ۋكراينا استاناسى كيەۆتە دەمونسترانتتار بيلىكپەن كەلىسسوز جۇرگىزۋدەن باس تارتىپ, نارازىلىق اكتسيالارىنىڭ اۋقىمىن كەڭەيتۋگە شەشىم قابىلدادى. بۇل تۋرالى Azattyg.org حابارلادى.
23 اقپاندا وپپوزيتسيا جەتەكشىلەرى ۆيتالي كليچكو, ولەگ تياگنيبوك جانە ارسەني ياتسەنيۋك ۋكراينا باسشىسى ۆيكتور يانۋكوۆيچپەن تاعى كەزدەستى. كەزدەسۋدەن سوڭ تاۋەلسىزدىك الاڭىنا بارعان كليچكونىڭ ايتۋىنشا, كەلىسىمگە سايكەس, پرەزيدەنت يانۋكوۆيچ پەن ىشكى ىستەر ءمينيسترى دەمونسترانتتارعا كۇش قولدانۋدى, زورلىق-زومبىلىقتى توقتاتىپ, بارلىق قامالعانداردى بوساتادى. ال نارازىلىق تانىتۋشىلار ميليتسياعا قارسى ارەكەتتەرىن توقتاتۋى ءتيىس. ۋنيان اگەنتتىگىنىڭ حابارلاۋىنشا, ولەگ تياگنيبوك الاڭدا دەمونسترانتتاردان قامالعانداردىڭ بوساتىلۋى ءۇشىن گرۋشەۆسكي كوشەسىن بوساتۋدى سۇراعان بولاتىن. بىراق دەمونسترانتتار ول ۇسىنىستى قولداماي, قارسىلىقتى جالعاستىرا بەرۋگە نيەت ءبىلدىرىپتى. وعان جاۋاپ رەتىندە تياگنيبوك نارازىلىق تانىتۋشىلاردى ءتارتىپ ساقتاپ, نۇسقاۋدى ورىنداۋعا شاقىردى.
وپپوزيتسيانىڭ تاعى ءبىر جەتەكشىسى ارسەني ياتسەنيۋك نارازىلىق اكتسياسىن ينستيتۋت كوشەسىنەن ولگينسكي كوشەسىنە دەيىن كەڭەيتۋ تۋرالى ماسەلە كوتەردى. كيەۆتە 19 قاڭتاردا بەيبىت جيىن وتكىزۋدى شەكتەيتىن زاڭ قابىلدانۋىنا قارسى جاپپاي ەرەۋىلدەر باستالعان ەدى. سودان بەرى شەرۋشىلەر مەن ميليتسيا اراسىنداعى قاقتىعىستاردان بەس ادام قازا تاۋىپ, 300-گە جۋىعى جاراقات الدى. ۋكرايناداعى حالىق نارازىلىعى 2013 جىلى قاراشادا - ۋكراينا پرەزيدەنتى يانۋكوۆيچ ەۋروپا وداعىمەن سەرىكتەستىك شارتىنا قول قويماي تاستاعانىنان كەيىن باستالعان. ۋكراينا بيلىگى ەو-دان باس تارتقان سوڭ ماسكەۋمەن كەلىسسوزدەر وتكىزىپ, كرەمل بۇل ەلگە قارجىلىق كومەك بەرۋگە جانە گازدى ارزان ساتۋعا كەلىسكەن. ەۋروپامەن ينتەرگاتسيانى جاقتاۋشىلاردىڭ سودان بەرى باسىلماي كەلە جاتقان «ەۋرومايدان» اكتسياسى 2004 جىلى ۋكراينادا بولعان «قىزعىلت-سارى توڭكەرىستەن» كەيىنگى ەڭ ءىرى نارازىلىق شاراسى بولىپ وتىر.
ايدار ورىسباەۆ.
دەرەككوز: Azattyg.org
فوتو: Zn.ua