ۇلتتىق بانكتىڭ كەشەگى, 11 اقپان كۇنگى تەڭگەنىڭ ايىرباس باعامىن بۇرىنعى دەڭگەيىندە ۇستاپ قالۋدان باس تارتۋ جونىندەگى كوپشىلىك كۇتپەگەن شۇعىل شەشىمى وبلىس تۇرعىندارى اراسىندا ءارتۇرلى پىكىرلەر تۋعىزدى. وسىنداي تولقىمالى كوڭىل-كۇي اۋانى قۇرمەتتى ەڭبەك دەمالىسىندا جۇرگەن اعا بۋىن وكىلدەرى اراسىندا دا بايقالماي قالعان جوق. وسىعان بايلانىستى بىردەن كوكەيگە كەلگەن كەيبىر وي-پىكىرلەرىمدى ءوزىم تۇراقتى تۇردە جازدىرىپ الىپ وقيتىن ەلىمىزدىڭ باس باسىلىمى «ەگەمەن قازاقستانعا» جەدەل جولداعاندى ءجون كوردىم.
مەنىڭ ويىمشا, ءاپ دەگەندە ادامداردىڭ كوڭىل-كۇيىنە تەرىس, جاعىمسىزداۋ اسەر ەتەتىن مۇنداي شەتىن ماسەلەدە اپتىقپاعان, سەزىمدى اقىلعا جەڭگىزگەن ءجون بە دەپ ويلايمىن. سونداي-اق, بۇل قادام جەتى رەت ولشەپ, ءبىر رەت كەسىپ دەگەندەي, ابدەن ويلانىپ, ساراپتالىپ جاسالعان قادام دەگەن ويعا سەنگىم كەلەدى. اسىرەسە, ايىرباس باعاسىنىڭ اقش دوللارىنا شاققاندا 185 تەڭگەگە دەيىن ءوسۋى, ەڭ بىرىنشىدەن, ەكونوميكامىزدىڭ تيىمدىلىگىن كوتەرۋ, قارجىلىق تۇراقتىلىقتى ساقتاۋ تۇرعىسىنان قابىلدانىپ وتىرعانىنا كۇمان كەلتىرۋگە بولمايدى. سوندىقتان دا تەڭگەنىڭ ايىرباس باعامىنىڭ قۇنى كۇرت وسكەنىنەن اقىرزامان تۋعىزىپ, كۇيرەۋىك كوڭىل-كۇيگە بەرىلۋدىڭ قاجەتى شامالى دەگەن ويدامىن.
ال, ۇلتتىق بانكتىڭ مۇنداي كۇرت شەشىمىنەن كەيىن زەينەتكەرلەردىڭ جاي-كۇيى قانداي بولماق دەگەن باسى اشىق ساۋالعا كەلسەك, بۇدان زەينەت جاسىنداعى زامانداستارىمىز ايتارلىقتاي ۇتىلىس تاپپايدى دەپ ايتۋعا بولادى. ارينە, نەندەي قۇبىلىسقا دا ءتيىستى دالەل تاۋىپ, ايتا الماساڭ, قۇرعاق ءسوز ادامداردى سەندىرە المايدى.
وسىعان بايلانىستى تومەندەگىدەي دەرەكتەردى وقىرماندار نازارىنا تاعى ءبىر قايتارا بەرە كەتكەننىڭ ارتىقشىلىعى جوق سەكىلدى. بيىل ەلىمىزدە تۇراتىن زەينەتكەرلەردىڭ زەينەتاقىسى توعىز پايىزعا وسكەنى بەلگىلى. ونىڭ ۇستىنە ينتەرنەتتەن جانە باسقا دا سەنىمدى دەرەك كوزدەرىنەن الىنعان مالىمەتتەرگە قاراعاندا, تۇتاستاي رەسپۋبليكاداعى جانە وڭىرلەردەگى ينفلياتسيا دەڭگەيى سونشالىقتى جوعارى ەمەس. بۇل نەبارى 7 پايىز توڭىرەگىندە عانا. ال اقجايىق وڭىرىندە بۇل كورسەتكىش بۇدان دا تومەن. وسىنداي فاكتورلاردى ەسكەرە كەلگەندە, تەڭگەنىڭ دوللارعا شاققانداعى جاڭا باعامىنىڭ پليۋستەرى مەن مينۋستارى اراسىنداعى ايىرماشىلىق زەينەتكەرلەر ءۇشىن شامامەن ەكى پايىزعا تەڭەسەدى ەكەن.
قالاي دەگەندە دە, ۇلتتىق بانكتىڭ كەشەگى شۇعىل شەشىمىنەن, ايىرباس باعاسىنىڭ ساتىلاپ ەمەس, بىردەن كۇرت وسكەنىنەن ۇتپاساق, ۇتىلماسىمىز انىق.
جايساڭ اقباي,
زەينەتكەر.
ورال.