بيىل دا داريانىڭ دەڭگەيى تومەن. جازدا ارناسى تۇسكەنىمەن, قىستا تولىپ اعاتىن وزەنىڭ قاۋقارى بۇرىنعىداي بولماي تۇر. ايتەۋىر, بىلتىرعى باستاما ناتيجەسىندە ارالداعى كولدەر جۇيەسىنىڭ تولا باستاعانى عانا كوڭىلگە مەدەۋ.
سۋدىڭ ازدىعى كوكتەم شىعا ەگىس قامىنا كىرىسەتىن شارۋانىڭ كۇدىگىن كوبەيتىپ وتىر. وسىعان بايلانىستى «قىزىلوردا وبلىسىندا سۋ تاپشىلىعى جاعدايىندا ەلدى مەكەندەردى سۋارمالى سۋمەن قامتاماسىز ەتۋگە جانە ەكولوگيالىق جاعدايدى جاقسارتۋعا باعىتتالعان ءبىرىنشى كەزەكتەگى جوبالاردى ىسكە اسىرۋ جونىندەگى جول كارتاسى» جوباسى ازىرلەنىپ, ۇكىمەتكە ۇسىنىس جولداندى.
داريا دەڭگەيى, سۋدى ۇنەمدەۋ ماسەلەسى وبلىس اكىمى گۇلشارا ابدىقالىقوۆا مەن ەكولوگيا, گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ توراعاسى نۇرلان الدامجاروۆتىڭ كەزدەسۋىندە دە تالقىلاندى. وڭىردە سۋ تاپشىلىعى زاردابىن ازايتۋدىڭ جولى ءسوز بولعان جيىنعا اۋىل شارۋاشىلىعى, تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىلارى مەن سۋ شارۋاشىلىعى سالاسىنداعى ينسپەكتسيا جەتەكشىلەرى قاتىستى.
وبلىس باسشىسى بىلتىرعى ۆەگەتاتسيالىق كەزەڭ كۇردەلى جاعدايدا وتكەنىن اتاپ ءوتىپ, وسى كۇنى دە شاردارا سۋ قويماسىنا ءتۇسىپ جاتقان سۋ كولەمى كوڭىلدەگىدەي ەمەستىگىن جەتكىزدى.
– ەگەر قازىرگى دەڭگەيدەن كوبەيمەسە, ۆەگەتاتسياعا دەيىن شاردارا سۋ قويماسى عانا تولىپ, كوكسارايعا مۇلدەم سۋ جينالمايتىن قاۋپى بار. بۇل جاعدايدا وبلىستاعى كۇرىش ەگىسىنىڭ كولەمىن ايتارلىقتاي قىسقارتۋعا ءماجبۇر بولامىز. قازىر شارۋاشىلىقتار تۇقىم, تىڭايتقىش دايىنداۋ, ەگىس القاپتارىن جوسپارلاۋعا كىرىسىپ, كوكتەمگى ناۋقانعا ازىرلىكتى باستاپ كەتتى. جاڭاقورعان اۋدانىنداعى 30 مىڭ گەكتار ەگىستىكتى سۋمەن قامتاماسىز ەتۋ ءۇشىن سۋ توسپاسىن سالۋ دا وزەكتى ماسەلەنىڭ ءبىرى بولىپ وتىر.
جالپى, سۋ تاپشىلىعىنىڭ الدىن الۋ ءۇشىن جول كارتاسىندا قارالعان جوبالاردى ىسكە اسىرۋعا مينيسترلىك كومەك بەرەدى دەپ ۇمىتتەنەمىز, – دەدى ءوڭىر باسشىسى.
از سۋدى ۇنەممەن پايدالانۋدىڭ ءتۇرلى جولدارى قاراستىرىلۋدا. مىسالى, قاشىرتقى سۋدى قايتا پايدالانۋ ءۇشىن «قازسۋشار» رمك وبلىستىق فيليالىنا 67 ناسوس قوندىرعىسىن الۋعا قارجى ءبولىنۋى كەرەك. بۇعان مۇمكىندىگىنە قاراي وبلىس بيۋدجەتىنەن دە قاراستىرىلىپ جاتىر. وسى جىلى 20 كانالدى تازالاپ, ەلدى مەكەندەرگە 23 ناسوس الىپ بەرۋگە اقشا ءبولىندى.
كەڭەستە سۋ رەسۋرستارى كوميتەتىنىڭ توراعاسى نۇرلان الدامجاروۆ تاپشىلىقتىڭ باستى سەبەبى كليماتتىق فاكتورلارعا بايلانىستى ەكەنىن ايتىپ ءوتتى. ديقانداردى ەگىندى قولدا بار سۋعا شاقتاپ ەگىپ, شارۋاشىلىق باسشىلارىن سۋدى ۇنەمدەپ پايدالانۋعا شاقىردى.
كەزدەسۋدە وبلىس اۋماعىندا سۋ قويمالارىن سالۋ دا ءسوز بولدى. قاراوزەك ارناسىنان قۇرىلىسى جوسپارلانىپ وتىرعان قويمانىڭ سىيىمدىلىعى – 775 ملن تەكشە مەتر. جالپى قۇنى 1,9 ملرد تەڭگە بولاتىن قۇرىلىستىڭ جوبالىق سمەتالىق قۇجاتتاماسى رەسپۋبليكالىق بيۋدجەت ەسەبىنەن ازىرلەنگەن. مەمساراپتامانىڭ قورىتىندىسىنان كەيىن قۇرىلىسى باستالادى.
وبلىس اكىمى ماسەلەلەردى تۇيىندەي كەلە, ءتيىستى ماماندارعا شارۋالارعا سۋ ۇنەمدەۋدىڭ تيىمدىلىگىن ءتۇسىندىرۋ قاجەتتىگىن ايتىپ, ناقتى ىسكە ۋاقىت وزدىرماي كىرىسۋدى تاپسىردى.
قىزىلوردا وبلىسى