مۇنايلى جاڭاوزەن جاڭعىرۋ جولىنا ءتۇستى. قالانى الەۋمەتتىك-ەكونوميكالىق دامىتۋدىڭ 2012-2020 جىلدارعا ارنالعان, كاسىپكەرلىكتى دامىتۋدىڭ 2012-2014 جىلدارعا ارنالعان جوسپارلارىن جانە مونوقالالاردى دامىتۋ باعدارلاماسىن باسشىلىققا العان قالا ەڭسەسىن كوتەرىپ, بويىن تىكتەپ كەلەدى.
مۇنايلى جاڭاوزەن جاڭعىرۋ جولىنا ءتۇستى. قالانى الەۋمەتتىك-ەكونوميكالىق دامىتۋدىڭ 2012-2020 جىلدارعا ارنالعان, كاسىپكەرلىكتى دامىتۋدىڭ 2012-2014 جىلدارعا ارنالعان جوسپارلارىن جانە مونوقالالاردى دامىتۋ باعدارلاماسىن باسشىلىققا العان قالا ەڭسەسىن كوتەرىپ, بويىن تىكتەپ كەلەدى.
تابيعي ءوسىم جانە ىشكى ميگراتسيا اسەرىنەن جاڭاوزەن تۇرعىندارىنىڭ سانى وتكەن جىلى 130 مىڭعا جۋىقتادى. كاسىپكەرلىككە قولداۋ كورسەتىلۋى, جاڭا جۇمىس ورىندارىنىڭ اشىلۋى, الەۋمەتتىك الەۋەت مۇنايلى قالاعا قونىستانۋعا قىزىعۋشىلىق تانىتۋشىلاردىڭ قاتارىن ازايتپاي وتىر. بۇل قالانىڭ جان-جاقتى دامۋ ىرعاعىن ءبىر ساتكە تولاستاتۋعا بولمايتىندىعىن ۇقتىرادى.
جاڭاوزەندەگى 38 بالاباقشا 5505 بالانى قامتىعان, ال 22 كۇندىزگى مەكتەپتە 23018 وقۋشى ءبىلىم الۋدا. 2013 جىلى بۇدان 44 جىل بۇرىنعى جاڭالىقتى قايتالاپ, 4176 ءسابي ومىرگە كەلدى.
وتكەن جىلى مۇندا 15 جاڭا نىسان پايدالانۋعا بەرىلدى. ولاردىڭ اراسىندا «جۇلدىز» شاعىن اۋدانىنان اشىلعان 320 ورىندىق بالاباقشا, «بوستاندىق» شاعىن اۋدانىنداعى 624 ورىندىق مەكتەپ, «راحات» شاعىن اۋدانىنداعى 250 ورىندىق ەمحانا, 2 ستاتسيونارلىق پوليتسيا بەكەتى, ت.ب. بار. «راحات-3» شاعىناۋدانىن سۋمەن جابدىقتاۋ جۇيە-ءسى, 20 اۋلا الاڭى, 12 مەكتەپ اۋلاسى ىسكە قوسىلدى. جاڭادان اشىلعان «جالىن» كينوتەاترى, «نەسىپ» بالاباقشاسى, «نۇر-شىن» جشس 30-دان استام تۇرعىنعا جاڭا جۇمىس ورىندارىن ۇسىندى.
الەۋمەتتىك ءدۇمپۋى وسىلاي ورىلگەن ءوڭىر 2013 جىلى 141,9 ملرد. تەڭگە ءونىم ءوندىرىپ ونەركاسىپتىك ءونىمنىڭ ناقتى كولەم يندەكسى 112,4%-دى قۇرادى. 457,4 مىڭ توننا شيكى مۇناي ءوندىرىلىپ, وتكەن جىلمەن سالىستىرعاندا, 9,6 %-عا ارتىق كورسەتكىش بەردى. گاز وندىرۋدە دە ەڭبەك ونىمدىلىگى ۇدەگەن – 460,6 ملن. تەكشە مەتر تابيعي گاز ءوندىرىلىپ, 2012 جىل قورىتىندىسىنان 2,9 %-عا ارتتى. حالقى كوپ قالادا قۇرىلىس جۇمىستارى ەرەكشە قارقىنعا يە. وتكەن جىلى قۇرىلىس جۇمىستارىنىڭ كولەمى 20,3 ملرد. تەڭگەنى قۇراعان.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتەردى تۇسىرگەندەر
ەرلان وماروۆ, سەرىك مايەمەروۆ.