استاناداعى «پەكين پالاس» قوناق ۇيىندە «وتاندىق باق جانە ينتەرنەت-رەسۋرستاردىڭ باسەكەگە قابىلەتتىلىگىن ارتتىرۋ» اتتى سەمينار-ترەنينگ ءوتتى. وعان وتاندىق باق وكىلدەرى مەن رەسەي, ارمەنيا, ازەربايجان سىندى ەلدەردەن كەلگەن سالا ماماندارى قاتىسىپ, ءوز پىكىرلەرىن ورتاعا سالدى. شارانى مادەنيەت جانە اقپارات مينيسترلىگى اقپارات جانە مۇراعات كوميتەتىنىڭ توراعاسى بولات قاليانبەكوۆ ارنايى قۇتتىقتاۋ سوزبەن اشتى.
استاناداعى «پەكين پالاس» قوناق ۇيىندە «وتاندىق باق جانە ينتەرنەت-رەسۋرستاردىڭ باسەكەگە قابىلەتتىلىگىن ارتتىرۋ» اتتى سەمينار-ترەنينگ ءوتتى. وعان وتاندىق باق وكىلدەرى مەن رەسەي, ارمەنيا, ازەربايجان سىندى ەلدەردەن كەلگەن سالا ماماندارى قاتىسىپ, ءوز پىكىرلەرىن ورتاعا سالدى. شارانى مادەنيەت جانە اقپارات مينيسترلىگى اقپارات جانە مۇراعات كوميتەتىنىڭ توراعاسى بولات قاليانبەكوۆ ارنايى قۇتتىقتاۋ سوزبەن اشتى.
كوميتەت باسشىسى ءوز سوزىندە باسقوسۋعا قاتىسىپ وتىرعان بارشا قوناقتارعا ريزاشىلىعىن بىلدىرە كەلە, ەلىمىزدە ينتەرنەتتى پايدالانۋشىلار سانىنىڭ ون ميلليوننان اسقانىن جەتكىزدى. سونداي-اق, ول سوڭعى ون جىلدا الەمدە ينتەرنەتتى پايدالانۋشىلاردىڭ سانى بەس ەسەگە دەيىن كۇرت وسكەنىن جانە ەلىمىزدە دە قارقىندى دامىپ كەلە جاتقانىن نازاردان تىس قالدىرمادى.
سالاعا بايلانىستى كوپ پىكىرى ورتاعا سالىنعان بۇل جيىندا ارمەنيادان كەلگەن وكىل ارام سافاريان اقپاراتتىق سايتى جايىندا كەڭىنەن اڭگىمەلەسە, ازەربايجاندىق مامان گيۋلنارا مامەدزادە تاجىريبە الماسۋدا وسىنداي وتىرىستاردىڭ ماڭىزدىلىعى ەرەكشە ەكەنىن ايتا كەلە, الداعى ۋاقىتتا وسى سىندى باسقوسۋلار جيىرەك بولسا دەگەن نيەتىن جەتكىزدى.
«قازاق اقپارات» ۇك» اق باسشىسى داۋرەن دياروۆ تاريحى توقسان جىلدان اساتىن ەلىمىزدەگى ءىرى اقپارات اگەنتتىگى جايىنا توقتالدى. «بۇگىندە قازاق, اعىلشىن, ورىس تىلدەرىندە حابار تاراتاتىن اگەنتتىك, قازاق تىلىندە توتە جازۋ, لاتىن ءالىپبيى مەن كيريلليتسا سىندى ءۇش ۆاريانتتا دا وقىرمانداردى قامتاماسىز ەتىپ وتىرمىز. كەلەر جىلدان باستاپ قىتاي تىلىندە, ال 2015 جىلدان اراب, يسپان, تىلدەرىندە حابار تاراتۋدى جوسپارلاۋدامىز. ءسويتىپ, بۇيىرتسا, الەمنىڭ كوپتەگەن وقىرماندارى ءبىزدىڭ سايتتى وقيدى دەگەن نيەتتەمىز», دەدى ول. سونىمەن قاتار, ول اگەنتتىك جۋرناليستەرىنىڭ شەتەلدەردە تاجىريبە الماسۋلارىن قولعا العانىن ايتا كەلە, كەلەر جىلى كورەيا مەن يسپانيادا تىلشىلەر قوسىنىن اشۋدى كوزدەپ وتىرعاندارىن دا تىلگە تيەك ەتتى.
وتىرىستاعى پىكىر الماسۋلاردا قازىرگى تاڭدا ساراپشىلار ماسەلەسى دە ءسوز بولماي قالمادى. بۇل تۇرعىدا ساراپشى ماماندار جوقتىڭ قاسى دەگەن پىكىرلەرگە «رەيتينگ.kz» زەرتتەۋ اگەنتتىگىنىڭ ديرەكتورى داۋرەن ساكەن ۇلى ءوزىنىڭ كەلىسپەيتىندىگىن ايتا كەلە, ول ەكونوميكا, جۋرناليستيكا سالاسىندا تانىمال ساراپشىلار بار ەكەندىگىنە سەنىمدىلىگىن جەتكىزدى. سونداي-اق, «قازكونتەنت» اق باسقارما توراعاسىنىڭ ورىنباسارى نارتاي ءاشىم, «Kazakstan today» جشس باس ديرەكتورى تيمۋر قۇباتوۆ تا وزدەرىنىڭ سەمينار تاقىرىبىنا قاتىستى ويلارىن ءبىلدىردى.
ءابدىراحمان قىدىربەك,
«ەگەمەن قازاقستان».