وتكەن اپتادا ورال قالاسىندا «عىلىم. ءبىلىم. تاجىريبە» تاقىرىبىندا ءتورتىنشى ينتەگراتسيالىق كونگرەسس ءوز جۇمىسىن اياقتادى. مۇنى تۇتاس ءبىر كلاستەرلىك تريادا دەسە دە بولادى. بىردەن ايتارىمىز كونگرەستى ۇيىمداستىرۋشىلار لەگى مەيلىنشە تولىققاندى. ونىڭ گەوەكونوميكالىق اۋقىمى مەيلىنشە كەڭ.
ولاردىڭ قاتارىندا قازاقستان رەسپۋبليكاسىنىڭ ءبىلىم جانە عىلىم مينيسترلىگى, ەۋرازيالىق ەكونوميكالىق قوعامداستىق, رەسەي تاۋار وندىرۋشىلەر وداعى, رەسەي مەن قازاقستاننىڭ ينجەنەرلىك اكادەميالارى جانە قازاقستاننىڭ يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتى (كازيتۋ) بار. وسىنىڭ وزىنەن ىرگەلى حالىقارالىق جيىن قازاقستان مەن رەسەيدىڭ شەكارالاس ايماقتارىنداعى كورنەكتى عىلىم قايراتكەرلەرىنىڭ باسىن قوسقانىن بىردەن بايقاۋعا بولادى.
بۇعان دەيىن گازەتىمىزدە حابارلانعانىنداي, ورال قالاسىنداعى قازيتۋ بازاسىندا سوڭعى جىلدارى ءداستۇر مەن تاجىريبەگە اينالعان ەۋرازيالىق وزەن ارالىعى جوباسى جاڭا تەحنولوگيالار مەن ومىرشەڭ عىلىمي يدەيالاردىڭ گەنەراتورىنا اينالىپ كەلەدى. بۇل باعىتتا كورشىلەس مەملەكەتتەر اراسىندا سىرتقى اكادەميالىق ۇتقىرلىق باعدارلاماسى شەڭبەرىندە بىرلەسىپ قولعا الىنعان شارالار شوعىرى سان سالالى. اسىرەسە, قازاقستان پرەزيدەنتى نۇرسۇلتان نازارباەۆتىڭ بيىلعى قاڭتار ايىندا قازاقستان حالقىنا جولداۋىندا قويىلعان ءماسەلەلەر وتە كوكەيكەستى بولىپ وتىر. بۇل ينتەگراتسيالىق عىلىم مەن تاجىريبەنىڭ باستى شيكىزاتى ءرولىن دە اتقارا الادى. وسى ورايدا, قولدانبالى عىلىم مەن يننوۆاتسيانىڭ نەگىزگى وپەراتورىنا اينالا بىلگەن ەۋرازيالىق وزەن ارالىعى جوباسىنىڭ ورنى ايرىقشا.
ايتالىق, باتىس قازاقستان وبلىسى مەن رەسەيدىڭ شەكارالاس گۋبەرنيالارى اراسىندا ءوزارا ىنتىماقتاستىق پەن تاتۋ-ءتاتتى كورشىلىك جونىندەگى كەلىسىمشارتتارعا قول قويىلعان. بۇل يگى ءىس, وزگەسىن ايتپاعاندا, عىلىمي ينتەگراتسيانىڭ جاڭا مۇمكىندىكتەرىن اشۋعا دا ايتارلىقتاي سەپتىگىن تيگىزدى. ال جوعارىدا ايتىلعانداي, ورالدا وتكىزىلگەن ءتورتىنشى ينتەگراتسيالىق كونگرەسس بۇل بايلانىستىڭ ءمانى مەن ماڭىزىن تاعى ءبىر بيىككە كوتەرىپ, وعان جاڭاشا سەرپىن بەردى دەسەك قاتەلەسپەيمىز.
ءيا, كەشەگى كۇندەرى كونگرەسس قىزمەتى شەڭبەرى مەن اۋقىمىندا عىلىم مەن ەنەرگەتيكا باعىتىنداعى بىرقاتار ينتەگراتسيالىق جوبالار مەن ۇدەرىستەر جان-جاقتى تالقىلاندى. سونىڭ ىشىندە شەكارالاس ايماقتار اراسىنداعى يننوۆاتسيالىق الەۋەتتىڭ مۇمكىندىكتەرى جانە ينجەنەرلىك عىلىم مەن عارىشتىق تەحنولوگيالاردى دامىتۋ جونىندە قوس ەلدىڭ عالىمدارى جاڭاشا ءارى تىڭ وي-پىكىرلەر قوزعادى. ءبىر سوزبەن ايتقاندا, عىلىمي ينتەگراتسيا ەكونوميكانىڭ جاڭا ومىرشەڭ سالالارى مەن جۇيەلەرىن قۇرۋعا قىزمەت جاساۋعا ءتيىس.
ياعني, كورشىلەس مەملەكەتتەر اراسىنداعى قازىرگى باسىمدىق ماقسات-مۇراتتار – عىلىم مەن ءبىلىمدى تۇبەگەيلى تۇردە جاڭعىرتۋ, ونىڭ ومىرشەڭ ناقتى تاجىريبەمەن بايلانىسىن تەرەڭدەتۋ, اقپاراتتىق الەۋەتتىڭ كوكجيەگىن كەڭەيتۋ, بيزنەس پەن عىلىمدا كورشىلەس ەلدەردىڭ ءوزارا ءىس-قيمىلىنىڭ ءۇيلەسىمدىلىگىنە قول جەتكىزۋ بولماق. مىنە, كونگرەسس كەزىندە وعان قاتىسقان تمد عالىمدارى جاساعان تاعى ءبىر ءتۇيىن وسىنداي. قالاي دەگەندە دە «عىلىم. ءبىلىم. تاجىريبە» اتاۋىن يەلەنگەن كلاستەرلىك تريادا تەك وسىنداي ۇزدىكسىز ءۇردىس ارقىلى عانا العا قويعان ماقساتىنا جەتەرى انىق.
كونگرەسس جۇمىسى كەزىندە تەك قۇرعاق يننوۆاتسيالىق يدەيالار ايتىلىپ قويماي, بۇگىنگى كۇنگى عىلىم مەن ءبىلىم بەرۋدەگى ناقتى ينتەگراتسيالىق بايلانىستار جونىندە كوپتەگەن مىسالدار كەلتىرىلدى. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ پروفەسسورى سەرگەي كيبالنيكوۆتىڭ ايتۋىنشا, وتكەن جىلدان باستاپ دۋبنا ۋنيۆەرسيتەتىندە قازاقستاننىڭ يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ جاس ماماندارى قاتارىنان ماگيسترانتتار دايىنداۋدىڭ ارنايى باعدارلاماسى قولعا الىنعان. بۇل ءۇردىس رەسەيدىڭ سامارا قالاسىنداعى جوعارى وقۋ ورىندارىندا دا ءوز جالعاسىن تاۋىپ وتىر.
يننوۆاتسيا مەن جاڭا تەحنولوگيانى ترانسفەرتتەۋگە كورشىلەس مەملەكەتتەر عالىمدارى وسىلايشا ءۇن قوسىپ كەلەدى.
ورال.
سۋرەتتە: كونگرەستەن كورىنىس.