پرەزيدەنت ۇكىمەتكە بىرقاتار شۇعىل تاپسىرما بەردى

1. باس پروكۋراتۋرا, ءىىم, ۇقك جانە باسقا دا قۇزىرلى ورگاندار وكىلدەرىن قاتىستىرا وتىرىپ, بولعان وقيعانىڭ سەبەپتەرىن انىقتاۋ, كىنالىلەردىڭ ءبارىن تاۋىپ, قىلمىستىق جانە اكىمشىلىك جاۋاپكەرشىلىككە تارتۋ جونىندە ارناۋلى تەرگەۋ توبىن قۇرۋ;

2. قارۋلى كۇشتەرگە, ۇقك, ءىىم, ۇلتتىق ۇلان جانە باسقا دا كۇشتىك قۇرىلىمدارعا اسكەري دايىندىعىن كۇشەيتۋ جانە جابدىقتاۋ شارالارىن قامتاماسىز ەتۋ, اسكەري قىزمەتشىلەردىڭ مورالدىق رۋحىن قولداۋ;

3. وڭىرلەردىڭ اكىمدەرىنە قازا بولعان پوليتسيا قىزمەتكەرلەرى مەن قارۋلى كۇشتەر اسكەري قىزمەتشىلەرىنىڭ وتباسىلارىنا لايىقتى ماتەريالدىق كومەك كورسەتۋ;

4. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە ىشكى ىستەر مينيسترلىگىمەن بىرلەسىپ, قىلمىستىق توپتاردىڭ ءىس-ارەكەتتەرى سالدارىنان زارداپ شەككەندەر مەن ءىز-ءتۇزسىز جوعالىپ كەتكەندەر تۋرالى اقپاراتتى حالىققا ۇسىنۋ ءۇشىن 1414 call-ورتالىعىنىڭ بازاسىندا تىكەلەي جەلى ۇيىمداستىرۋ;

5. تارتىپسىزدىك سالدارىنان كەلتىرىلگەن شىعىن كولەمىن انىقتاۋ جونىندە كوميسسيا قۇرۋ; جاعداي تۇراقتالعاننان كەيىن الماتى قالاسى مەن باسقا دا وڭىرلەردەگى اكىمشىلىك عيماراتتاردى, الەۋمەتتىك نىسانداردى, تۇرعىن ۇيلەردى قالپىنا كەلتىرۋ جۇمىستارىنا كىرىسۋ;

6.  اكىمدەرگە كوممۋنالدىق قىزمەت تۇرلەرىنىڭ, قوعامدىق كولىك پەن الەۋمەتتىك ينفراقۇرىلىم نىساندارىنىڭ جۇمىسىن تۇراقتاندىرۋ;

7. الماتى قالاسى مەن باسقا دا وڭىرلەردە قىلمىستىق ءىس-ارەكەتتەردەن زارداپ شەككەن شاعىن جانە ورتا بيزنەس سۋبەكتىلەرىنە  مەملەكەتتىك قولداۋ كورسەتۋ شارالارىن قابىلداۋ;

8. ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگىنە جاعداي تۇراقتالعاننان كەيىن ەكىنشى دەڭگەيلى بانكتەر مەن وزگە دە قارجى ۇيىمدارىنىڭ تۇراقتى ءارى ۇزدىكسىز جۇمىسىن قالپىنا كەلتىرۋدى قامتاماسىز ەتۋ;

9. ديپلوماتيالىق وكىلدىكتەردى, سونداي-اق شەتەلدىك ينۆەستيتسيالار مەن شەتەلدىك كومپانيالار بيزنەسىنىڭ سۋبەكتىلەرىن قورعاۋ شارالارىن قابىلداۋ;

10. قر سىرتقى ىستەر مينيسترلىگىنە شەت مەملەكەتتەرمەن, حالىقارالىق ۇيىمدارمەن  جانە باسقا دا سەرىكتەستەرمەن اراداعى ەكىجاقتى جانە كوپجاقتى ىنتىماقتاستىقتىڭ قازىرگى ماسەلەلەرى بويىنشا تۇراقتى بايلانىستى قامتاماسىز ەتۋ جونىندە تاپسىرما بەرىلدى.