تاەكۆوندودان قازاقستان چەمپيونى ازامات تەڭىزباەۆقا ۇلىبريتانيا سوتىنىڭ ۇكىمىمەن يزرايل ازاماتشاسىنا قول جۇگىرتتى دەگەن ايىپ تاعىلعان بولاتىن. جاقىندا ول اقتالىپ, ەلگە ورالدى. بۇل تۋرالى Egemen.kz ءتىلشىسى حابارلادى.
بۇگىن, استانادا ازامات تەڭىزباەۆتىڭ ەلىمىزگە ورالۋىنا بايلانىستى قازاقستان تاەكۆوندو فەدەراتسياسى ءباسپاسوز ءماسليحاتىن وتكىزدى. جيىندا ءسوز العان قازاقستان تاەكۆوندو (WTF) فەدەراتسياسىنىڭ پرەزيدەنتى ۆياچەسلاۆ كيم جارتى جىل بۇرىن ورىن العان وقيعانىڭ ءمان-جايى جونىندە بىلاي دەدى: «وزدەرىڭىز بىلەتىندەي, ازامات تەڭىزباەۆ 2013 جىلدىڭ 15-21 شىلدە ارالىعىندا مەكسيكادا وتكەن تاەكۆوندودان الەم چەمپيوناتىنىڭ سوڭعى كۇنىندە جەڭىلىپ قالدى. ەلىنە قايتاردا كوڭىل-كۇيى بولماي, ۇشاقتاعى ورىنعا ىڭعايسىزداۋ جايعاسقان ەكەن. تىنىمسىز جاتتىعۋلار مەن ۇشاقتا 12 ساعات بويى وتىرۋ ازاماتتىڭ ەرىكسىز ۇيىقتاۋىنا اسەر ەتتى. ونىڭ بىردە قولى, بىردە باسى قاسىندا وتىرعان يزرايل ازاماتشاسىنىڭ دەنەسىنە ءتيىپ كەتكەندىكتەن, بورت جول سەرىگى ازاماتتىڭ باسقا جەرگە وتىرۋىن ءوتىندى. سوسىن ول كومانداداعى ارىپتەسى جۇلدىزبەن ورىن الماستىرادى. بىراق, لوندوننىڭ حيتروۋ اۋەجايىنا كەلگەندە, جەرگىلىكتى پوليتسەيلەر ونى ۇستاپ اكەتكەن».
انگليانىڭ زاڭى بويىنشا, ايىپتالۋشى ءبىر رەت تەگىن ادۆوكات جالداۋعا قۇقىلى. وسى ورايدا ازاماتتىڭ ايتۋى بويىنشا, ونىڭ قورعاۋشىسى بولعان شىنار: «ەگەر, كىنانى موينىنا الاتىن بولساڭ, ءىس ۇلكەن سوتقا وتپەيدى. سوندىقتان ۇيىڭە تەزىرەك قايتقىڭ كەلسە, سوتتا «كىنالىمىن» دەۋىڭ كەرەك دەپتى. الايدا, جەرلەسىمىز ونىڭ ايتقانىن تىڭداعانىمەن, ءىس ودان ءارى ۋشىعىپ كەتكەن. ارتىنان قورعاۋشىنىڭ الداعانى ءمالىم بولدى.
بۇدان كەيىن ازاماتتىڭ اتا-اناسى بالاسىن كەپىلدىكپەن قالادا جۇرۋىنە رۇقسات العان. ونداعى تارتىپكە سايكەس, 20:00-دەن تاڭعى 8:00-گە دەيىن ۇيدەن شىعۋعا بولمايدى. جالپى, التى ايعا سوزىلعان ۋاقىت ارالىعىندا جەرلەسىمىز اعىلشىن ءتىلىن ءبىرشاما مەڭگەرىپتى.
كەلەڭسىزدىكتىڭ باسى-قاسىندا شىر-پىر بولىپ جۇرگەن سپورتشىنىڭ اناسى جازيرا تىلەشوۆا ءباسپاسوز ءماسليحاتىندا ءوز پاتەرىن ساتىپ جىبەرگەنىن ايتىپ, كوز جاسىنا ەرىك بەردى: « ۇلىم ءۇشىن بارلىعىن قۇربان ەتۋگە دايىنمىن. پاتەرىمىزدى ساتىپ, 10 مىڭ دوللارعا بىلىكتى ادۆوكات جالدادىم. شۇكىر, قازىر بارلىعى ورنىنا كەلدى. بىزگە قولداۋ كورسەتكەندەرگە العىسىم شەكسىز».
تەڭىزباەۆتار وتباسى ءۇشىن تاعى ءبىر قۋانىشتى جاڭالىق – بۇعان دەيىن 15 مىڭ دوللار كولەمىندە جاردەم كورسەتكەن قازاقستان تاەكۆوندو فەدەراتسياسى تاياۋ كۇندەرى ازاماتتىڭ اتا-اناسى شىعىنداعان 60 مىڭ دوللاردى دا تولىعىمەن وتەپ بەرەتىن بولدى.
ازامات ءباسپاسوز ءماسليحاتىندا كەلەسىدە شەتەلگە بارعانىندا مۇقيات بولاتىنىن مالىمدەدى. ول ءبىر اپتاداي تىنىعىپ العان سوڭ قازاقستان قۇراماسىمەن بىرگە كەزەكتى وقۋ-جاتتىعۋعا كىرىسەدى.
داستان كەنجالين.
الماس ماناپ.
دەرەككوز: Egemen.kz.
فوتو: الماس ماناپ.