ەۋروپا ەلدەرى كوروناۆيرۋستى ماۋسىمدىق تۇماۋ سەكىلدى ىندەتتەرگە تەڭەپ, ەلدەگى قاۋىپسىزدىك شارالارىن ايتارلىقتاي جەڭىلدەتە باستادى.
ساۋىردەن باستاپ بەرليندە كوروناۆيرۋسقا قاتىستى بارلىق دەرلىك شەكتەۋ جويىلدى. كەلەسى جەكسەنبىدە كارانتيندىك تالاپتار گەرمانيانىڭ باسقا فەدەرالدى جەرلەرىنىڭ باسىم كوپشىلىگىندە الىنادى. ويتكەنى قازىر گەرمانيادا كوروناۆيرۋستىڭ اسا قاۋىپتى ەمەس «وميكرون» نۇسقاسى تارالۋدا. ەكىنشىدەن, گەرمانيا تۇرعىندارىنىڭ 76 پايىزى قازىردىڭ وزىندە تولىعىمەن ۆاكتسينالانعان, سوندىقتان ينفەكتسيا بولعان جاعدايدا دا اۋرۋ وڭاي وتەدى. ۇشىنشىدەن, 20 ناۋرىزدا ەلدىڭ بۇرىنعى رەداكتسياداعى «جۇقپالى اۋرۋلاردىڭ الدىن الۋ جانە وعان قارسى كۇرەس تۋرالى» زاڭىنىڭ مەرزىمى اياقتالدى. بۇل زاڭ ەل بيلىگىنە ماسكا تاعۋدى تالاپ ەتۋگە, ۆاكتسينا سەرتيفيكاتتارىن ەنگىزۋگە جانە باسقا دا شەكتەۋلەردى قولدانۋعا مۇمكىندىك بەرگەن ەدى.
يسپانيادا COVID-19 پاندەمياسى جاريالانعاننان كەيىن ەكى جىل وتكەندە كوروناۆيرۋس ينفەكتسياسى تۇماۋ سياقتى ادەتتەگى ەندەميكالىق اۋرۋمەن تەڭەستىرىلەدى. Sars-CoV-2 ۆيرۋسىن جۇقتىرىپ, اۋرۋدىڭ بەلگىلەرى كورىنبەگەن ناۋقاستار قالىپتى ءومىر سالتىن جالعاستىرا بەرەدى جانە ۇيدە كارانتيندە وتىرۋعا مىندەتتەلمەيدى. تەك 60 جاستان اسقان ازاماتتار, يممۋنيتەتى تومەن ادامدار, سونداي-اق جۇكتى ايەلدەر مەن مەديتسينا قىزمەتكەرلەرىنە تالاپ بۇرىنعىداي قالا بەرەدى. ۆيرۋستىڭ تارالۋىن توقتاتۋعا باعىتتالعان ءبىر كەزدەگى شارالاردان تەك جابىق قوعامدىق ورىنداردا, قوعامدىق كولىكتەردە – اۆتوبۋس, پويىز, ۇشاقتاردا مەديتسينالىق ماسكا تاعۋ مىندەتى عانا قالعان.
وتكەن اپتادا الەمدە 10 ميلليوننان استام ادام كوروناۆيرۋس ينفەكتسياسىن جۇقتىرىپ, 45 مىڭنان استام ناۋقاس قايتىس بولعانى حابارلاندى. بۇل كورسەتكىشتى الدىڭعى اپتامەن سالىستىرعاندا كوز جۇمعاندار سانى 43 پايىز ءوسىپ, ينفەكتسيانىڭ 14 پايىزعا ازايعانىن اڭعارۋعا بولادى. دۇنيەجۇزىلىك دەنساۋلىق ساقتاۋ ۇيىمىنىڭ اپتالىق بيۋللەتەنىندە ايتىلعانداي, 21-27 ناۋرىز ارالىعىندا COVID-19 جۇقتىرعاندار سانى الدىڭعى اپتامەن سالىستىرعاندا 14 پايىزعا تومەندەدى. الايدا ءدال وسى كەزەڭدە ءولىم سانى 43 پايىزعا ارتتى. بۇل امەريكا ءوڭىرىنىڭ كەيبىر ەلدەرىندە (چيلي جانە اقش) COVID-19 ءولىمىن انىقتاۋداعى وزگەرىستەرگە جانە ءۇندىستان مەن وڭتۇستىك-شىعىس ازيا وڭىرىنەن الىنعان دەرەكتەردى تۇزەتۋگە بايلانىستى بولىپ وتىر.
ء«بىر اپتا ىشىندە ددۇ-عا 10 805 132 ادامنىڭ ينفەكتسيا جۇقتىرعانى تۋرالى حابارلاما ءتۇستى. 45 711 ءولىم دەرەگى تىركەلدى. وتكەن اپتامەن سالىستىرعاندا اۋرۋ جۇقتىرعاندار سانى التى وڭىردە ازايعان. اسىرەسە شىعىس جەرورتا تەڭىزىن, افريكا مەن باتىس تىنىق مۇحيتى ءوڭىرىن اتاپ ءوتۋ كەرەك. ەۋروپادا 4 پايىزعا تومەندەگەن. امەريكا مەن وڭتۇستىك-شىعىس ازيادا كوز جۇمعاندار سانى ارتتى», دەلىنگەن بيۋللەتەندە. دەگەنمەن ددۇ الەم بويىنشا ۆيرۋس جۇقتىرعاندار سانى ازايىپ كەلە جاتقانىن مالىمدەدى.
ماماندار جاعدايدىڭ تۇراقتالۋىن حالىقتىڭ كوپ بولىگى ۆاكتسينا العانىمەن بايلانىستىرادى. اسىرەسە ۆاكتسينالانعاندار كورسەتكىشى جوعارى ەۋروپا ەلدەرىندەگى بۇگىنگى احۋال وسىنىڭ دالەلى دەيدى. سونداي-اق جاقىندا رەسەيدە مۇرىن ارقىلى قابىلداۋعا ارنالعان كوروناۆيرۋسقا قارسى ۆاكتسينا تىركەلدى. الەمدە مۇنداي پرەپارات بۇعان دەيىن بولماعان. مۇرىنعا ارنالعان ۆاكتسينا ەكى دوزادان تۇرادى جانە ءۇش اپتا ارالىقپەن ەنگىزىلەدى. قازىرگى كەزەڭدە ۆاكتسينانى 18 جانە ودان جوعارى جاستاعى ادامدارعا ۆاكتسينوپروفيلاكتيكانى جۇزەگە اسىراتىن مەديتسينالىق ۇيىمدار جاعدايىندا قولدانۋعا رۇقسات ەتىلگەنى حابارلاندى.