سىرتقى ساياسات ۆەدومستۆوسىنىڭ باسشىسى ەرلان ىدىرىسوۆتىڭ توراعالىعىمەن سىرتقى ىستەر مينيسترلىگىنىڭ القا وتىرىسى بولىپ ءوتتى.
جيىنعا اتالعان مينيسترلىك باسشىلىعى, قازاقستان پرەزيدەنتىنىڭ كومەكشىسى ەرجان قازىحانوۆ, پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ, پارلامەنت سەناتىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى ءبىرعانىم ءايتىموۆا, پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ جانە باسقا دا بىرقاتار مەملەكەتتىك ورگانداردىڭ وكىلدەرى قاتىستى.
سىرتقى ساياسات ۆەدومستۆوسى باسشىلىعىنىڭ القا وتىرىسىنداعى كۇن ءتارتىبىنىڭ نەگىزگى بولىگى ەل پرەزيدەنتىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىن ىسكە اسىرۋ شارالارىن تالقىلاۋعا ارنالدى.
سىرتقى ىستەر ءمينيسترى ءوز ءسوزىندە اتاپ وتكەندەي, بۇل جولداۋدىڭ ماڭىزدىلىعى مەملەكەت باسشىسىنىڭ ەل حالقىن ءوسىپ-وركەندەگەن, جەمىستى قازاق ەلىن قۇرۋعا بىرىگىپ اتسالىسۋعا شاقىرۋى مەن «ستراتەگيا-2050» ماقساتتارىنا قول جەتكىزۋ ءۇشىن دامىعان دەموكراتيالىق قوعامدا ءومىر سۇرگىسى كەلەتىن ءار ازاماتتىڭ جەكە قاتىسۋى مەن بەلسەندى ۇستانىمىنىڭ قاجەتتىلىگىندە جاتىر.
مەملەكەت باسشىسىنىڭ العا قويعان تاپسىرمالارىنا قول جەتكىزۋ ءۇشىن قولايلى سىرتقى جاعداي قالىپتاستىرۋ سىرتقى ساياسات ۆەدومستۆوسىنىڭ ەڭ ماڭىزدى باسىمدىعى بولىپ تابىلادى. وسى ورايدا, ە.ىدىرىسوۆ جاقىندا پرەزيدەنت تاراپىنان بەكىتىلگەن جانە «2050» ستراتەگياسىنىڭ نەگىزگى قاعيدالارى اياسىندا قۇرىلعان قازاقستاننىڭ 2020 جىلعا دەيىنگى كەزەڭگە ارنالعان جاڭا سىرتقى ساياسات تۇجىرىمداماسىنىڭ ەرەكشە ماڭىزدىلىعىن اتاپ ءوتتى.
مينيستر سىرتقى ساياسات تۇجىرىمداماسىندا ءداستۇرلى ۇستانىمدارمەن قاتار, باسقا دا جاڭا سىرتقى ساياسي قىزمەتتىڭ باسىم باعىتتارى ايقىندالدى, دەپ اتاپ ءوتتى. «ەگەر وسىعان دەيىن مەملەكەت مۇددەسىن قورعاۋعا ايتارلىقتاي باسىمدىق بەرىلسە, بۇگىندە قوعامنىڭ قاجەتتىلىكتەرىن, سونىڭ ىشىندە, جالپى ازاماتتاردىڭ جانە جەكە ءاربىر قازاقستاندىقتىڭ قاجەتتىلىكتەرىن قامتاماسىز ەتۋگە قاراي بەت بۇرىلۋدا», دەپ ول.
ەلىمىزدىڭ سىرتقى ساياسي باعىتىنا توقتالا كەلە, سىرتقى ىستەر ءمينيسترى قازاقستان ساياساتى الداعى ۋاقىتتا دا تەڭدەستىرىلگەن, ءبىرىزدى جانە پراگماتيكالىق قاعيدالارعا نەگىزدەلەتىنىن اتاپ ءوتتى. «ءبىز قازاقستاننىڭ جاھاندىق جانە ايماقتىق ماسەلەلەردى شەشۋگە قاتىسۋىن, سىرتقى ساياساتتىڭ ستراتەگيالىق رەسۋرسى رەتىندە كوپ دەڭگەيلى ديپلوماتيانى دامىتۋىن ەلىمىزدىڭ قاۋىپسىزدىگى مەن اۋماقتىق تۇتاستىعىن قامتاماسىز ەتۋدىڭ نەگىزگى فاكتورى دەپ بىلەمىز», دەدى ە.ىدىرىسوۆ.
سونىمەن قاتار, القا وتىرىسى بارىسىندا 2017-2018 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستان كانديداتۋراسىن ۇسىنۋ جوسپارىن جۇزەگە اسىرۋ ماسەلەلەرى قاراستىرىلدى. بۇۇ قاۋىپسىزدىك كەڭەسىنە سايلانۋى ايماقتىڭ وزەكتى ماسەلەلەرىنە حالىقارالىق قوعامداستىق نازارىن اۋدارۋعا جانە ولاردى شەشۋگە, سونىمەن قوسا, حالىقارالىق كۇن تارتىبىندەگى كۇردەلى ماسەلەلەردى رەتتەۋگە ءوز ۇلەسىمىزدى قوسۋعا مۇمكىندىك بەرەتىنى ايتىلدى.
سونداي-اق, القا جيىنىنا قاتىسۋشىلار ەكسپو-2017 حالىقارالىق كورمەسىنە دايىندىق جايى, ەۋرازيالىق جانە ورتالىقازيالىق ينتەگراتسيا ماسەلەلەرى, اۋعانستانداعى جانە سيرياداعى جاعدايدى تۇراقتاندىرۋ, ۋكرايناداعى ساياسي داعدارىستى رەتتەۋ مەن حالىقارالىق كۇن تارتىبىندەگى باسقا دا ماسەلەلەردى تالقىعا سالدى.
ساۋلەبەك ءبىرجان.