19 قازان – قۇتقارۋشىلار كۇنى. 1995 جىلى مەملەكەت باسشىسىنىڭ جارلىعىمەن قۇرىلعان ارنايى قىزمەت كۇنى بۇگىنگە دەيىن حالىققا قالتقىسىز ەڭبەك ەتىپ كەلەدى.
قازاقستان تاۋەلسىزدىك العانعا دەيىن ەلىمىزدە كاسىبي اپاتتىق-قۇتقارۋ قىزمەتى بولماعان ەدى. ادامداردى, قوعامدى اپاتتىق جاعدايدان قۇتقارۋ جۇمىستارىن كوبىنە قوعامدىق ۇيىمدار, قۇتقارۋ بەكەتتەرى اتقارىپ كەلدى. بۇل قىزمەتتىڭ ءبىر بولىگى ميليتسياعا جۇكتەلدى.
مىنە, وسىنداي مەملەكەتتىك ماڭىزى بار قىزمەت جۇيەسىن جاساۋ ءۇشىن 1995 جىلى قازاقستان رەسپۋبليكاسى پرەزيدەنتىنىڭ جارلىعىمەن قازاقستان رەسپۋبليكاسىنىڭ توتەنشە جاعدايلار جونىندەگى مەملەكەتتىك كوميتەتى قۇرىلدى. وسى قۇجات نەگىزىندە 19 قازان قۇتقارۋشىلار كۇنى بولىپ بەلگىلەندى.
توتەنشە جاعدايلار سالاسى ۇلكەن جاۋاپكەرشىلىكتى تالاپ ەتەدى. قاۋىپتى قىزمەت كەز كەلگەن توسىن جاعدايدىڭ الدىن الىپ, زاردابىن جويۋعا ۇلكەن كۇش جۇمسايدى. اپاتقا ۇشىراعانداردى قۇتقارىپ, العاشقى جاردەم كورسەتەدى. سول ءۇشىن دە قۇتقارۋشىلار قاجەتتى قۇرال-جابدىقتارمەن بارىنشا جاراقتاندىرىلۋى ءتيىس.
بۇگىندە قۇتقارۋشىلار توتەنشە جاعدايلاردى جويۋ جۇمىستارىنا قاتىسۋعا دايىن بولۋ ءۇشىن ارنايى, مەديتسينالىق, پسيحولوگيالىق ازىرلىگىن, اۆاريالىق-قۇتقارۋ قۇرىلىمدارىنىڭ قۇرامىنداعى قىزمەت داعدىلارىن ۇنەمى جەتىلدىرىپ وتىرادى.
قۇتقارۋشىلاردىڭ جۇمىسى ءوز ومىرىنە قاۋىپتى بولىپ كەلەدى. دەگەنمەن ولاردىڭ العا قويعان باستى مىندەتى – حالىقتىڭ تىنىش ءومىرىن, تۇرمىستاعى, وندىرىستەگى قاۋىپسىزدىگىن قامتاماسىز ەتىپ, اپاتتىق جاعدايعا جول بەرمەۋ.