جۋىردا ۇكىمەت «تۇرعىن ءۇي-كوممۋنالدىق شارۋاشىلىعىن جاڭعىرتۋدىڭ 2011-2020 جىلدارعا ارنالعان باعدارلاماسىنا وزگەرىستەر مەن تولىقتىرۋلار ەنگىزۋ تۋرالى» قاۋلى قابىلدادى. قاۋلى اتالمىش باعدارلامانىڭ ءتيىمدىلىگىن ارتتىرۋعا جانە حالىقتىڭ قاتىسۋ مۇمكىندىكتەرىن جەڭىلدەتۋگە, ىسكە اسۋ تەتىكتەرىن جەتىلدىرۋگە باعىتتالعان.
ەندى, ازاماتتار تۇرىپ جاتقان تۇرعىن ۇيلەرىنە كۇردەلى جوندەۋ جۇمىستارىن جۇرگىزۋ كەزىندە جۇمىستاردىڭ ەڭ از نەمەسە ەڭ كوپ پاكەتىن وزدەرى تاڭداي الاتىن بولدى. جۇمىستاردىڭ ەڭ از تۇرىنە تۇرعىن ءۇيدىڭ شاتىرىن, كىرەبەرىسىن, جەرتولەسىن جوندەۋ (جىلىلاۋ) كىرسە, ەڭ كوپ تۇرىنە تۇرعىن ءۇيدىڭ شاتىرىن, كىرەبەرىسىن, جەرتولەسىن, قاسبەتىن جوندەۋ (جىلىلاۋ), بار بولسا ءليفتىسىن جوندەۋ جاتادى.
حالىقتىڭ قاتىسۋ مۇمكىندىكتەرىن جەڭىلدەتۋدىڭ نەگىزگى تەتىكتەرىنىڭ ءبىرى رەتىندە ءۇي-جاي (پاتەر) يەلەرىنىڭ 3%, 5% جانە 7% مولشەرىندە بەلگىلەنگەن الدىن الا سالىمى الىنىپ تاستالدى. بۇل شارا جاڭعىرتۋ باعدارلاماسى ىسكە اسىرۋ كەزىندە كوپتەگەن تۇرعىندارعا العاشقى تولەمدى قىسقا ۋاقىت ىشىندە جيناۋ قيىندىق تۋدىرىپ, باعدارلاماعا قاتىسۋ مۇمكىندىگىنەن ايىرىلاتىندىقتان قابىلدانىپ وتىر. بۇل وزگەرىستەر بيىل تۇرعىن ۇيلەرگە جوندەۋ جۇمىستارىن جۇرگىزۋ بويىنشا كەلىپ تۇسەتىن وتىنىمدەرگە ىقپال ەتپەك. باعدارلامانىڭ جاڭا نۇسقاسىندا كوپقاباتتى تۇرعىن ۇيلەردىڭ جوندەلۋى بىرىڭعاي تەتىك بويىنشا ىسكە اسىرىلاتىن بولادى. جوندەۋ قۇزىرەتىنە يە وكىلەتتى ۇيىمدار جوندەۋ جۇمىستارىن ءوز بەتىنشە نەمەسە قوسالقى مەردىگەر ۇيىمدار تارتۋمەن جۇرگىزە الادى. قوسالقى مەردىگەر ۇيىمدى تاڭداۋ بويىنشا كونكۋرستىق راسىمدەر دە الىنىپ تاستالدى, قوسالقى مەردىگەر ۇيىمداردى تاڭداۋ تۇرعىندار قۇزىرىنا بەرىلدى.
عيماراتتى تەرموجاڭعىرتۋ بويىنشا جۇمىستار كەشەنىنە دە مىندەتتى شارتتارعا وزگەرىستەر ەنگىزىلدى. ەندى ۇيگە جىلۋ تۇتىنۋدى رەتتەيتىن اۆتوماتتاندىرىلعان جۇيەلەر مەن جىلۋ ەسەپتەۋدىڭ ورتاق اسپاپتارىن ورناتۋ كوزدەلۋدە. اجت ورناتۋ جىلۋ ەنەرگياسىن ورتاق جىلۋ تۇتىنۋدان 30%-عا دەيىن ۇنەمدەۋگە, جىلۋ پۋنكتتەرىندەگى توزعان جابدىقتاردى اۋىستىرۋعا, تۇراقتى تەمپەراتۋرالىق رەجىمدى قولداۋ ەسەبىنەن ءۇي-جايلارداعى قولايلىلىقتى ارتتىرۋعا, ىستىق سۋدىڭ تۇراقتى تەمپەراتۋراسىن قولداۋ ەسەبىنەن ىستىق سۋمەن جابدىقتاۋ قىزمەتتەرىنىڭ ساپاسىن ارتتىرۋعا مۇمكىندىك بەرەدى. ۇيلەرگە جىلۋ ەسەپتەۋدىڭ ورتاق اسپاپتارىن ورناتۋ تۇرعىن ۇيگە كىرگەن جىلۋ مولشەرىن انىقتاۋعا, تۇتىنۋ كولەمىن, جىلىتۋ ساپاسىنىڭ پارامەترلەرىن باقىلاپ وتىرۋعا مۇمكىندىك بەرەدى. بۇل ەنەرگيانى تۇتىنۋدىڭ اسا ءتيىمدى دەڭگەيىنە قول جەتكىزۋگە, ونى اۆتوماتتاندىرۋعا جانە ۇنەمدەۋگە باعىتتالعان شارا.
سونىمەن قاتار, باعدارلامادا جىلۋمەن جابدىقتاۋ سەكتورىن رەفورمالاۋ جانە دامىتۋ كوزدەلگەن. وندا «100گكال/ساعاتقا دەيىنگى قازاندىقتاردى پايدالانۋدىڭ سەكتورىن رەفورمالاۋ جانە دامىتۋدىڭ» جاڭا ءبولىمى قازاندىقتاردى 100گكال/ساعاتقا دەيىنگى قۋاتتىلىقپەن رەفورمالاۋ مەن جاڭعىرتۋ ماسەلەلەرىن قوزعايدى, دەپ حابارلايدى وڭىرلىك دامۋ مينيسترلىگىنىڭ ءباسپاسوز قىزمەتى.
ۆەنەرا تۇگەلباي,
«ەگەمەن قازاقستان».