قارۋلى كۇشتەردىڭ بارلىق قويمالارىنداعى وق-دارىلەردى تەكسەرۋ كوميسسياسىنىڭ قۇرامى تاعايىندالدى. وعان قورعانىس مينيسترلىگى باس ينسپەكتسياسىنىڭ باستىعى, گەنەرال-لەيتەنانت ءامىر حالىقوۆ باسشىلىق ەتەدى.
شەشىم جامبىل وبلىسىندا ورىن العان وقيعاعا بايلانىستى قابىلداندى. العاشقى ساتتەن باستاپ-اق قورعانىس مينيسترلىگى ءورت سالدارىن جويۋ جۇمىستارىن ۇيىمداستىرىپ, وقيعانىڭ تۋىنداۋ سەبەپتەرى مەن ءمان-جايىن تالدادى.
قورعانىس مينيسترلىگى ارىستا بولعان ورتتەن كەيىن مۇنداي وقيعالاردى بولدىرماۋ ءۇشىن كەشەندى شارالار قابىلداعان بولاتىن. سونداي-اق قارۋلى كۇشتەردە قارۋ-جاراق پەن وق-دارىلەردى ساقتاۋ وبەكتىلەرىن جەتىلدىرۋ بويىنشا كەشەندى جوسپار جۇزەگە اسىرىلىپ, 30 جىل ىشىندە العاش رەت وق-دارىلەرگە تولىق تۇگەندەۋ جۇرگىزىلدى جانە ەكى ساقتاۋ بازاسىنىڭ قۇرىلىسى ۇيىمداستىرىلدى.
قابىلدانعان شارالارعا قاراماستان, بەرىلگەن بىرقاتار تاپسىرمالاردىڭ ءوز دەڭگەيىندە ورىندالماۋى جامبىل وبلىسىنداعى وقيعانىڭ سەبەبى بولۋى دا مۇمكىن. وقيعانىڭ شىنايى سەبەپتەرى مەن كىنالىلەردى تەرگەۋ جۇمىستارى انىقتاۋى ءتيىس.
وق-دارىلەردى ساقتاۋ وبەكتىلەرى رەجىمدىك ەكەنىن ەسكەرە وتىرىپ, كوميسسيا جۇمىسىنا كەڭەسشىلەر رەتىندە تاۋەلسىز جانە بىلىكتى ساراپشىلاردى, ونىڭ ىشىندە قارۋلى كۇشتەردىڭ ارداگەرلەرىن تارتۋ تاپسىرىلدى.
كوميسسيا وق-دارىلەردىڭ ساقتاۋ جاعدايىنا وبەكتيۆتى باعا بەرىپ, بارلىق كەمشىلىكتى انىقتاۋعا جانە ولاردى جويۋ جونىندەگى جۇمىستاردى ۇيىمداستىرۋعا ىقپال ەتەدى.
«ەگەمەن-اقپارات»