ورتالىق رەفەرەندۋم كوميسسياسىنىڭ رەسپۋبليكالىق رەفەرەندۋمدى ۇيىمداستىرۋ مەن وتكىزۋ ماسەلەلەرى جونىندەگى وتىرىسى ءوتتى. وتىرىسقا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن باق وكىلدەرى, ال بەينەكونفەرەنتسيا بايلانىسى رەجىمىندە وبلىستاردىڭ, نۇر-سۇلتان, الماتى جانە شىمكەنت قالالارى اكىمدىكتەرىنىڭ اپپارات باسشىلارى جانە اۋماقتىق رەفەرەندۋم كوميسسيالارىنىڭ مۇشەلەرى قاتىستى.
وتىرىس بارىسىندا جالپىحالىقتىق رەفەرەندۋمعا دايىندىق بارىسى جان-جاقتى پىسىقتالدى. اتاپ ايتقاندا, جەرگىلىكتى اتقارۋشى ورگانداردىڭ داۋىس بەرۋگە ارنالعان ۋچاسكەلەردى ماتەريالدىق-تەحنيكالىق جاراقتاندىرۋ, مۇمكىندىگى شەكتەۋلى ادامداردىڭ قۇقىقتارىن قامتاماسىز ەتۋ جونىندە جاعدايلار جاساۋ, رەفەرەندۋم كوميسسياسىنا رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرىن بەرۋ جونىندە جۇرگىزگەن جۇمىستارى ءسوز بولدى. سونىمەن قاتار, رەفەرەندۋم وتكىزۋ كەزىندە داۋىس بەرۋگە ارنالعان بيۋللەتەندەردىڭ سانىن بەلگىلەۋ, داۋىس بەرۋ جانە ونىڭ قورىتىندىلارىن شىعارۋ ءتارتىبى جان-جاقتى تالقىلاندى.
وسى ماسەلەلەر بويىنشا بايانداعان وبلىستاردىڭ, نۇر-سۇلتان, الماتى جانە شىمكەنت قالالارى اكىمدىكتەرىنىڭ اپپارات باسشىلارى داۋىس بەرۋگە ارنالعان ۋچاسكەلەردى ماتەريالدىق-تەحنيكالىق جاراقتاندىرۋ, مۇمكىندىگى شەكتەۋلى ادامداردىڭ قۇقىقتارىن قامتاماسىز ەتۋ بويىنشا جاعدايلار جاساۋ جونىندە جۇرگىزىلگەن جۇمىستار تۋرالى حابارلادى.
ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ ەل اۋماعىندا داۋىس بەرۋگە ارنالعان 10 013 ۋچاسكە جۇمىس ىستەيتىنىن اتاپ ءوتتى. سونداي-اق ول جەرگىلىكتى اتقارۋشى ورگانداردىڭ قۇزىرەتى اياسىنداعى داۋىس بەرۋ كۇنىن ۇيىمداستىرۋ جونىندەگى بارلىق ماسەلەلەر مىندەتتى تۇردە شەشىلۋى قاجەتتىگىن جانە ەرەكشە باقىلاۋدا بولۋى ءتيىس ەكەنىن اتاپ ءوتتى.
كوميسسيا حاتشىسى مۇحتار ەرمان «رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 27-بابىنا سايكەس داۋىس بەرۋگە ارنالعان بيۋللەتەندەردى دايىنداۋ ءتارتىبىن ورتالىق رەفەرەندۋم كوميسسياسى ايقىندايتىنىن حابارلادى.
كونستيتۋتسيالىق زاڭنىڭ نورمالارىنا سۇيەنە وتىرىپ, ورتالىق رەفەرەندۋم كوميسسياسىنىڭ «2022 جىلعى 5 ماۋسىمعا تاعايىندالعان رەسپۋبليكالىق رەفەرەندۋم وتكىزۋ كەزىندە داۋىس بەرۋگە ارنالعان بيۋللەتەندەردىڭ سانىن بەلگىلەۋ تۋرالى» قاۋلىسى قابىلداندى. كونستيتۋتسيالىق زاڭدا بەلگىلەنگەن تارتىپپەن رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرى رەفەرەندۋم كوميسسياسىنا ۇسىنىلىپ, ءتيىستى اكىمنىڭ قولى قويىلدى.
وبلىستاردىڭ, نۇر-سۇلتان, الماتى, شىمكەنت قالالارى اكىمدىكتەرىنىڭ, رەسپۋبليكا بويىنشا جەرگىلىكتى اتقارۋشى ورگانداردىڭ وكىلدەرى ۇسىنعان مالىمەتتەر مەن ەسەپتەرگە سايكەس تىزىمدەرگە 11 722 536 ازامات ەنگىزىلدى.
وتىرىس سوڭىندا ن.ءابدىروۆ ازاماتتاردى داۋىس بەرۋ ۋاقىتى مەن ورنى تۋرالى كەڭىنەن حاباردار ەتۋ جونىندە جۇمىس جۇرگىزۋ قاجەتتىگىن العا تارتتى. «بۇل ءداستۇرلى تۇردە قولدانىلىپ وتىرعان «داۋىس بەرۋگە شاقىرۋ قاعازدارى» سياقتى تاسىلدەردەن باستاپ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ زاماناۋي گادجەتتەرى مەن SMS-حابارلامالارىن پايدالانۋعا دەيىنگى اقپاراتتاندىرۋدىڭ ءارتۇرلى, ىڭعايلى ءارى ءتيىمدى تاسىلدەرى بولۋى ءتيىس», دەپ اتاپ ءوتتى ول.
ن.ءابدىروۆ الداعى رەسپۋبليكالىق رەفەرەندۋمعا قوعامدىق بىرلەستىكتەر وكىلدەرىنىڭ, باق وكىلدەرىنىڭ, شەت مەملەكەتتەردەن بايقاۋشىلاردىڭ قاتىسۋ ماسەلەلەرىنە, سونداي-اق ۋچاسكەلىك رەفەرەندۋم كوميسسيالارىنىڭ مۇشەلەرىن داۋىس بەرۋ كۇنى الدىندا وقىتۋعا, ونىڭ ىشىندە ازاماتتاردىڭ «ەلەكتروندىق ۇكىمەت» پورتالىندا تىركەلگەن جەرى بويىنشا مالىمەتتەردى تەكسەرۋ ونلاين-سەرۆيسىنىڭ جۇمىسى بويىنشا وقىتۋعا ەرەكشە نازار اۋدارۋ قاجەتتىگىن اتاپ ءوتتى.
سونداي-اق, ورتالىق رەفەرەندۋم كوميسسياسىنىڭ باسشىسى وتىرىسقا قاتىسۋشىلاردى رەفەرەندۋمعا دايىندىق جانە ونى وتكىزۋ ماسەلەلەرى بويىنشا ورك مۇشەلەرىنىڭ وڭىرلەرگە ينسپەكتسيالىق ساپارلارى جوسپارلانىپ وتىرعانى تۋرالى حابارلادى. اتاپ ايتقاندا, حالىقتى اقپاراتتاندىرۋ, ۋچاسكەلەردىڭ داۋىس بەرۋ كۇنىنە دايىندىعى جانە ازاماتتاردىڭ داۋىس بەرۋى ءۇشىن, ونىڭ ىشىندە داۋىس بەرۋ كەزىندە مۇگەدەكتىگى بار جانە ەرەكشە قاجەتتىلىكتەرى بار ازاماتتار ءۇشىن قاجەتتى جاعدايلار جاساۋ ماسەلەلەرى قارالاتىن بولادى.
وتىرىستىڭ سوڭىندا باق وكىلدەرىنە ارنالعان ءداستۇرلى بريفينگ ءوتتى.