ەلوردادا 18-23 قاراشا ارالىعىندا «جاستار كادرلىق رەزەرۆى-2013» جوباسى اياسىندا ءبىلىم جانە عىلىم مينيسترلىگىنىڭ قولداۋىمەن ەكىنشى وقۋ ءمودۋلى وتكىزىلۋدە. بۇل شارا جاستاردىڭ ءوز ورنىن تابۋىنا ىقپال ەتۋ ماقساتىندا ۇيىمداستىرىلعان.
ەلوردادا 18-23 قاراشا ارالىعىندا «جاستار كادرلىق رەزەرۆى-2013» جوباسى اياسىندا ءبىلىم جانە عىلىم مينيسترلىگىنىڭ قولداۋىمەن ەكىنشى وقۋ ءمودۋلى وتكىزىلۋدە. بۇل شارا جاستاردىڭ ءوز ورنىن تابۋىنا ىقپال ەتۋ ماقساتىندا ۇيىمداستىرىلعان.
ءبىرىنشى وقۋ ءمودۋلىنىڭ قورىتىندىلارى بويىنشا كونكۋرستىق كوميسسيا رەسپۋبليكا دەڭگەيىندە 2,5 مىڭ ادامنىڭ ىشىنەن جوباعا قاتىسۋىن جالعاستىراتىن ەڭ ۇزدىك 32 قاتىسۋشىنى تاڭداپ العان. جالپى قاتىسۋشىلار جەكە جوبالاردى قورعاۋ, تەستىلەۋدەن ءوتۋ جانە تۇلعالىق دامۋ تاقىرىپتارىنا ارنالعان ترەنينگتەردى تىڭداۋ باعىتتارى بويىنشا ىرىكتەلىپتى. سايىسقا تۇسكەن جوبالار نەگىزىنەن وزەكتىلىگىمەن, مانىمەن جانە جان-جاقتى ويلاستىرىلعاندىعىمەن ەرەكشەلەنۋى ءتيىس-ءتى. مۇنداي ۇدەدەن شىققاندار كوپ. الايدا, ا.راحمەتوۆانىڭ «ۆولونتەر», گ.جەتپىسوۆانىڭ «Online ۇلگىسىندەگى «كەڭەس ورتالىعى» جانە ب.ۇستەمىروۆانىڭ «جاس مامانعا – باسپانا!» اتتى جوبالارى توپ جارعاندىعىن ايتا كەتۋ كەرەك. ال ەكىنشى وقۋ ءمودۋلىنىڭ باعدارلاماسى بويىنشا قاتىسۋشىلار شەشەندىك ونەردى قالىپتاستىرۋعا, قوعامدىق-ساياسي ۇدەرىستەردى مودەلدەۋ داعدىلارىن دامىتۋعا, داۋلى جاعدايلاردىڭ شەشىمىن تابۋ جولدارىنا ۇيرەتۋگە باعىتتالعان وقۋلاردان وتەدى.
وسىلايشا, ەڭ ۇزدىكتەردىڭ ارنايى وقۋ دارىستەرىنەن وتۋىنە, جەكە جوبالارىن جاساۋىنا, مەملەكەتتىك ورگانداردا, ۇلتتىق كومپانيالاردا نەمەسە وزگە دە جۇمىس ورىندارىندا تاجىريبەدەن وتۋىنە سەپتىگىن تيگىزەتىن بىردەن-ءبىر الاڭ جاسالىپ وتىر. «نۇر وتان» پارتياسىنىڭ ساياسي مەنەدجمەنت مەكتەبى «اسا ءتيىمدى ادامداردىڭ 7 داعدىسى» جانە «تابىستى بيزنەستى قالاي باستاۋعا بولادى: 2 ميلليون تەڭگەدەن 2 ميلليون دوللارعا دەيىنگى جول» دەگەن تاقىرىپتاردا ترەنينگتەر وتكىزۋدە. اتالعان ترەنينگتەردى م.ءبىلالوۆا, ج.ساريەۆا جانە ر.كارىموۆ سىندى ءدارىس وقۋشىلار وتكىزەتىن بولادى. سونىمەن قاتار, قاتىسۋشىلارعا پرەزيدەنت جانىنداعى مەملەكەتتىك باسقارۋ اكادەمياسىندا ەكى كۇن بويى ءدارىس وقىلدى جانە كوپتەگەن ساياساتكەرلەرمەن, تانىمال كاسىپكەرلەرمەن كەزدەسۋلەر ۇيىمداستىرىلدى.
نەگىزىنەن جوبا جاستاردىڭ قىزمەتتە وسۋىنە نەمەسە ءوزىن دامىتۋعا باعىتتالعان. وسى ورايدا جوبادا مەملەكەتتىك قىزمەتكەرلەر, مۇعالىمدەر, اۋىلدان كەلگەن جاستار دا قاتىسىپ وتىرعاندىعى بەلگىلى بولدى. وعان قاتىسۋ ءۇشىن جوعارى بىلىمىمەن قاتار, بىرقاتار جەتىستىكتەرى دە بولۋى ءتيىس, دەيدى «جاس وتان» جاستار قاناتىنىڭ اتقارۋشى حاتشىسى نۇرلان سىدىقوۆ. جالپى, بەس جىلدىڭ قورىتىندىسى بويىنشا 10 مىڭنان استام جاستىڭ ىشىنەن ىرىكتەلگەن 300-ءى ءارتۇرلى سالالاردا ەڭبەك ەتۋدە. ولاردىڭ ىشىندە ءماسليحات دەپۋتاتتارى بولعانى دا بار ەكەن. وقۋىن جالعاستىرامىن دەگەندەر دە جەتكىلىكتى كورىنەدى.
قورىتا ايتقاندا, وقۋ مودۋلدەرى ەڭبەكسىز قالعان جاستارعا جۇمىس تاۋىپ بەرۋگە ەمەس, ال تالپىنىسى بار تالاپتىلارىنىڭ بويىنداعى قابىلەتتەرىن شىڭداۋعا تۇرتكى بولاتىن جوبا سانالادى. «تالاپتىعا نۇر جاۋار», دەپ وسىندايدا ايتىلسا كەرەك.
اسقار تۇراپباي ۇلى,
«ەگەمەن قازاقستان».