­عاەۆ, قر-نىڭ مادەنيەت قايراتكەرى م.بايجۇما­نوۆ, قر-نىڭ ەڭبەك سىڭىرگەن ءارتىسى ر.تاجىباەۆا, قر-نىڭ مادەنيەت قاي­راتكەرى ا.قانافينا سىندى تانىمال تۇلعالار بولدى. باس جۇلدەنى ق.قۋا­نىشباەۆ اتىنداعى مەملەكەتتىك اكا­دەميالىق قازاق مۋزىكالىق دراما تەاترى يەلەندى. باسقا تەاترلار دا وزىندىك ناقىش­تارىمەن ەرەكشەلەندى. ايماق­تىق تەاترلار فەستيۆالىنەن قۇرالاقان قايتقان ەشكىم جوق. سەمەيدىڭ اباي اتىنداعى قازاق مۋزىكالى دراما تەاترى «ادەبيەتتى ناسيحاتتاعانى ءۇشىن» اتالىمى بويىنشا ماراپاتتالدى. حالىق ءارتىسى ب.يماحانوۆتىڭ تەاترداعى كوپ جىلدىق ەڭبەگى ەرەكشە اتالىپ ءوتتى. ف.م.دوستوەۆسكي اتىن­داعى ورىس دراما تەاترىنىڭ ءارتى­سى ا.سۋحوۆ «ۇزدىك ەر بەينەسىن سوم­داعانى ءۇشىن» جۇلدەسىمەن مارا­پاتتالدى. سەمەي قالاسىنان شىعار­ماشىلىق ۇجىمدى باستاپ بار­عان, اباي اتىنداعى قازاق مۋزى­كالى دراما تەاترىنىڭ ديرەكتورى ب.تۇلەكوۆ پەن ف.م.دوستوەۆ­سكي اتىنداعى ورىس دراما تەاترىنىڭ ديرەكتورى يا.گورەل­­نيكوۆ ونەر ۇجىمدارىنىڭ الامان بايگەگە قاتىسۋىنا ەرەكشە ەڭبەك ءسىڭىر­گەنىن اتاي كەتكەن ءجون. مەرەي قارتوۆ, اباي اتىنداعى قازاق مۋزىكالى دراما تەاترى ادەبيەت ءبولىمىنىڭ مەڭگەرۋشىسى.