كوللەدج ستۋدەنتتەرى شەتەلدەردە تاجىريبەدەن ءوتىپ ءجۇر

ءبىلىم جانە عىلىم مينيسترلىگىنىڭ مالىم­دەۋىنشە, گەولوگيالىق بارلاۋ كوللەدجى­نىڭ تۇلەكتەرى جۇمىسقا ورنالاستىرۋ دەڭگەيى 96%-دى قۇرايدى. مۇنداي ناتيجە وقۋ ورنىنداعى جۇيەلى جۇمىستىڭ جەمىسى ىسپەتتى. سەبەبى اتال­عان كوللەدجدە كاسىپتىك باعدار بەرۋ, جۇمىس­قا ورنالاستىرۋ جانە مونيتورينگ ءبولىمى جۇ­مىس ىستەيدى. تجكب ۇيىمدارىنىڭ جۇمىس بەرۋ­شىلەرمەن قول جەتكىزگەن كەلىسىمدەرىنىڭ ناتي­جەسىندە تۇلەكتەر جۇمىسقا ورنالاستىرىلدى, ال كوللەدج ستۋدەنتتەرى ەلىمىزدە جانە شەتەلدە ەڭبەگى تولەنەتىن پراكتيكادان وتەدى. جىل سايىن كوللەدجگە قازاقستاننىڭ بارلىق وڭىرىنەن ەكى جۇزدەن اسا تالاپكەر وقۋعا تۇسەدى.

گەولوگيالىق بارلاۋ كوللەدجىنىڭ ديرەكتورى ارداق ءادىلجانوۆ: «كوللەدج ءوز ستۋدەنتتەرىنىڭ تاجىريبەدەن ءوتىپ, ودان ءارى سول جەردە جۇمىس ىستەۋى ءۇشىن ءىرى كومپانيالارمەن بايلانىس ورناتادى. بۇگىنگى تاڭدا 250-دەن اسا گەو­لوگيالىق كاسىپورىن ءبىزدىڭ تۇراقتى سەرىك­تەس­تەرىمىزگە اينالعان جانە ۇيىمدار اراسىندا پراكتيكانتتار مەن جاس ماماندارعا دەگەن سۇرانىس وتە جوعارى. تاجىريبەدەن وتۋشىلەردىڭ 90%-ى جالاقى الادى. شەتەلدىك قىزمەتكەرلەردى قازاقستاندىق ماماندارمەن كەزەڭ-كەزەڭمەن اۋىستىرۋدى كوزدەيتىن كادر­لاردى ۇلتتاندىرۋ باعدارلاماسىنا سايكەس, كوللەدج ەل اۋماعىندا جۇمىس ىستەيتىن حالىق­ارالىق كومپانيالارمەن ىنتىماقتاستىق ورناتىپ وتىر», دەيدى.

كوللەدج سەرىكتەستەرىنىڭ قاتارىندا «قازاتومونەركاسىپ» ۇاك» اق, «قازاقمىس», KazMinerals, Aurora Minerals Group, Rio Tinto, Schlumberger, «كازتسينك» جانە باسقا دا كاسىپورىندار بار.

تاعى ءبىر ەسكەرەتىن دۇنيە, اتالعان وقۋ ورنى جۇمىسقا ورنالاسقاننان كەيىن دە كوللەدج تۇلەكتەرىمەن بايلانىستا بولادى. بۇل كاسىپورىن جابىلعان نەمەسە كادرلار قىسقارعان جاعدايدا كوللەدج ستۋدەنتتەرىن ودان ءارى جۇمىسقا ورنالاستىرۋ ءۇشىن قاجەت.

كوللەدج اكىمشىلىگىنىڭ اقپاراتىنا سۇيەنسەك, 90 جىلدىق تاريحىندا كاسىپتىك ءبىلىم بەرەتىن وقۋ ورنى 18 مىڭ بىلىكتى ورتا بۋىن گەولوگ ماماندارىن دايارلاپ شىعارعان. كوپتەگەن تۇلەك ءىرى كومپانيالاردىڭ, ەكولوگيا, گەولوگيا جانە تابيعي رەسۋرستار مينيسترلىگىنە قاراستى ۇيىمداردىڭ باسشىلىق لاۋازىمدارىندا قىزمەت ەتىپ جاتىر.