اقتوبە وبلىستىق سوتىندا ۇستىمىزدەگى جىلدىڭ العاشقى توقسانىندا وبلىس سوتتارىنىڭ اتقارعان جۇمىسى جانە ازاماتتىق سوت وندىرىسىنە سۋديانىڭ قاتىسۋىمەن بىتىمگەرشىلىك راسىمدەردى (سوت مەدياتسياسى) ەنگىزۋدىڭ قاناتقاقتى جوباسىن تۇسىندىرۋگە ارنالعان ءباسپاسوز ءماسليحاتى وتكىزىلدى.
وندا وبلىستىق سوتتىڭ توراعاسى ەرلان ايتجانوۆ سوت ىستەرى بويىنشا ستاتيستيكالىق دەرەكتەر مەن قارالعان ىستەر بويىنشا جازا تاعايىنداۋ, سوتقا كوپ تۇسەتىن ىستەر ساناتى, ەلەكتروندى سوت ءىسىن جۇرگىزۋ جونىندە مالىمەتتى جاريالاپ, سوت مەدياتسياسى قاناتقاقتى جوباسىن ءتۇسىندىردى. سودان كەيىن كەڭسە باسشىسى اسەت مامبەتوۆكە ءسوز بەردى. ول ءوز كەزەگىندە جوعارعى سوت ارقىلى ىسكە قوسىلعان ورتالىقتاندىرىلعان جەرگىلىكتى سوتتاردىڭ ينتەرنەت رەسۋرسى بويىنشا جاڭالىقتار – ساll-ورتالىعى, ىستەردىڭ قارالۋى, سوتقا بارۋدىڭ كارتاسى, جوعارعى سوتتا يگەرىلگەن بەينە-ترانسلياتسيا, الداعى ۋاقىتتا ەنگىزىلەتىن ونلاين قابىلداۋ بويىنشا اقپارات بەرىپ, حالىققا قىزمەت كورسەتۋدە سوت جۇيەسىنىڭ ءبىرشاما ىلگەرىلەگەنىن اتاپ ءوتتى.
وسى كەزەڭدە اقتوبە وبلىسىنىڭ سوتتارىمەن سوت تورەلىگىن جۇزەگە اسىرۋ, ساپاسىن كوتەرۋ مەن سوت ىستەرىن جەدەل قاراۋ, سونداي-اق, مەملەكەتتىك جانە ورىنداۋشىلىق ءتارتىپتى كوتەرۋگە باعىتتالعان بىرقاتار كەشەندى شارالار جۇزەگە اسىرىلعان. سوت ءىسىن ەلەكتروندى جۇرگىزۋ بويىنشا ناسيحات جۇمىستارى دا بەلسەندى جۇرگىزىلىپ كەلەدى ەكەن. وبلىس سوتتارىندا 1010 تالاپ-ارىز ەلەكتروندىق نۇسقادا قابىلدانعان. سونداي-اق, كورسەتىلگەن كەزەڭدە وبلىس سوتتارىندا 3585 سوت ءماجىلىسى ءۇن-بەينە جازبا قۇرىلعىسىن قولدانۋ ارقىلى وتكىزىلگەن, 2013 جىلدىڭ سايكەس كەزەڭىندە بۇل كورسەتكىش 2531-ءدى قۇراپتى. ءبىرىنشى توقساندا وبلىس سوتتارىمەن تاراپتارعا 2249 سمس حابارلاما جولدانسا, «ەلەكتروندىق باقىلاۋ جۇيەسى» قاناتقاقتى جوباسىمەن سوتتارعا ءوز ىستەرى بويىنشا اقپارات الۋ ءۇشىن بارلىعى پارول الۋعا 28 ازامات ارىزبەن جۇگىنگەن.
وتكەن كەزەڭدە وبلىس سوتتارىمەن بارلىعى 585 قىلمىستىق ءىس قارالعان. سوتتالعانداردىڭ باسىم كوپشىلىگى ۇرلىق, توناۋشىلىق, بۇزاقىلىق, دەنساۋلىققا قاساقانا اۋىر جانە ورتاشا اۋىرلىقتاعى زيان كەلتىرگەنى ءۇشىن جازالانعان. ازاماتتىق ءىس جۇرگىزۋ وندىرىسىندە تۇرعىن ءۇي جانە وتباسى داۋلارى باسىم, سونىڭ ىشىندە اليمەنت ءوندىرۋ بويىنشا داۋلار, سونداي-اق, نەسيە ماسەلەلەرى, سالىق تولەمدەرى بويىنشا سالىق ورگاندارىنىڭ تالاپتارى, شارتتىق مىندەتتەمەلەر جانە مەملەكەتتىك ساتىپ الۋ تۋرالى داۋلار بارشىلىق.
ءباسپاسوز ءماسليحاتىنا قاتىسقان بۇقارالىق اقپارات قۇرالدارى وكىلدەرىنىڭ بىرقاتار سۇراقتارىنا ناقتى جاۋاپ بەرىلدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.