قازاقستان رەسپۋبليكاسى پارلامەنتى ءماجىلىسىنىڭ توراعاسى نۇرلان نىعماتۋلين ليتۆا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى روكاس بەرنوتاستى قابىلدادى, دەپ حابارلادى ءماجىلىستىڭ ءباسپاسوز قىزمەتى.
كەزدەسۋ بارىسىندا تاراپتار قازاقستان مەن ليتۆا اراسىنداعى ءوزارا تۇسىنىستىكتىڭ جوعارى دەڭگەيىن, سونداي-اق, حالىقارالىق جانە ايماقتىق ساياساتتاعى وزەكتى تاقىرىپتار توڭىرەگىندەگى ۇستانىمنىڭ ۇقساستىعىن العا تارتتى.
نۇرلان نىعماتۋلين ليتۆا رەسپۋبليكاسىنا 2014-2015 جىل ارالىعىندا بۇۇ قاۋىپسىزدىك كەڭەسىنە تۇراقتى ەمەس مۇشە رەتىندە جۇمىسقا كىرىسۋىنە بايلانىستى ءوز قۇتتىقتاۋىن جەتكىزدى. قاۋىپسىزدىك تۋرالى ءسوز ەتكەندە, ءماجىلىس توراعاسى ەلباسى نۇرسۇلتان نازارباەۆتىڭ جاھاندىق قاۋىپ-قاتەرلەرگە توتەپ بەرۋگە باعىتتالعان حالىقارالىق باستامالارىنا باسا نازار اۋداردى.
– قازاقستان ەۋرووداقتىڭ قاۋىپسىزدىك ماسەلەسى بويىنشا ەۋرووداق – ورتالىق ازيا جوعارى دەڭگەيلى سۇحبات قۇرۋ باستاماسىن قولدادى جانە ونىڭ دامۋىنا ءتيىستى دەڭگەيدە ىقپال ەتۋگە دايىن. مۇنداي تەتىكتەر بۇكىل الەمدە, سونىڭ ىشىندە ءبىزدىڭ ايماقتارىمىزدا تىنىشتىقتى ساقتاۋعا وزىندىك ۇلەس قوساتىنى ءسوزسىز, – دەدى نۇرلان نىعماتۋلين.
سپيكەردىڭ اتاپ وتكەنىندەي, سونداي-اق, ەۋروپا كەڭەسىمەن ارىپتەستىك قاتىناستى دامىتۋ, ەۋروپالىق قۇقىقتىق كەڭەسكە قوسىلۋ ءبىزدىڭ ەلىمىز ءۇشىن باسىم باعىتتاردىڭ ءبىرى بولىپ تابىلادى. ال, الەۋمەتتىك-ەكونوميكالىق دامۋ تۋرالى ءسوز ەتكەندە, نۇرلان نىعماتۋلين ەلباسى جولداۋىنىڭ ماڭىزدى باعىتتارىن جۇزەگە اسىرۋ قازاقستاندىقتار ءۇشىن دە, سونىمەن بىرگە, شەتەلدىك كومپانيالار ءۇشىن دە وڭتايلى جاعداي جاسايتىنىن اتاپ ءوتتى.
ءوز كەزەگىندە روكاس بەرنوتاس قازاقستاننىڭ ليتۆا ءۇشىن ايماقتاعى وتە ماڭىزدى ارىپتەس ەكەنىن اتاپ ءوتتى.
كەزدەسۋ يەلەرىنىڭ پىكىرىنشە, قوس مەملەكەت ارىپتەستىگىنىڭ ماڭىزدى بولىگى بولىپ تابىلاتىن ەكى ەلدىڭ پارلامەنتارالىق ىنتىماقتاستىق ماسەلەلەرىنە ايرىقشا كوڭىل ءبولىندى. تاراپتار قازاقستان مەن ليتۆانىڭ زاڭ شىعارۋشى ورگاندارى اراسىنداعى بايلانىستى كەڭەيتۋ جولدارىن تالقىلادى, بۇل رەتتە ءارتۇرلى باعىتتار بويىنشا تاجىريبە الماسۋ ماڭىزدى بولماق. اسىرەسە, ىنتىماقتاستىق جونىندەگى توپتار مەن كوميتەتتەر بايلانىسىن نىعايتۋ قاجەت. ماجىلىستە ليتۆا رەسپۋبليكاسىنىڭ سەيمىمەن ىنتىماقتاستىق جونىندەگى توپ جۇمىس ىستەيدى. قۇرامىندا 11 دەپۋتات بار.
ال اعىمداعى جىلى سەيم سپيكەرىنىڭ ماجىلىسكە رەسمي ساپارى جوسپارلانىپ وتىر. تاراپتار بۇل ەكى ەل پارلامەنتتەرى, سونداي-اق, جالپى قازاقستان مەن ليتۆا اراسىنداعى قارىم-قاتىناستى نىعايتۋعا جاڭا سەرپىن بەرەتىنىنە سەنىم ءبىلدىردى.