«اق كيمەشەك كورىنسە, سەنى كورەم,اق كيمەشەك جوعالسا...نەنى كورەم؟». قايران, مۇقاعالي وسىلاي جىرلاپ ەدى-اۋ. ساحناعا شىققان اجەلەردى كورگەن دە, اقيىق اقىننىڭ سول ولەڭى ويىمىزعا ورالا بەردى. وسىلايشا, كوكسۋ اۋدانىنا قاراستى مۇقىرى اۋىلىندا وتكەن «اق كيمەشەك» اجەلەر بايقاۋىنان ءبىر مەرەيلەنىپ قايتتىق.
ءسانى مەن سالتاناتى جاراسقان 10 اجە سىناققا قاتىسىپ, كەلگەن جۇرتتى ءسۇيسىندىردى. ءار اۋىلدىق وكرۋگتىڭ نامىسىن قورعاعان اجەلەر بايقاۋ شارتى بويىنشا بەس سىننان ءوتىپ, بار ونەرىن ورتاعا سالدى. قازىلار القاسى سىنعا تۇسكەن ءار اجەنىڭ ونەرىنە تامسانىپ, لايىقتى باعالادى.
قارقارا كيمەشەك كيىپ, كونەنىڭ كوزىندەي بولعان اجەلەرىمىز تاريحتان سىر شەرتىپ, ۇلتتىڭ ۇلىلىعىن كوز الدىمىزعا اكەلىپ, جۇرەكتىڭ قىلىن شەرتتى. ءبىرى قارا ولەڭنەن اعىتسا, ەكىنشىسى كيەلى دومبىرانى قولعا الىپ, تەبىرەنە تولعادى.
سوناۋ كەلىن بولىپ تۇسكەن شاقتان اق اجەگە جەتكەنشە عۇمىر-تاريحىن اڭگىمە ەتىپ انگە سىيعىزعان اجەلەردىڭ ونەرىنە تاڭداي قاقتىق. بايقاۋدىڭ ءار ساتىسىنان ۇپاي جيناپ, شىنايى ىقىلاسپەن قاتىسقان ونەرپازداردىڭ دايىندىعى وتە جوعارى ەكەن. نەمەرەسىنىڭ قۇلاق قۇرىشىن قاندىرىپ, كوڭىل سارايىن اشىپ, تەرەڭ ويعا باتىراتىن قيسسانى وقىعاندا كەلگەن جۇرتتىڭ ءوزىن ەلىتىپ اكەتتى. «قولونەر» اتالىمى بويىنشا اكەلگەن بۇيىمدارىن قورعاپ, كورگەن جاننىڭ كوڭىلىن قۋانىشقا تولتىردى.
مۇقىرى اۋىلىنا كۇن نۇرىنداي شۋاق شاشىپ, كوڭىل كۇي سىيلاعان «اق كيمەشەك» بايقاۋىنىڭ ءتۇيىنىن قويۋعا كوكسۋ اۋدانىنىڭ اكىمى مارلەن كولباەۆ, جەتىسۋ وبلىسى انالار كەڭەسىنىڭ ءتورايىمى جامال بايماديەۆا شىعىپ, جۇرەكجاردى ءسوزىن ارنادى. ءار قاتىسۋشىنىڭ ونەرىن جىكتەپ, تالانتتارى مەن تالابىنا باس يگەن قازىلار القاسى اق جاۋلىقتى اجەلەرگە ريزاشىلىعىن ءبىلدىردى.
«بۇل سىندا بارلىعىڭىز دا جەڭىمپازسىزدار, جەڭىلگەن ەشكىم جوق. بارىڭىزگە ءارتۇرلى اتالىم بويىنشا بايگە بەرىلەدى», دەگەن اۋدان باسشىسى مارلەن كولباەۆ 10 وكرۋگتەن كەلگەن اجەلەردىڭ يىعىنا كامزول, باسىنا اق جاۋلىق جاۋىپ, ارنايى سىيلىقتار تابىس ەتتى.
جەتىسۋ وبلىسى