بيىل تۋعانىنا 100 جىل تولاتىن كورنەكتى قالامگەر, حالىق جازۋشىسى, ۇلى وتان سوعىسىنىڭ وت-جالىنىنان وتكەن, ەرلىك پەن ەلدىكتىڭ مارتەبەسىن ەرەكشە كوتەرگەن, ماحاببات پەن مەيىرىمنىڭ كەرەمەت جىرشىسى اتانعان ءازىلحان نۇرشايىقوۆ كەزىندە جامبىل وبلىسىنىڭ, بەتباقدالانىڭ بەدىرەيگەن بەلىمەن شەكتەسەتىن, شالعايدا جاتقان اۋدانى – مويىنقۇمعا ءجيى ات ءىزىن سالۋشى ەدى.
سەبەبى ازەكەڭدى اۋپارتكومنىڭ ءبىرىنشى حاتشىسى, ءوزى دە سوعىس ارداگەرى ءارى قۇرداسى ايتباي نازاربەكوۆ ءاردايىم شىن كوڭىلمەن ەلگە شاقىرىپ, الماتىدان بەس ءجۇز شاقىرىم جەردەگى ءشولدى ايماققا جەتكەندە قۇشاعىن كەڭىنەن اشىپ, قۋانا قارسى الاتىن.
سوندا جازۋشى ەكى مارتە سوتسياليستىك ەڭبەك ەرى جازىلبەك قۋانىشباەۆتىڭ قاراپايىمدىلىقتىڭ لەبى ەسسە دە, تاعىلىمى مول تاماشا اڭگىمەلەرىن جالىقپاي تىڭداپ, باسقا دا اۋىل ەڭبەككەرلەرىمەن جۇزدەسەتىن. وندا تۇيگەن ويلارىنىڭ كوبى كەيىننەن بىرقاتار ادەمى اڭگىمە, وچەركتەرىنە ارقاۋ بولدى عوي.
ءبىر قىزىعى, ازەكەڭ مويىنقۇمعا كوپ ساپارلاتىپ ءجۇرىپ ايتەكەڭ مەن ول باسقارعان اۋدان جايىندا «رايكوم حاتشىسى» دەگەن شارتتى اتاۋمەن رومان جازا باستاعان ەكەن. بىراق كەڭەس وكىمەتىنىڭ كەلمەسكە كەتۋى ول ەڭبەگىنىڭ اياقسىز قالۋىنا اسەر ەتكەن سەكىلدى...
ەندى وتكەن عاسىردىڭ جەتپىسىنشى جىلدارىنىڭ سوڭىندا تۇسىرىلگەن مىنا سۋرەتكە كەلەيىك. وڭ جاقتان ەكىنشى, ارينە, ازەكەڭ. ال سول جاقتان باستاساق – اۋپارتكومنىڭ ناسيحات جانە ۇگىت ءبولىمىنىڭ مەڭگەرۋشىسى (كەيىننەن ءۇشىنشى حاتشى دا بولعان), ايماقتىڭ الەۋمەتتىك سالاسىنىڭ دامۋىنا ۇلكەن ۇلەس قوسقان, مارقۇم جۇمابەك ورىنباەۆ, قازاق كسر جوعارعى كەڭەسىنىڭ دەپۋتاتى, مارقۇم ايتباي نازاربەكوۆ, قۇرىلىس سالاسىنىڭ بىلىكتى مامانى, وسى اۋداندى باسقارعان, كەيىننەن جوعارعى كەڭەستىڭ دەپۋتاتى بولعان, مارقۇم مۇرات سەيداليەۆ, مويىنقۇمنىڭ قادىرلى قوناعىنىڭ ءبىرى, قىرعىزدىڭ بەلگىلى اقىن-جىرشىسى ەستەمەس تۇرسىناليەۆ, اۋدانداعى №2006 پمك-عا جەمىستى جەتەكشىلىك ەتىپ, وسى ءوڭىردىڭ اتاعىن الىسقا شىعارعان وتە ىسكەر ازامات, مارقۇم يۆان ەكگاردت.
ەڭ شەتتە تۇرعان كىسىنى انىقتاۋ مۇمكىن بولمادى, بالانىڭ دا كىم ەكەنى بەلگىسىز...
بەرىكباي قادىقوۆ,
جۋرناليست
الماتى وبلىسى,
قاراساي اۋدانى