ءبىلىم جانە عىلىم ءمينيسترى جانسەيىت تۇيمەباەۆ ەلىمىزگە ارنايى ساپارمەن كەلگەن بريتانيا ۇكىمەتىنىڭ حالىقارالىق ساۋدا جانە ينۆەستيتسيا جونىندەگى ارنايى وكىلى يورك گەرتسوگى حانزادا ەندريۋ البەرت كريستيان ەدۆارد ۆيندزورسكيمەن كەزدەستى.
مارتەبەلى مەيمان وسى ءجۇزدەسۋ الدىندا بيىل العاشقى تالاپكەرلەردى قابىلدايتىن استانانىڭ جاڭا ۋنيۆەرسيتەتىندە بولىپ, وقۋ ورنىنىڭ دايىندىعىن, زامان تالابىنا قاراي جابدىقتالىپ جاتقان كابينەتتەردى ارالاپ كوردى. بۇل ۋنيۆەرسيتەتتىڭ الەمدەگى تاڭداۋلى جوعارى وقۋ ورىندارى ساناتىندا بولاتىنىنا سەنىم ءبىلدىردى. وسى ارادا وتانىمىزداعى بولاشاعى زور بۇل ءبىلىم ورداسى لوندوننىڭ ۋنيۆەرسيتەتتىك كوللەدجىنىڭ سەرىكتەستىگىمەن اشىلىپ جاتقانىن نازارعا سالا كەتسەك دەيمىز.
ءوز كەزەگىندە مينيستر يورك گەرتسوگىنا ەلىمىزدىڭ ءبىلىم بەرۋ جۇيەسىندەگى ىرگەلى وزگەرىستەرى مەن قول جەتكەن جەتىستىكتەرى تۋرالى ايتا كەلىپ, مۇنىڭ ءبارى ەلباسى نۇرسۇلتان نازارباەۆتىڭ ايرىقشا ءمان بەرۋىنىڭ ارقاسىندا جۇزەگە اسىپ جاتقانىن جەتكىزدى. سونىمەن قاتار, قازاق ەلى ەۋروپالىق ءبىلىم كەڭىستىگىنە مۇشە بولىپ قابىلدانعانىن, ياعني بولون پروتسەسىنە قوسىلعانىن اتاپ ءوتتى. “بولاشاق” باعدارلاماسى بويىنشا دۇنيە ءجۇزىنىڭ ەڭ ۇزدىك وقۋ ورىندارىندا ءار جىل سايىن ءۇش مىڭ جاستىڭ ءبىلىم تولىقتىرىپ جاتقانىن, ولاردىڭ مىڭنان استامى انگليادا وقىپ جۇرگەنىن نازارعا سالدى. كاسىپتىك جانە تەحنيكالىق ءبىلىمدى دامىتۋدىڭ 2008-2012 جىلدارعا ارنالعان مەملەكەتتىك باعدارلاماسى اياسىندا ىسكە اسقان تىرلىكتەر تۋرالى, مامانداردىڭ بىلىكتىلىگىن ارتتىرۋ جانە قايتا دايارلاۋ بويىنشا ۇلىبريتانيانىڭ كوللەدجدەرىمەن بايلانىستىڭ جاقسى ورناعانىن, ستۋدەنتتەر الماسۋ, وقىتۋشىلاردىڭ پراكتيكادان ءوتۋى, وزىق تەحنيكالاردى وقىپ ۇيرەنۋ بىرلىكتە جۇرگىزىلىپ كەلە جاتقانى دا العا تارتىلدى.
سۇلەيمەن مامەت.