ادام مەن تابيعات اراسىنداعى بايلانىس تىرشىلىكتىڭ تامىرىنا قان جۇگىرتەدى. جەر-انا بۋسانعان قازىرگى ساتتە بۇل كورىنىس جاڭا ءبىر قىرىنان تانىلۋدا. مەملەكەت تاراپىنان دا قورشاعان ورتاعا دەگەن قامقورلىق اياسى كەڭەيە تۇسۋدە. الماتى وبلىستىق “جاسىل ەل” جاستار قوزعالىسى جاندانىپ, وڭىردەگى ەلدى مەكەندەردەگى اباتتاندىرۋ, كوگالداندىرۋ باعىتىندا كوپتەگەن جاقسى ىستەردىڭ ۇيىتقىسى بولىپ كەلەدى.
ولاردىڭ باستاماسىمەن پانفيلوۆ اۋدانى ۇلكەناعاش سەلولىق وكرۋگىنە قاراستى كيەلى اعاش ماڭايىن كوگالداندىرۋ, اسەم تابيعاتتى جاس كوشەتتەرمەن كومكەرۋ باعىتىنداعى جۇمىس جالعاستى. جيىنعا ۇلكەن-كىشى قاتىسىپ, تابيعاتقا دەگەن شىنايى كوزقاراس ونىڭ تازالىعىن ساقتاۋ, باردى قادىرلەۋ, قۇرمەتتەۋگە ءوز ۇلەسىن قوسۋ ماقساتىندا ورامدى ويلار ورتاعا سالىندى.
جاركەنتتىك ەڭبەك ەرى كۇلاش ايتجانوۆا ديقان رەتىندە ومىرلىك ءتاجىريبەسىنەن ورتاعا سالىنعان وي-پىكىر دە جاستاردىڭ كوڭىلىنەن مىقتاپ ورىن الدى. “جەر-انا – اسىراۋشىمىز. وعان ادال ەڭبەك ەتىپ, تەر توككەندە عانا ونىڭ قايتارىمى بولادى. جاستاردىڭ بۇگىنگى باستاماسى قۋانىشتى. “ارتىڭدا مال قالعانشا, تال قالسىن” دەپ بەكەر ايتىلماعان, دەدى ول.
اينالانى نۇرعا بولەگەن ءساۋىر ايى كوگالداندىرۋعا قولايلى كەزەڭ. جاركەنتتىكتەر دە ءار كۇندى تابيعات اياسىندا وتكىزىپ, ەلدى مەكەندەردىڭ كورىكتەنۋىنە وزىندىك ۇلەستەرىن قوسۋدا.
كۇمىسجان بايجان, الماتى وبلىسى.