ەلىمىزدە اڭشىلىق شارۋاشىلىق جاڭا دەڭگەيگە كوتەرىلمەك. سونىڭ جارقىن ءبىر دالەلى – كەشە ۇلتتىق اكادەميالىق كىتاپحانادا رەسپۋبليكالىق اقپاراتتىق-تانىمدىق «قانسونار» جۋرنالىنىڭ تۇساۋكەسەر ءراسىمىنىڭ وتكىزىلۋى. بۇل باسىلىمنىڭ جارىق كورۋى اڭشىلىق ءداستۇر جالعاستىعىنىڭ ءورىس الۋىنا وزىندىك سەپتىگىن تيگىزەدى دەپ كۇتىلۋدە.
تۇساۋكەسەر راسىمىندە سويلەگەن ءسوزىندە «قانسونار» اڭشىلاردىڭ قوعامدىق بىرلەستىكتەرى مەن اڭشىلىق شارۋاشىلىعى سۋبەكتىلەرىنىڭ رەسپۋبليكالىق قاۋىمداستىعىنىڭ ءتوراعاسى ورالباي ءابدىكارىموۆ اڭشىلىق شارۋاشىلىعى تۋرالى اقپارات بەرە كەتتى. توراعانىڭ ايتۋىنشا, 2012 جىلعى 29 قاڭتاردا كۇشىنە ەنگەن «جانۋارلار دۇنيەسىن قورعاۋ, ءوسىمىن مولايتۋ جانە پايدالانۋ تۋرالى» زاڭنىڭ جاڭا رەداكتسياسىنا سايكەس, ەلىمىزدىڭ اڭشىلىق جۇرتشىلىعى مەن اڭشىلىق شارۋاشىلىعى سۋبەكتىلەرىنىڭ الدىنا رەسپۋبليكالىق قاۋىمداستىق قۇرۋ مىندەتى قويىلىپ جانە مەملەكەت تاراپىنان قاۋىمداستىققا جانۋارلار دۇنيەسىن قورعاۋ, ونىڭ ءوسىمىن مولايتۋ جانە پايدالانۋ جونىندەگى ءوز وكىلەتتىكتەرىنىڭ ءبىر بولىگى بەرىلگەن-ءدى.
«وسىلايشا, اڭشىلىق شارۋاشىلىعىن باسقارۋ جانە جۇرگىزۋ ماسەلەلەرى بويىنشا مەملەكەت پەن قوعام اراسىنداعى ارىپتەستىك قاتىناستاردى قالىپتاستىرۋدىڭ قۇقىقتىق نەگىزدەرى جاسالدى», دەدى و.ءابدىكارىموۆ.
«قانسونار» جۋرنالىنىڭ باس رەداكتورى ساعيدوللا كوشىمباەۆتىڭ سوزىنە قاراعاندا, جۋرنال توقسانىنا 1 رەت, ال جىلىنا 4 رەت مەملەكەتتىك تىلدە جانە ورىس تىلىندە جارىق كورەدى. بولاشاقتا اعىلشىن تىلىندە شىعارۋ جوسپارلانىپ وتىر. جۋرنال قىزمەتكەرلەرى اڭشىلىق شارۋاشىلىقتارىندا زەرتتەۋلەر جۇرگىزىپ, ءداستۇرلى اڭ اۋلاۋدى قولداۋعا, ەلىمىز بەن شەتەلدەردەگى اڭشىلىق ءتاجىريبەلەر مەن تۋرلاردى, براكونەرلەرمەن كۇرەستى ناسيحاتتاۋعا ۇلەس قوسادى. جانە دە قازاقستاننىڭ سي-اي-سي-گە كىرىپ, الەمدىك قوعامداستىقتىڭ تولىققاندى مۇشەسى اتانۋىنا, جانۋارلار مەن كەمىرگىشتەر اراسىندا زالالدى اۋرۋلاردىڭ تاراماۋىنا قولعابىس ەتۋ جوسپارلانىپ وتىرعانى العا تارتىلدى.
سونداي-اق, اڭشىلىق قۇرال-سايمانى, اڭشى يتتەر, جابايى جانۋارلار تۋرالى تانىمدىق ماعلۇماتتار بەرىلىپ, كوركەم بەزەندىرىلگەن باسىلىم ستۋدەنتتەر مەن مەكتەپ وقۋشىلارى ءۇشىن دە قىزىقتى ەتىپ جاسالماق. بۇدان باسقا, ەلىمىزدىڭ كورىكتى جەرلەرى كورسەتىلىپ, ۇلتتىق پاركتەر مەن جان-جانۋارلار الەمىمەن تانىستىرۋ جۇزەگە اسىرىلادى. اسىرەسە, اتاقتى جازۋشىلاردىڭ عاجاپ ساتتەر جايلى جازبالارى, اڭشىنىڭ ءازىل-قالجىڭدارى مەن وسى تاقىرىپتا جازاتىن ازاماتتاردىڭ شىعارمالارىن باسۋ كوزدەلگەن.
سونىمەن, «قانسونار» رەسپۋبليكالىق اقپاراتتىق-تانىمدىق جۋرنالى ازىرگە 1 مىڭ دانامەن جارىق كورۋدە. الدا جازىلۋ ارقىلى تارالادى دەپ كۇتىلۋدە. جۋرنالعا 2014 جىلدىڭ ەكىنشى جارتىسىنان «قازپوشتا» اق ارقىلى 74728 يندەكسى بويىنشا جازىلۋعا بولادى.
اسقار تۇراپباي ۇلى,
«ەگەمەن قازاقستان».