قىزىلوردادا باسپانا كەزەگىندە تۇرعاندارعا تاۋەلسىزدىكتىڭ 30 جىلدىعى قارساڭىندا شاھاردىڭ سول جاعالاۋىنداعى 680 پاتەرلىك 14 تۇرعىن ءۇيدىڭ كىلتى بەرىلدى. وبلىس اكىمى گۇلشارا ابدىقالىقوۆا مەن قالا اكىمى عانيبەك قازانتاەۆ قاتىسقان شارادا پاتەرلى بولعانداردىڭ دەنى كوپبالالى جانە الەۋمەتتىك از قامتىلعان وتباسىلار.
ايماق باسشىسى تۇرعىنداردى قونىس تويىمەن قۇتتىقتاپ, قىزىلوردا تۇرعىن ءۇي قۇرىلىسى جاعىنان باسقا وڭىرلەرمەن سالىستىرعاندا كوش باسىندا كەلە جاتقانىن اتاپ ءوتتى. تاۋەلسىزدىك العان 30 جىلدا وبلىستا 8 ملن شارشى مەترگە جۋىق تۇرعىن ءۇي پايدالانۋعا بەرىلگەن.
– بارشاڭىزدى الدىمەن ەلىمىزدىڭ ەڭ باستى ۇلىق مەرەكەسى – تاۋەلسىزدىگىمىزدىڭ 30 جىلدىق مەرەيتويىمەن قۇتتىقتايمىن! قۇرىلىسى قارقىندى قىزىلوردامىزدا بۇگىن تاعى ءبىر جاڭا تۇرعىن ءۇيدى پايدالانۋعا بەرىپ, پاتەر يەلەرىنىڭ قۋانىشىن ءبولىسىپ وتىرمىز. باسپانالارىڭىز ءسابيدىڭ كۇمىس كۇلكىسىنە بولەنىپ, شاڭىراقتارىڭىزدىڭ شاتتىعى ۇزىلمەسىن, – دەدى گ.ابدىقالىقوۆا.
ايماق باسشىسى تۇرعىن ۇيلەردى ۋاقتىلى جانە ساپالى سالعان مەردىگەر مەكەمە باسشىلارىنا دا ريزاشىلىعىن ءبىلدىردى. بيىل وبلىستا 2 408 پاتەرلىك 110 تۇرعىن ءۇيدىڭ قۇرىلىسى جۇرۋدە. جىل سوڭىنا دەيىن 1 608 پاتەرلىك 94 تۇرعىن ءۇي پايدالانۋعا بەرىلەدى دەپ جوسپارلانعان.
قىزىلوردا وبلىسى