قازاقستان پرەزيدەنتى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينگە قازاندا بولعان اۋە اپاتىنا بايلانىستى كوڭىل ايتۋ جەدەلحاتىن جولدادى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
مەملەكەت باسشىسى جولاۋشىلار ۇشاعىنىڭ اپاتقا ۇشىراۋ سالدارىنان ادامداردىڭ قازا تاپقانى تۋرالى حاباردى قايعىرا وتىرىپ قابىلداعانىن اتاپ وتكەن.
– بۇل قايعىلى وقيعا مەنى قاتتى كۇيزەلتتى, رەسەي فەدەراتسياسى حالقىمەن بىرگە اۋىر قازانى شىن نيەتىممەن بولىسەمىن, – دەلىنگەن جەدەلحاتتا.
جەدەلحاتتا نۇرسۇلتان نازارباەۆ قازاقستان حالقىنىڭ اتىنان جانە جەكە ءوزىنىڭ اتىنان شىن نيەتپەن كوڭىل ايتىپ, قازا تاپقانداردىڭ وتباسىلارىنا, تۋىستارى مەن جاقىندارىنا قايعىلارىنا ورتاقتاستىعىن ءبىلدىردى.