ناتو كەڭەسى نورۆەگيانىڭ ەكس-پرەمەرى يەنس ستولتەنبەرگتى اليانس باس حاتشىسىنىڭ ورىنتاعىنا تاعايىندادى. بۇل تۋرالى ناتو-نىڭ ءباسپاسوز قىزمەتى تاراتقان رەسمي مالىمدەمەگە سىلتەمە جاساعان يتار-تاسس حابارلادى.
«ناتو كەڭەسى يەنس ستولتەنبەرگتى سولتۇستىك اتلانت اليانسىنىڭ باس حاتشىسى ەتىپ تاعايىنداۋ تۋرالى شەشىم قابىلدادى», - دەلىنگەن قۇجاتتا.
55 جاستاعى يەنس ستولتەنبەرگ ناتو-نىڭ قازىرگى باس حاتشىسى اندەرس فوگ راسمۋسسەندى الماستىرادى. الماسۋ پروتسەسى بيىلعى جىلعى 4-5 قىركۇيەكتە ۋەلستە ناتو ءسامميتى وتكەننەن كەيىن جاسالادى.
جالپى, ۇستىمىزدەگى جىلى ناتو باس حاتشىسىن الماستىرۋ جوسپارلى شارا بولىپ تابىلادى. دانيانىڭ ەكس-پرەمەرى اندەرس فوگ راسمۋسسەن ساياسي اليانستىڭ ليدەرى ورىنتاعىنا 2009 جىلعى 1 تامىزدا كەلدى. وسىلايشا ول بۇل ورىندا 5 جىل, 2 اي وتىرماقشى. اليانس باس حاتشىسىنىڭ ستاندارتتى مانداتى 4 جىلعا ەسەپتەلگەن. الايدا, وداقتاستار ناتو اسكەرلەرىن اۋعانستاننان شىعارۋ پروتسەسىن اياقتاۋ جانە سولتۇستىك اتلانت اليانسىنىڭ اۋعان ناۋقانىن اياقتاۋ قورتىندىسىنا ارنالعان فينالدىق ءسامميتىن وتكىزۋ ءۇشىن وعان ۋاقىت بەرۋگە شەشىم قابىلدادى.
يەنس ستولتەنبەرگ نورۆەگيانىڭ پرەمەر-ءمينيسترى ورىنتاعىنا ءۇش رەت وتىردى. الدىمەن 2000-2001 جىلدارى حەل ماگنە بۋننەۆيكتىڭ كابينەتىنە جايعاستى. سوسىن 2005 جانە 2009 جىلدارى ەكى رەت سايلاۋدا جەڭىسكە جەتتى.
ساكەن مايلىباي.
دەرەككوز: يتار-تاسس.
فوتو: يتار-تاسس.