رەسپۋبليكا كۇنى قارساڭىندا جەتىسۋ وبلىسىندا بىرقاتار الەۋمەتتىك ماڭىزى بار نىسان ەل يگىلىگىنە بەرىلدى. بۇلاردىڭ قاتارىندا سپورت الاڭى مەن حالىققا مەملەكەتتىك قىزمەت كورسەتۋدىڭ تسيفرلىق كەڭسەسى جانە بەس مەديتسينالىق ورتالىق بار. وسىنىڭ ناتيجەسىندە 4 مىڭنان استام اۋىل تۇرعىنى ساپالى مەديتسينالىق قىزمەتپەن قامتىلدى.
اۋەلى مەرەكەنىڭ شىمىلدىعى كوكسۋ اۋدانىنا قاراستى ز.تامشىباەۆا اۋىلىندا ءتۇرىلدى. شاڭىراقتارىنا كوپتەن كۇتكەن كوگىلدىر وتىننىڭ كەلۋى تۇرعىنداردىڭ كوڭىلىن شات-شادىمان ەتتى. تابيعي گازعا 400-گە جۋىق وتباسى قول جەتكىزدى.
ودان كەيىن ەسكەلدى اۋدانىندا 1 900-گە جۋىق ادام تۇراتىن اباي, تەرەكتى جانە قورجىمباي اۋىلدارىندا ءۇش بلوك-مودۋلدىك مەديتسينالىق پۋنكت اشىلدى. ءۇش نىساننىڭ جالپى قۇنى 105 ملن تەڭگەنى قۇرايدى. ءار فەلدشەرلىك پۋنكتتە اكۋشەر-گينەكولوگتەر مەن فەلدشەرلەر تۇراقتى جۇمىس ىستەيتىن بولادى. وبلىس ورتالىعىنان مامانداردىڭ كەلۋى دە ۇيىمداستىرىلماق.
اتالعان قۇرىلىس نىسانىنا وتاندىق وندىرىستەن مەتالل كونسترۋكتسيالار مەن سەندۆيچ-پانەلدەر پايدالانىلعان. ىشىندە ىستىق سۋ, اجەتحاناسى بار. عيماراتتار قايتا جوندەۋدى قاجەت ەتپەيدى. ماماندار 30 جىلدان 50 جىلعا دەيىن كەپىلدىك بەرىپ وتىر. مىنە, وسىلايشا, بلوك-مودۋلدىك فەلدشەرلىك پۋنكتتەر اۋىل تۇرعىندارىنا مەديتسينالىق قىزمەتتىڭ قولجەتىمدىلىگى مەن ساپاسىن ارتتىرۋ ماسەلەسىن قىسقا مەرزىمدە شەشۋگە مۇمكىندىك بەرمەك. بۇل عيماراتتار قۇرىلىستىڭ جىلدامدىعى عانا ەمەس, ساپاسىمەن دە ەرەكشەلەنەدى. سونىمەن قاتار جوبالىق-سمەتالىق قۇجاتتار ازىرلەۋدى قاجەت ەتپەيدى.
وسىنداي الەۋمەتتىك نىسان الاكول اۋدانىنا قاراستى ەڭبەكشى اۋىلىندا دا بوي كوتەردى. ءبىر مىڭنان استام حالقى بار ەلدى مەكەنگە ءمودۋلدى دارىگەرلىك امبۋلاتوريا اۋاداي قاجەت بولاتىن. قاراپايىم حالىق ءبىر جاساپ قالدى. زاماناۋي قۇرال-جابدىقتارمەن جابدىقتالعان دەنساۋلىق ساقتاۋ نىسانىنىڭ جالپى قۇنى 78 ملن تەڭگەنى قۇرايدى. عيماراتتىڭ جالپى اۋدانى – 110 شارشى مەتر. عيمارات ءبىر قاباتتان, جەتى بولمەدەن تۇرادى. دارىگەرلىك امبۋلاتوريا 8 ادامدى جۇمىسپەن قامتيدى. سونداي-اق كوكسۋ اۋدانىندا دا 1 500-دەن استام ادام تۇراتىن جامبىل اۋىلى حالقىنىڭ يگىلىگىنە فەلدشەرلىك-اكۋشەرلىك پۋنكت پايدالانۋعا بەرىلدى.
ودان بولەك سارقان قالاسىندا زاماناۋي سپورت نىسانى اشىلدى. اقىن سارا اتىنداعى ورتا مەكتەپتىڭ ستاديونى قولدانىسقا بەرىلدى. ونىڭ قۇرىلىسىنا جەرگىلىكتى بيۋدجەتتەن 59 ملن تەڭگە جۇمسالعان. جىل سوڭىنا دەيىن سارقان اۋدانىندا بارلىعى 4 فۋتبول ستاديونى, 8 بالالار ويىن الاڭى جانە 5 ۆوركاۋت-الاڭ ىسكە قوسىلماق. مەرەكەگە وراي اۋداندا ەنگىزىلگەن تاعى ءبىر نىسان – «تسيفرلىق كەڭسە» بولىمشەسى بولدى. بۇل كەڭسەگە كۇنىنە 100-گە جۋىق ادام بارا الادى.
قۋانىشتىڭ ۇلكەنى ۇشتوبە قالاسىندا بولدى. ۇلتتىق مەرەكەگە وراي 30 پاتەرلى باسپانانىڭ كىلتى تابىستالدى. سالتاناتتى ءىس-شاراعا اۋدان اكىمى ەرلان يسابەكوۆ, ۇشتوبە قالاسىنىڭ تۇرعىندارى جانە مەردىگەر مەكەمە وكىلدەرى قاتىستى. تۇرعىن ءۇي «نۇرلى جەر» مەملەكەتتىك باعدارلاماسى اياسىندا سالىنعان. ءۇي قۇرىلىسىنا 405,6 ملن تەڭگە جۇمسالعان. جاڭا ۇيدە 2 بولمەلى 10 پاتەر جانە 3 بولمەلى 20 پاتەر بار. قونىس توي يەلەرى قاتارىندا 20 پاتەرگە – 1 جانە 2-توپتاعى مۇگەدەكتەر, اۋعان سوعىسىنىڭ ارداگەرلەرى, تولىق ەمەس وتباسىلار, زەينەتكەرلەر, مۇگەدەك بالالاردى تاربيەلەپ وتىرعان وتباسىلار ساناتىنداعى ازاماتتار يە بولدى. سونىمەن قاتار 5 پاتەر جەتىم بالالارعا, 5 پاتەر كوپبالالى وتباسىلارعا بۇيىردى. اۋدان باسشىسى تۇرعىنداردى قونىس تويىمەن قۇتتىقتاپ, اۋداندا جاقىن ارادا 40 پاتەرلى كوممۋنالدىق ءۇيدىڭ قۇرىلىسىن باستاۋ, سونداي-اق «كوكدالا» شاعىن اۋدانىندا 20 جاڭا تۇرعىن ءۇي سالۋ جوسپارلانىپ وتىرعانىن قۋانىشپەن جەتكىزدى.
جەتىسۋ وبلىسى