بيىل وبلىستا ۇزىندىعى 339 شاقىرىمدى قۇرايتىن اۆتوموبيل جولدارى مەن كوپىر وتكەلدەرى جانە كوشەلەر جوندەلەتىن بولادى, دەپ حابارلايدى ەgemen.kz
وعان رەسپۋبليكالىق جانە وبلىستىق بيۋدجەتتەن 19 ملرد تەڭگەدەن استام قاراجات بولىنگەن. سونداي-اق, مەملەكەتتىك باعدارلامالار ارقىلى دا 10 362,0 ملن تەڭگە كولەمىندە ينۆەستيتسيا تارتىلعان. بۇل تۋرالى وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن بريفينگتە وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى مۇرات تىلەۋمبەتوۆ مالىمدەدى.
«نۇرلى جول» باعدارلاماسى اياسىندا 33 جوبا ىسكە اسىرىلادى. ياعني بيىل وبلىستىق جانە اۋداندىق ماڭىزى بار جولدار جوندەلىپ, پايدالانۋعا بەرىلەدى. سونداي-اق, جول قوزعالىسى قاۋىپسىزدىگىن قامتاماسىز ەتۋ ماقساتىندا «قىزىلوردا –جالاعاش» جولى جوندەۋدەن وتەدى. ەلدى مەكەندەردىڭ كىرەبەرىس جولدارىن دامىتۋ جانە اۋدان ورتالىقتارىمەن بايلانىستىرۋ ماقساتىندا ارال اۋدانىنىڭ جاڭاقۇرىلىس, بەكباۋىل اۋىلدارىنا باراتىن جولداردى سالۋ ءۇشىن جاڭا جوبالار جۇزەگە اسىرىلادى, - دەدى مۇرات جولكەلدى ۇلى.
سونىمەن قاتار, وبلىستىق ماڭىزى بار جولداردىڭ بويىنداعى اپاتتىق جاعدايداعى بەس كوپىر جوندەلەدى. بۇعان قوسا, قازالى اۋدانى, قارلان ۋچاسكەسىنە سىرداريا وزەنى ارقىلى كوپىر سالىناتىن بولادى. بۇگىندە جوبا-سمەتالىق قۇجاتتارى ازىرلەنىپ, مەملەكەتتىك ساراپتامادان وتكىزىلۋدە. ءتيىستى قۇجاتتارى دايىن بولعاندا قۇرىلىس جۇمىستارى باستالادى.