سەمەي ەجەلدەن ەلىمىزدىڭ رۋحاني ورتالىقتارىنىڭ ءبىرى عانا ەمەس, بىرەگەيى سانالادى. ويتكەنى, مۇندا اباي, شاكارىم, مۇحتار سىندى ۇلىلاردىڭ, الاش قايراتكەرلەرىنىڭ تابانىنىڭ ءىزى قالعان. ونىڭ سىرتىندا ەلىمىزدەگى العاشقى ولكەتانۋ مۇراجايى مەن كىتاپحانا اشىلىپ, العاشقى فۋتبول كومانداسى دا وسىندا قۇرىلعان.
قازىر دە سول يگى ءداستۇر ءوز جالعاسىن تابۋدا. سونىڭ ايعاعىنداي, مۇندا ايتىسكەر اقىندار مەكتەبىنىڭ جۇمىس ىستەي باستاعانىنا بىرنەشە جىلدىڭ ءجۇزى بولدى. بەلگىلى ايتىسكەر اقىن دامەش ومارباەۆا جەتەكشىلىك ەتەتىن وسى مەكتەپ تۇلەكتەرىنىڭ ەسىمى بۇگىندە رەسپۋبليكا كولەمىندە كەڭىنەن تانىلىپ وتىر. سوڭعى بىرەر جىلدا شاكارىم اتىنداعى سەمەي مەملەكەتتىك ۋنيۆەرسيتەتى جانىنان اشىلعان اباي اتىنداعى زيالىلار كلۋبىندا دا يگى شارالار كوپتەپ اتقارىلۋدا.
جۋىردا, سەمەيدەگى ابايدىڭ رەسپۋبليكالىق قورىق مۇراجايىندا «اسىل قازىنا» دەگەن اتپەن جاس اقىندار كلۋبى اشىلدى. اتالعان كلۋبتىڭ اشىلۋ سالتاناتىندا مۇراجاي ديرەكتورى جاندوس اۋباكىر اتاپ ايتقانداي, كلۋبتىڭ ماقساتى – بۇلاقتىڭ كوزىن اشۋمەن بىرگە, جاس وسكىندەردىڭ جىرلارىن تالقىلاپ, باعىت بەرۋ, توپتاما جىر جيناقتارىن شىعارۋعا قامقورلىق تانىتۋ بولىپ تابىلادى. راسىمدە جەرگىلىكتى ەتنوگراف قالامگەر مولدابەك جانبولات ۇلى جەتكىنشەكتەرگە اتالى دا باتالى ءسوز ايتسا, جوعارىدا ەسىمى اتالعان ايتىسكەر اقىن دامەش ومارباەۆا جاڭادان اشىلعان جاس اقىندار كلۋبىنا يگى تىلەكتەستىگىن ءبىلدىردى. مۇنان كەيىن جاستار مەن جەتىنشەك اقىندار تەبىرەنىسكە تولى جىر شۋماقتارىن وقىدى. كەش سوڭىندا جەتكىنشەك اقىندارعا كلۋبتىڭ مۇشەلىك بيلەتى سالتاناتتى جاعدايدا تابىس ەتىلدى.
داۋلەت سەيسەن ۇلى.
سەمەي.