شاراينا
كيەۆتەگى قاقتىعىستان قازا تاپقاندار مەن جارالانعاندار سانى ءوسىپ بارادى. سوڭعى اقپاراتتارعا قاراعاندا, 18 اقپانداعى تارتىپسىزدىك سالدارىنان قۇربان بولعاندار قاتارى 30 ادامعا جەتكەن. ۋكراينا دەنساۋلىق ساقتاۋ مينيسترلىگىنىڭ حابارلاۋىنشا, 8 ادام قالالىق دەنساۋلىق ساقتاۋ مەكەمەلەرىنە جاتقىزىلعاننان كەيىن, 4 ادام ءىىم-ءنىڭ گوسپيتالىندە قايتىس بولعان. قازا تاپقان تاعى 13 ادام كيەۆتەگى سوت-مەديتسينالىق ساراپتاما بيۋروسىنىڭ كلينيكاسىنا جەتكىزىلگەن. سونداي-اق, كەشە ەرتەڭگىسىن 350-دەن استام زارداپ شەگۋشى مەديتسينالىق كومەككە جۇگىنگەن. ولاردىڭ 240-ى اۋرۋحاناعا جاتقىزىلىپتى. دەرەك كوزدەرى بويىنشا, جاراقاتتانعانداردىڭ 80-گە جۋىعى قۇقىق قورعاۋ ورگاندارىنىڭ قىزمەتكەرلەرى. جاراقات العانداردىڭ اراسىندا بەس جۋرناليست جانە جوعارعى راداعا «باتكيۆيششينا» پارتياسىنان دەپۋتات بولىپ سايلانعان ۆ.پازينياك بار. قازىرگى كەزدە قاقتىعىسقا قاتىسۋشى تاراپتار ءبىرىن-ءبىرى اتىس قارۋىن پايدالاندى دەپ ايىپتاۋدا. ارگەنتينادا مەتەوريت جارىلدى ارگەنتينا اۋماعىنىڭ اۋە كەڭىستىگىندە, دالىرەك ايتقاندا, سانتا-فە پروۆينتسياسىندا مەتەوريت جارىلعان. بۇل اقپاراتتى جەرگىلىكتى وبسەرۆاتوريا قىزمەتكەرلەرىنىڭ ايتقاندارىنا سىلتەمە جاساي وتىرىپ «فرانس-پرەسس» اگەنتتىگى حابارلادى. جارىلىس بولعانى جونىندەگى اقپارات جەرگىلىكتى ۋاقىت بويىنشا ساعات 10.00-دە تۇسكەن. سانتا-فە پروۆينتسياسى بۋەنوس-ايرەستەن 350 شاقىرىمداي قاشىقتىقتا ورنالاسقان. كورگەندەردىڭ ايتۋىنشا, الدىمەن كوز قارىقتىرار جارىق كورىنىپتى, ارتىنشا كۇشتى جارىلىس بولعان. جارىلىستان تاراعان تولقىن جەردى جانە ۇيلەردى دىرىلدەتىپ جىبەرگەن. ءبىر جاقسىسى, جارىلىستان ەشكىم زارداپ شەكپەپتى.قىسقا قايىرىپ ايتقاندا:
* شۆەتسيا سىرتقى ىستەر ءمينيسترى كارل بيلد: «تۋراسىن ايتۋ كەرەك, كيەۆتەگى ولىمدەر مەن زورلىق-زومبىلىق جاۋاپكەرشىلىگى پرەزيدەنت يانۋكوۆيچتىڭ موينىنا ارتىلادى. ونىڭ قولى قانعا مالىندى» دەپ مالىمدەدى. * امەريكالىق بۇرىنعى كونگرەسسمەن مەلۆين دجەي رەينولدس پورنوگرافيالىق سۋرەتتەردى ساقتادى جانە كوشى-قون زاڭناماسىن بۇزدى دەگەن كۇدىكپەن ۇستالدى. * اقش-تىڭ فەدەرالدى رەزەرۆ جۇيەسى وسى ەلدىڭ رىنوگىندا جۇمىس ىستەيتىن شەتەلدىك بانكتەر ءۇشىن اسا قاتاڭ ەرەجە قابىلدادى. ەندى ولار دا امەريكالىق بانكتەر سياقتى جۇمىس ىستەيتىن بولادى. * ەكى كۇن بۇرىن «انسار بەيت ءال-ماكديس» يسلامشىل توبى تۋريستەردىڭ 20 اقپانعا دەيىن ەگيپەتتى تاستاپ شىعۋىن تالاپ ەتكەن ەدى. وسى ەلدەگى رەسەيلىك 70 مىڭداي تۋريست بۇل ەسكەرتۋدى ەلەمەيتىن سياقتى. بەرلۋسكوني اجىراساتىن بولدى يتاليا سوتى ەلدىڭ بۇرىنعى پرەمەر-ءمينيسترى سيلۆيو بەرلۋسكونيدىڭ زايىبى ۆەرونيكا لاريومەن اجىراسۋ جونىندەگى پروتسەستى اياقتادى. اجىراسقاننان كەيىن بەرلۋسكونيدىڭ ۆ.لاريوعا قانشالىقتى سومادا اليمەنت تولەيتىنى قازىرشە ناقتى انىقتالماعان. العاشىندا ونىڭ مولشەرى ايىنا 3 ميلليون ەۋرو دەپ قاراستىرىلعان ەدى. بىراق, وتكەن جىلدىڭ قازانىندا مونتسە سوتى اليمەنت كولەمىن 1,4 ميلليون ەۋروعا دەيىن قىسقارتقان بولاتىن. بۇل ەكەۋى نەكەدە 22 جىلدان استام ۋاقىت بىرگە تۇردى. سنوۋدەن رەكتورلىققا سايلاندى اقش ارنايى قىزمەتىنىڭ ەكس-قىزمەتكەرى ەدۋارد سنوۋدەن گلازگو ۋنيۆەرسيتەتى ستۋدەنتتەرىنىڭ رەكتورى بولىپ سايلاندى. بۇل قىزمەتتى ول رەسەيدە تۇرىپ-اق اتقارۋىنا بولادى. گلازگو ۋنيۆەرسيتەتىنىڭ ستۋدەنتتەرى ءوز رەكتورىن ءۇش جىلدا ءبىر رەت سايلايدى. ەرەجە بويىنشا رەكتورلىق قىزمەتكە بەلگىلى ساياساتكەرلەر نەمەسە قوعام قايراتكەرلەرى ۇسىنىلادى. بۇعان دەيىن رەكتورلىققا نەلسون ماندەلانىڭ بۇرىنعى ايەلى ۆينني ماندەلا, سونداي-اق, يزرايلدىك فيزيك موردەحاي ۆانۋنۋ سياقتى تۇلعالار سايلانىپتى. وتكەن جىلدىڭ سوڭىندا سنوۋدەن ءوزىنىڭ ادۆوكاتى ارقىلى وسى قىزمەتتى اتقارۋعا دايىن ەكەنىن بىلدىرگەن كورىنەدى. ميسسيونەردىڭ قايدا ەكەنى بەلگىسىز سولتۇستىك كورەيانىڭ قۇقىق قورعاۋ ورگاندارى 75 جاستاعى اۆستراليالىق ميسسيونەر دجون شورتتى ۇستاپ اكەتكەن. ول پحەنيانعا تۋريستىك توپپەن كەلگەن ەكەن. شورتتى 16 اقپاندا كەشكىسىن ءوزى تۇسكەن قوناقۇيدە ۇستاعان. تۋريستىك كومپانيا وكىلدەرىنىڭ ايتۋىنشا, كحدر بيلىگى ميسسيونەردىڭ نە ءۇشىن ۇستالعانى جانە ونىڭ قاي جەردە ەكەنى جونىندەگى سۇراۋ سالۋلارىنا جاۋاپ بەرمەي وتىر. شورتتىڭ زايىبىنىڭ سوزىنە قاراعاندا, ميسسيونەر بۇل ەلگە كورەي تىلىنە اۋدارىلعان حريستياندىق ادەبيەتتەردى الا كەلىپتى. بار ماسەلە وسى ادەبيەتتەرگە بايلانىستى بولسا كەرەك. قۇپيا نىساندا اكتسيا وتكىزەمىن دەپ... چيكاگو سوتى 84 جاستاعى ءدىندار تاقۋا مەگان رايستى يادرولىق نىسانداردىڭ بىرىندە قارسىلىق اكتسياسىنا قاتىسقانى ءۇشىن ءۇش جىل مەرزىمگە باس بوستاندىعىنان ايىردى. ول 2012 جىلدىڭ شىلدەسىندە ءۇش ادام بولىپ, تەننەسسي شتاتىنداعى ەرەكشە كۇزەتتەگى ۋران ساقتالاتىن كەشەنگە جاسىرىن كىرىپ, سول جەردە قارسىلىق اكتسياسىن ۇيىمداستىرعان. ولار ەكى ساعات وتكەننەن كەيىن ۇستالعان. وسى ارالىقتا اكتسياعا قاتىسۋشى الگى ۇشەۋ يادرولىق قارۋعا قارسى پلاكاتتاردى ءىلىپ, كەشەن قابىرعالارىنا ادام قانىن شاشىپ ۇلگەرىپتى. قالعان ەكەۋىنە سوت بەس جىلدان تۇرمەدە وتىرعىزۋ جازاسىن تاعايىندادى. ينتەرنەت ماتەريالدارى نەگىزىندە ازىرلەندى.