«Malaysia Airlines» اۋە كومپانياسىنىڭ جوعالعان Boeing-777-200 ۇشاعى اۆستراليانىڭ وڭتۇستىك-شىعىسىنداعى ءۇندى مۇحيتىنىڭ اكۆاتورياسىنان تابىلدى. بۇل تۋرالى يتار-تاسس حابارلادى.
بيىلعى 8 ناۋرىز كۇنى جوعالعان بۇل ۇشاق تۋرالى ءارتۇرلى بولجام ايتىلىپ كەلگەن ەدى. سول سوڭعى اقپارلاردىڭ بىرىندە ۇشاقتىڭ ۆەتنامعا قاراستى تحو-چۋ ارالىنان 300 شاقىرىم جەردە, ياعني سولتۇستىك-باتىستاعى كاماۋ مۇيىسىندە اپاتقا ۇشىراعانى تۋرالى بولجام ايتىلعان. كەيىن اۋە لاينەرىنىڭ ءۇندى مۇحيتى ۇستىمەن ۇشىپ ءوتىپ, اۆستراليا جاعالاۋىنا بەتتەگەنى بەلگىلى بولدى. وسىعان وراي ىزدەۋشىلەر وزدەرىنىڭ نازارلارىن سولاي قاراي اۋدارعان بولتىن. اقىرىندا سول جورامال دۇرىس شىقتى.
مالايزيا پرەمەر-ءمينيسترى 24 ناۋرىز كۇنى ىزدەۋ جۇمىستارىنىڭ قازىرگە دەيىنگى ناتيجەسى بويىنشا مالىمدەمە جاساپ, جوعالعان ۇشاقتىڭ قاڭقاسى تابىلعانىن جەتكىزدى. ول وسى ۋاقىتقا دەيىن ايتىلعانداردىڭ ءبارى بولجام عانا ەكەنىنە توقتالىپ, لاينەردىڭ اۆستراليانىڭ وڭتۇستىك-شىعىس قاپتالىنداعى ءۇندى مۇحيتىنا قۇلاعانىن راستادى.
ەسكە سالا كەتەيىك, ناۋرىزدىڭ 8-ىنە قاراعان ءتۇنى مالايزيانىڭ استاناسى – كۋالا-لۋمپۋر قالاسىنان ۇشىپ شىققان «بوينگ» ارادا ەكى ساعاتتاي ۋاقىت وتكەندە, باقىلاۋشى راداردىڭ نازارىنان تىسقارى قالىپ قويعان بولاتىن. سودان بەرى ونى قايتىپ كورگەن ەشكىم بولعان جوق. تەك باقىلاۋدان كەتىپ قالعان ۇشاقتىڭ اۋەدە تاعى جەتى ساعاتتان استام ۋاقىت ۇشىپ جۇرگەنى عانا بەلگىلى بولعان. ەندى, مىنە, ونىڭ قايدا بارىپ, قايدا قۇلاعانى انىقتالىپ وتىر. مالايزيا پرەمەر-ءمينيسترى وعان قاتىستى كەڭىرەك مالىمەتتىڭ بۇگىن جۇرگىزىلەتىن ءباسپاسوز ءماسليحاتىندا ايتىلاتىنىن ءسوز ەتتى.
جالپى, جوعالعان ۇشاقتا 227 جولاۋشى, 12 ەكيپاج مۇشەسى, بارلىعى 239 ادام بولعان ەدى. وكىنىشكە قاراي, سولاردىڭ ءبارىنىڭ اپات قۇرباندىعىنا ۇشىراعاندارى ەندى ايعاقتالىپ وتىر.
مالايزيا ۇكىمەتى مارقۇمداردىڭ وتباسىنا كوڭىل ايتۋ جەدەلحاتىن جولدادى.
ءامىرحان الماعانبەتوۆ.
دەرەككوز: يتار-تاسس.
فوتو: www.Ctv.by.