مەن بەيبىتشىلىك جانە كەلىسىم سارايىندا «قازاقستان-2050» ستراتەگياسى: بەيبىتشىلىك, رۋحانيات جانە كەلىسىم مادەنيەتى» اتتى تاقىرىپتا وتكەن قازاقستان حالقى اسسامبلەياسىنىڭ ءححى سەسسياسىنان قاناتتانىپ ورالدىم. مۇنداي بەدەلدى جيىنعا العاش قاتىسقاندىقتان, ەلباسىنىڭ ءسوزىن ءۇلكەن تولعانىسپەن تىڭداپ, كوڭىلىمە تاعىلىمدى ويلار ءتۇيدىم.
ءبىز, تاۋەلسىز ەلدىڭ ۇرپاقتارى, قازاقستاننىڭ بىرلىك پەن تۇراقتىلىقتىڭ تال بەسىگىنە اينالعانىن اركەز ماقتان ەتەمىز. قارا شاڭىراعىمىزدىڭ شايقالماۋىن تىلەيمىز. ەلباسىمىز ەل ءبىرلىگىنىڭ باستاۋى ءتىلى باسقا تىلەگى ءبىر, ءجۇزى باسقا جۇرەگى ءبىر ۇلتتار مەن ۇلىستاردىڭ ءوزارا جۇدىرىقتاي جۇمىلعان تاتۋلىعىندا, ورتاق ماقسات جولىنداعى اۋىزبىرلىگىندە ەكەنىن ۇنەمى ايتىپ, جول سىلتەپ كەلەدى.
وسى جولى دا عاسىرلار بويى جالعاسىپ, قاسيەتتى قۇندىلىقتار مەن ۇلتتىق ۇلى مۇراتتارعا جەتەلەپ كەلە جاتقان بەيبىتشىلىك, رۋحانيات, كەلىسىم سەسسيانىڭ باستى ارقاۋىنا اينالىپ, ءححى عاسىردىڭ ەڭ باستى زاڭدىلىعى رەتىندە كولدەنەڭ تارتىلدى. ەلىمىزدىڭ ءار قيىرىنان كەلگەن ءتۇرلى ەتنوس وكىلدەرى مەن سان الۋان ماماندىق, كاسىپ يەلەرى تولەرانتتىلىق, دوستىق, باۋىرلاستىق يدەيالارىنىڭ قانشالىقتى قىمبات تا قاستەرلى ەكەنىن جان جۇرەكتەرىمەن ۇعىپ, پرەزيدەنتىمىزدىڭ سىندارلى ۇلتتىق ساياساتىنا, قازاقستان حالقى اسسامبلەياسىنىڭ وتانىمىزدىڭ وركەندەۋىنىڭ سەنىمدى تىرەگىنە اينالعانىنا ءبىراۋىزدان قولداۋ ءبىلدىردى.
مەملەكەت باسشىسى ءوز سوزىندە ءبىزدىڭ قوعامدا ەشكىمنىڭ دە ەتنوستىق ارتىقشىلىعى جوق جانە ءبارى دە زاڭ الدىندا تەڭ ەكەنىن قاداپ ايتتى. ونىڭ جارقىن ۇلگىسىن بارلىق قازاقستاندىقتار ءىس جۇزىندە ايقىن سەزىنىپ وتىر. وبلىستا بۇگىندە 40 مىڭعا جۋىق ۋكرايندىق تۇرادى. ۇلتتىق ءداستۇرلەرىمىزدى قاستەرلەپ, انا ءتىلىمىزدى ءبىلىپ-ۇيرەنۋگە بارلىق جاعداي جاسالعان. 2050 ستراتەگياسىنىڭ تالاپتارىن ورىنداۋعا باعىتتالعان شارالارعا بەلسەندىلىكپەن قاتىسىپ كەلەمىز.
وزىمە كەلەتىن بولسام, ورىس مەكتەبىنىڭ 11-سىنىبىندا وقيمىن. سوعان قاراماستان, مەملەكەتتىك ءتىلدى مەڭگەرۋگە دەن قويىپ ءجۇرمىن. قازىر جەتىك ۇيرەنىپ قالدىم. ويتكەنى, قازاقستان – وتانىمىز, تاعدىرىمىز ءبىر. تۋعان ەلىمىز, كىندىك قانىمىز تامعان جەرىمىز قازاقستان بولعاندىقتان, ونسىز كەلەشەگىمىزدى, بولاشاعىمىزدى ەلەستەتۋدىڭ ءوزى قيىن. ءبارىمىز دە ءبىرتۇتاس تاۋەلسىز ەلدىڭ بىرتەكتى بالالارىمىز.
ەلباسى ءبىز سياقتى جاس ۇرپاققا ۇلكەن سەنىم ارتىپ, كەلىسىم مادەنيەتىن ءداستۇر رەتىندە ۇرپاققا مۇرا ەتۋ اماناتىن, ەكونوميكامىزدىڭ دامۋى, حالىقتىڭ ءال-اۋقاتىنىڭ جاقسارۋى ءۇشىن ورتاق جاۋاپكەرشىلىك, جالپىعا ورتاق ەڭبەك قوعامىن قالىپتاستىرۋ تالاپتارىن جۇكتەدى. ءبىر-ءبىرىمىزدىڭ جاقسى قاسيەتتەرىمىزدى بىلۋگە شاقىردى.
وسىلايشا, قازاقستاندىق بەيبىتشىلىك, رۋحانيات پەن كەلىسىم ءمادەنيەتىنىڭ جەتى ارقاۋلىق قاعيداتتارىن بويىمىزعا ءسىڭىرىپ, سەسسيادان رۋحتانىپ قايتتىق.
ناتاليا پەتروۆا,
ۋكراين ەتنومادەني بىرلەستىگىنىڭ مۇشەسى.
سولتۇستىك قازاقستان وبلىسى,
ع.مۇسىرەپوۆ اۋدانى.