«ماڭگىلىك ەل» ۇعىمى ۇلتتىق يدەياعا اينالۋى كەرەك دەگەن قۋاتتى وي, قۇتتى لەبىز مەنىڭ اقىن جۇرەگىمە ءۇمىتتىڭ شالقار شۇعىلاسىن قۇيدى.
قازاق دەگەن ەلدىڭ جويىلىپ كەتپەۋى ءۇشىن جان بەرىسىپ,جان الىسقان باتىرلار مەن كۇڭىرەنىپ وتكەن ابىزداردىڭ, اق تىلەۋلى انالاردىڭ ارمانى دا ۇلان-عايىر دالانىڭ بەيبىت حالقىمىزعا ماڭگىلىك قونىس بولۋى ەدى عوي!
«ماڭگىلىك ەل» ۇعىمى ۇلتتىق يدەياعا اينالۋى كەرەك دەگەن قۋاتتى وي, قۇتتى لەبىز مەنىڭ اقىن جۇرەگىمە ءۇمىتتىڭ شالقار شۇعىلاسىن قۇيدى.
قازاق دەگەن ەلدىڭ جويىلىپ كەتپەۋى ءۇشىن جان بەرىسىپ,جان الىسقان باتىرلار مەن كۇڭىرەنىپ وتكەن ابىزداردىڭ, اق تىلەۋلى انالاردىڭ ارمانى دا ۇلان-عايىر دالانىڭ بەيبىت حالقىمىزعا ماڭگىلىك قونىس بولۋى ەدى عوي!
ازاتتىقتىڭ كەمەسىندە مەزگىلدىڭ شەكسىز مۇحيتىنا ۇلى شەرۋ تارتقان مەملەكەتىمىز ءۇشىن جاڭا تاريحي كەزەڭ باستالعان سياقتى.
قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆتىڭ استاناداعى تاۋەلسىزدىك سارايىندا قازاقستان حالقىنا ارناعان بيىلعى جولداۋىنان وسىنداي شەشىمدى وي تۇيدىك.
ماڭگىلىك ەل. ماڭگىلىك ءتىل.
ەندىگى جەردە ميلليونداعان ادامنىڭ اۋزىنان ماڭگىلىك ەل بولامىز دەگەن اتالى ءسوز ايتىلىپ, وسكەلەڭ ۇرپاق وسى يدەولوگيامەن ءومىر سۇرەتىن بولادى. «جاقسى ويلا. جاقسى سويلە. جاقسى ورىندا. جاقسى ءومىر ءسۇر», دەلىنەدى اقىلدى كىتاپتاردا. بۇل قاعيدانى ۇستانعان ادام – جاقسى ادام. جاقسى ادامدار مەملەكەتىمىزدىڭ مەرەيى ەمەس پە؟ «جاقسى ءسوز – جارىم ىرىس». «ءسوزدىڭ جانى بار», دەيدى دانا حالقىمىز.
ءيا, تىلەكتەر قابىل بولادى – ىزگى نيەتىمىزگە ارەكەتىمىز ساي كەلىپ, ىشىمىزدەگى قاسيەتتى كۇشىمىزدىڭ يگىلىگىن ىسىمىزدە كورسەتۋگە ىنتا-جىگەرىمىز جەتسە! «ادامزاتتىڭ باراتىن عاسىرىنا امان-ەسەن جەتسە ەكەن ءيسى قازاق», دەپ جىرلاپ ەدىك ءبىز دە تاۋەلسىزدىكتىڭ العاشقى تاڭىندا. شۇكىر, سولاي بولارىنا ءشۇباسىز سەنەتىن كەز كەلگەن سياقتى.
ىلگەرى ءۇمىتتىڭ ماڭگىلىگىنەن ءومىردىڭ ۇزاق جولدارى باستالادى. كوپ دۇنيە قامتىلعان بيىلعى جولداۋداعى قازاقستاندىقتاردىڭ پاتريوتتىق, گۋمانيستىك سەزىمدەرىنە تامىزىق تاستايتىن تۇجىرىمداردى قالىڭ كوپشىلىك قىزۋ قولدادى. قۇرىپ بارا جاتقان قۇندىلىقتاردىڭ ءبىرى – ادامنىڭ ادامعا جاناشىرلىق كورسەتۋى ەدى. جولداۋدا بۇل دا ەسكەرتىلدى.
وسى جولى دا ميىمىزدى عىلىم-بىلىمگە, بىلەگىمىزدى جۇمىسقا جەگۋدىڭ اسا ماڭىزدىلىعى باسا ايتىلدى.
2050 ستراتەگياسى الىس كەلەشەكتى اقىلمەن شولىپ, عارىشتىق كەڭىستىكتى قيالمەن شارلاعان ءور رۋحتى حالقىمىز ءۇشىن سونشا ساعىم دۇنيە ەمەس.
ولشەمدەرى ايدىك, تەڭەۋلەرى دە بويشاڭ, ءنان.
قۇدالارىن-داعى «مىڭ جىلدىق قۇدا» دەي سالعان.
ورەلى حالقىم, وركەنيەتكە وي سالعان,
امان بول, كوپ بول, داڭقىنان دۇشپان تايسالعان.
ءاربىر وتانداسىمىز جاۋاپكەرشىلىك تىزگىنىن تارتىپ ۇستاپ, ۋاقىت دەگەن عالاماتتى ۇتىمدى يگەرىپ, ءوزى ءۇشىن, جاقىندارى ءۇشىن, وتباسى, وتانى ءۇشىن قۇلشىنىپ ءبىلىم ىزدەپ, ەڭسەرىپ ەڭبەك ەتسە, ءتارتىبىمىز كەتپەسە, تابيعاتىمىز ازباسا, 30 ەلدىڭ اراسىنان قارا كورسەتۋىمىزگە كىم كەدەرگى بولا الار؟!
ەلباسىنىڭ ناقتى ۇسىنىستارى مەن تاپسىرمالارى ەلىم دەگەن ەرلەرگە, مەملەكەتتىك قىزمەتتەگىلەرگە وراسان ۇلكەن مىندەت جۇكتەيدى. ونىڭ ورىندالۋ مۇمكىندىكتەرى مەن جولدارىن پرەزيدەنت جەرىنە جەتكىزىپ ايتتى. ماڭگىلىك ەل بولۋ ءۇشىن قۋاتىمىز ارتىپ, مادەنيەتىمىز كوتەرىلۋى كەرەكتىگىن سارالاپ, دامۋدىڭ بارلىق سالاسىندا ادىلەتتىلىك پەن ساپالىلىقتىڭ قاداعالانۋىن ءتيىستى ورىندارعا تاپسىردى. ارعى جاعى اركىمنىڭ ار, نامىسىنا امانات!
وسى جولعى رۋحىمىزدى كوتەرگەن ۇلتتىق يدەيا – ماڭگىلىك ەل بولۋ – قازاقستاندىقتار ءۇشىن جاسامپاز ارمان, جارقىن جول.
تاڭعى اۋانىڭ تاۋسىلماي تازا لەبى,
جان دالانىڭ اشىلىپ اجار, ءوڭى,
شاڭىراعىنا توگىلىپ راحمان نۇرى,
جەر بەتىندە ماڭگى تۇر, قازاق ەلى!
كۇلاش احمەتوۆا,
قازاقستان رەسپۋبليكاسى مەملەكەتتىك
سىيلىعىنىڭ لاۋرەاتى.
تاراز.