بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى م.احمەتجانوۆ ۆەدومستۆونىڭ ءبىرىنشى جارتىجىلدىقتاعى جۇمىس قورىتىندىسى بويىنشا ءوتىپ جاتقان القا وتىرىسىندا ايتتى, دەپ جازادى Egemen.kz.
م.احمەتجانوۆتىڭ ايتۋىنشا, قازىرگى ۋاقىتتا اگەنتتىك «اتامەكەن» ۇكپ-مەن بىرلەسىپ كونكۋرستار بويىنشا ساتىپ الۋ باعاسىنا مونيتورينگ جانە تالداۋ جۇرگىزىپ جاتىر.
«مىسالى, باتىس قازاقستان وبلىسى كازتالوۆ اۋدانىنىڭ اكىمدىگى 30 ملن. تەڭگەگە پاتەر ساتىپ الۋدى جوسپارلادى. پاتەردىڭ اۋدانى – 40-60 شارشى مەتر. مۇنداي باعالار ءتىپتى ەلوردادا دا جوق. ءبىزدىڭ ۇسىنىسىمىز بويىنشا باعا 6 ەسەگە تومەندەپ, 5 ملن تەڭگە بولدى», دەدى ول.
سونداي-اق, ول وتكەن جىلى 40 ملرد تەڭگە ارتىق شىعىن انىقتالسا, بيىلعى جىلدىڭ ءبىرىنشى جارتىجىلدىعىندا 36 ملرد تەڭگە انىقتالعانىن ايتتى.
ء«بىز كورسەتكىشتىڭ ءوسۋىن جەتىستىك دەپ ايتامىز, بىراق ءىس جۇزىندە بۇل پروبلەمالىق سيگنال. باعانى كوتەرۋ – الداعى ۋاقىتتا پارا الۋ مەن قايتارۋ ءۇشىن العاشقى قادام», دەپ اتاپ ءوتتى انتيكور باسشىسى.
بۇل ماسەلەنى شەشۋ ءۇشىن اگەنتتىك مەملەكەتتىك جوسپارلاۋ جانە مەملەكەتتىك ساتىپ الۋ پورتالدارىن بىرىكتىرۋدى, بيۋدجەتتىك وتىنىمدەردى ورنالاستىرۋدىڭ جاريالىلىعىن, بىرتەكتى تاۋارلار ءۇشىن بىرىڭعاي ەرەكشەلىك پەن باعانى بەلگىلەۋدى, سونداي-اق بيۋدجەت قاراجاتىن بولۋدەن باستاپ يگەرۋگە دەيىن سۇيەمەلدەۋدى ەنگىزگەن.
م. احمەتجانوۆتىڭ ايتۋىنشا, بۇل باستامالاردىڭ بارلىعىن مەملەكەت باسشىسى قولداعان. قازىر ۇكىمەت ءتيىستى شارا قابىلداپ جاتىر.