مەملەكەت باسشىسى قاسىم-جومارت كەمەل ۇلى توقاەۆتىڭ قاھارلى قاڭتاردان بەرى بۇكىل ەل تاعاتسىزدانا كۇتكەن جولداۋى جاريا ەتىلدى. بۇل ءبىر قالىڭ بۇقارانىڭ كوڭىلىنەن شىققان, ەل مەن جەردىڭ مارتەبەسىن كوتەرگەن, مەرەيىن تاسىتقان تاعدىرلى جولداۋ بولدى.
ەڭ باستىسى, دانىشپان, دانا اباي داڭقى تاعى ءبىر اسقاقتادى. جەر ءجانناتى جەتىسۋ قاناتىن قايتا جايدى. ۇلت ۇياسى ۇلىتاۋ تاريح ساحناسىنا شىقتى. جاڭا وبلىستاردىڭ اتى دا, زاتى دا – قازاق بايتاعىنىڭ ۇلىلىعىن, كەڭ شالقار پەيىلىن, بايلىق-بەرەكەسىن, ىرىس-ىنتىماعىن پاش ەتكەندەي, بارىنشا كوزگە ىستىق, جۇرەككە جاقىن اتاۋلار. سونداي-اق قاپشاعاي قالاسىنىڭ حالقىمىزدىڭ تاۋ تۇلعالارىنىڭ ءبىرى, اياۋلى دىنمۇحامەد احمەت ۇلى قوناەۆ ەسىمىمەن اتالۋى دا كوپشىلىكتىڭ كوپتەن كوكەيىندە جۇرگەن قالاۋلى ءبىر شارا ەدى. ونىڭ دا ورايى ەندى كەلدى.
قاراعاندى, جەزقازعان وڭىرىندە تۇرعىندارمەن كەزدەسكەندە, ەل اعالارىمەن پىكىرلەسكەندە وسى ماسەلەلەرگە ءجيى نازار اۋدارىلۋشى ەدى. ەستى ازاماتتاردىڭ بارلىعى دەرلىك ءتۇرلى سەبەپتەرمەن ءبىراز تۇسالىپ, توقىراپ قالعان ەل تىرشىلىگىنە ءنار بەرۋدىڭ, جان ءبىتىرۋدىڭ قاسقا ءبىر جولى وسى دەگەن ويعا تابان تىرەي بەرۋشى ەدى. مەملەكەت باسشىسى وسى تالاپ-تىلەكتەردىڭ تامىرىن تاپ باستى. اق تۇيەنىڭ قارنى جارىلعانداي, اسپاننان شۇعا جاۋعانداي, اق جارىلقاپ كۇن بولدى بۇل!
كەيبىر كەرىتارتپا اعايىندار وسىنشا جاڭا قۇرىلىمداردىڭ ەل ەكونوميكاسىنا اسەرى قالاي بولادى دەگەندى دە ايتىپ جاتىر. مەنىڭشە, وڭ, تەك وڭ اسەرى بولادى! ماسەلەن, جەزقازعان وبلىس مارتەبەسىنەن ايىرىلعالى بەرى ەپتەپ ەتەك-جەڭىن جيناپ العان «قازاقمىس» سىندى الپاۋىت كاسىپورىندار قايتا قايىرىلىپ, جاڭاشا جاعدايدا, تىڭ قارقىنمەن ەڭبەك ەتەتىنى ءسوزسىز. سونىمەن قاتار وڭ وزگەرىستەر ۇلىتاۋعا ىرگەلەس جاتقان قىزىلوردا وبلىسى, تورعاي-ارقالىق اۋماعىن دا قامتىماق. كاسىپكەرلىككە جان-جاقتى قولداۋ كورسەتىلىپ, جاڭا جۇمىس ورىندارى كوپتەپ اشىلادى. قاڭىراپ قالعان قالاعا ەل ورالادى, تۋسىراپ جاتقان دالاعا مال تولادى, ەڭبەك دابىلى قايتا قاعىلادى. ءبىر سوزبەن, بۇل شەشىمدەردىڭ ستراتەگيالىق ءمان-ماڭىزى ەرەكشە.
مەملەكەت باسشىسى ەلدىڭ الداعى الەۋمەتتىك-ەكونوميكالىق دامۋىنىڭ نەگىزگى باعىتتارى تۋرالى تارقاتىپ ايتا كەلىپ, قورىتىندى سوزىندە: «مەن ءۇشىن ەڭ باستىسى – ەلدىڭ اماندىعى, جەردىڭ تۇتاستىعى. تاۋەلسىزدىكتى تۇراقتى, باياندى ەتۋدىڭ بىردەن ءبىر كىلتى وسى ەكى ۇستىن» دەپ اتاپ كورسەتتى. قازىرگى كۇردەلى جاعدايدا الدىمىزدا تۇرعان باستى مىندەت – ساياسي, الەۋمەتتىك-ەكونوميكالىق تۇراقتىلىقتى, جۇمىس ورىندارىن جانە حالىقتىڭ الەۋەتىن, ءال-اۋقاتىن ساقتاپ قالۋ. سول تۇرعىدا باسىم باعىتتار ايقىندالدى, ناقتىلى تاپسىرمالار بەرىلدى. ەندى سونى جۇزەگە اسىرۋ ماقساتىندا جۇمىلا جۇمىس جۇرگىزۋ عانا قالدى.
نۇرلان دۋلاتبەكوۆ,
ۇعا كوررەسپوندەنت-مۇشەسى, زاڭ عىلىمدارىنىڭ دوكتورى,
اكادەميك ە.ا.بوكەتوۆ اتىنداعى قاراعاندى ۋنيۆەرسيتەتىنىڭ رەكتورى
قاراعاندى