كەشە ورتالىق كوممۋنيكاتسيالار قىزمەتىندە كەدەندىك باقىلاۋ كوميتەتى توراعاسىنىڭ ورىنباسارى امانياز ەرجانوۆ ءباسپاسوز ءماسليحاتىن وتكىزدى. ول كوميتەتتىڭ قىزمەتى جونىندە بايانداپ, تەڭگە باعامىنىڭ وزگەرۋىنە دە توقتالدى.
– قازىرگى تاڭدا كەدەن ورگاندارى اكىمشىلەندىرۋ تيىمدىلىگىن ارتتىرىپ, كەدەندىك راسىمدەردى جەڭىلدەتۋ جانە جىلدامداتۋ, سونداي-اق, ولاردىڭ ايقىن بولۋىن قامتاماسىز ەتۋدى قولعا العان. ءبىر سوزبەن ايتقاندا, كەدەن قىزمەتىن تولىق جاڭعىرتۋعا نازار اۋدارىپ وتىر. سوندىقتان سالاداعى باسىم باعىتتاردى بەلگىلەپ, فيسكالدىق جانە قۇقىق قورعاۋ فۋنكتسيالارىن جۇزەگە اسىرىپ, كەدەندىك رەسىمدەۋ مەن باقىلاۋ تەحنولوگيالارىن جەتىلدىرمەك. ءسويتىپ, جۇيەگە سوڭعى ۇلگىدەگى اقپاراتتىق-كوممۋنيكاتسيالىق تەحنولوگيالاردى ەنگىزبەك, – دەدى توراعا ورىنباسارى.
تەڭگە باعامىنىڭ تۇزەتىلۋى كەدەن شەگىندە ەشقانداي دۇربەلەڭ تۋدىرماپتى. «ۆاليۋتا باعامىن وزگەرتۋگە قاتىستى بىردە-ءبىر كەلەڭسىز وقيعا بولعان جوق. كەدەندىك تازارتۋ كەدەن وداعى مەن ەلىمىزدىڭ زاڭناماسىنا سايكەس جۇرگىزىلۋدە. وتكەن 11-13 اقپان كۇندەرى وتكىزۋ پۋنكتتەرىندە سىرتقى ەكونوميكاعا قاتىسۋشىلاردىڭ ىركىلىپ, جينالىپ قالۋى ورىن المادى. بارلىق وتكىزۋ پۋنكتتەرى وسى ۋاقىتقا دەيىن قالاي جۇمىس ىستەپ كەلگەن بولسا, ءالى دە سول رەجىممەن قىزمەتىن جالعاستىرىپ جاتىر», دەدى ا.ەرجانوۆ.
توراعا ورىنباسارى سوڭعى كەزدەرى سىرتقى ساۋدا اينالىمىنىڭ وسكەنىن دە ايتىپ ءوتتى. مىسالى, وتكەن جىلى سىرتقى ساۋدا اينالىمى 107,1 ملرد. اقش دوللارىنا جەتىپتى. ونىڭ 76,6 ملرد. دوللارىن ەكسپورت قۇراسا, 30,5 ملرد. دوللارى يمپورتقا تيەسىلى ەكەن. جالپى, ساۋدا بالانسىنىڭ سالدوسى 46,1 ملرد. اقش دوللارى دەڭگەيىندە قالىپتاسىپتى. وسى كورسەتكىشتەردى سارالاي كەلگەندە, ەكسپورتتىق كەدەندىك باج جانە يمپورتقا قوسىمشا قۇن سالىعى بويىنشا كەدەندىك ءتۇسىم كوبەيەدى دەپ كۇتىلىپ وتىر ەكەن.
نۇرباي ەلمۇراتوۆ,
«ەگەمەن قازاقستان».